LONG taim bilong ol kibung, yumi save amamas long harim ol tok i kamap. Taim ol manmeri bilong God i bung wantaim long kisim kaikai bilong strongim bilip, ol i save serim tu kaikai bilong strongim bodi, na dispela i givim bikpela amamas long ol.

Long Septemba 1919, ol Sumatin Bilong Baibel i mekim wanpela kibung inap 8-pela de long Cedar Point, Ohio, Amerika. Ol hotel i gat wok long givim kaikai na rum slip long ol man i kam long kibung, tasol planti tausen manmeri moa i kam. Hotel i pulap tru, olsem na planti weita na weitres i lusim wok. Maneja bilong haus kuk bilong hotel i nidim helpim, olsem na em i askim sapos sampela yangpela bratasista inap givim helpim, na planti i mekim olsem. Sadie Green em wanpela sista husat i volantia long helpim wok. Em i tok: “Em fes taim bilong mi long mekim wok olsem weitres, tasol mipela i amamas tru.”

Long ol yia bihain, ol brata i stretim rot na sampela volantia inap redim kaikai bilong givim long ol bratasista i kam long kibung. Taim ol yangpela i wok wantaim ol narapela wanbilip, planti bilong ol i putim ol mak bilong winim long sait bilong bilip. Long 1937, Gladys Bolton i volantia long mekim dispela wok. Em i tok: “Mi bungim ol man bilong kain kain ples na ol i stori long ol samting ol i mekim bilong daunim ol hevi bilong ol. Kirap long dispela taim mi tingting strong long kamap painia.”

Beulah Covey em wanpela sista i kam long kibung, na em i tok: “Ol bratasista i givim bel tru long mekim ol wok, olsem na olgeta wok i ron gut.” Tasol dispela wok i gat hatwok bilong en. Long 1969, Angelo Manera i go long Dodger Stediam long Los Angeles, California, na em i painimaut olsem ol i makim em long kamap ovasia long wok bilong redim kaikai. Em i tok: “Mi kirap nogut tru!” Mipela i mas digim baret bilong pulim paip bilong ges i go long kitsen, na longpela bilong en inap 400 mita!

Long 1982, ol volantia long Siera Leon i wok hat long klinim wanpela hap graun, na ol i yusim olgeta kain samting long sanapim haus bilong redim kaikai. Long 1951, ol brata long Frankfurt, Jemani i rentim wanpela ensin we i kamapim stim bilong kukim  kaikai long 40 traipela sospen. Insait long 1-pela aua, ol i skelim kaikai long 30,000 manmeri. Inap 576 volantia i wasim ol plet, tasol ol bratasista i no laik givim hatwok long ol, olsem na ol i bringim ol fok na naip bilong ol yet. Long Yangon, Mianma, ol bratasista i bihainim gutpela tingting na ol i no yusim planti lombo taim ol i kukim kaikai bilong ol lain manmeri i kam long ol narapela kantri.

Long wanpela kibung long Amerika long 1950, san i hot na Annie Poggensee i sanap long lain bilong kisim kaikai. Em i tok: “Mi putim yau long toktok bilong 2-pela sista i kisim sip long Yurop na kam, na stori bilong ol i strongim mi.” Tupela i stori long hau Jehova i helpim ol long kam. Annie i tok: “Dispela 2-pela sista i amamas tru. Olsem na maski san i hot, ol i no les long sanap long lain.”

Long planti bikpela kibung, i gat ol longpela tebol we ol manmeri i save sanap tasol na kaikai. Ol i save kaikai hariap na lusim tebol bambai ol narapela i ken i kam kaikai. I no gat narapela rot bilong givim kaikai long planti tausen manmeri long belo. Wanpela man husat i no Witnes, i tok: “Dispela lotu i narapela kain tru. Ol i save sanap tasol na kaikai.”

Ol bikman bilong ami na ol narapela bikman i kirap nogut long pasin bilong ol bratasista long wok bung wantaim na oganaisim wok. Wanpela bikman bilong Ami Bilong Amerika i skelim ples bilong redim kaikai long Yankee Stediam long New York City, na bihain em i kirapim Meja Faulkner long Dipatmen Bilong Woa long Briten long i go skelim wankain samting. Olsem na long 1955, Meja Faulkner na meri bilong em i go long wanpela kibung, nem bilong en “Kingdom i Win,” long taun Twickenham, long Inglan. Em i lukim olsem olgeta volantia bilong redim kaikai i gat pasin laikim.

Inap planti yia, ol bratasista i amamas long redim kaikai bilong skelim long ol manmeri i kam long kibung. Dispela wok i nidim planti volantia long wok inap planti aua, na ol i no insait long sampela hap bilong program o program olgeta. Paslain liklik long 1980, ol brata long planti hap i senisim pasin bilong redim kaikai long taim bilong kibung. Kirap long 1995, ol brata i askim ol lain i go long ol kibung long bringim kaikai bilong ol yet. Dispela i mekim na ol bratasista inap putim gut yau long ol tok i kamap long ol kibung na bung wantaim ol narapela bratasista. a

Jehova i amamas tru long lukim ol wokman bilong em i wok strong long mekim ol wok bilong helpim ol wanbilip! Sampela inap tingim bek amamas ol i kisim taim ol i redim kaikai long taim bilong ol kibung. Wanpela samting i stap wankain yet long olgeta kibung: Pasin laikim em nambawan bikpela pasin i stap long olgeta kibung.—Jon 13:34, 35.