• God i makim. “Mi yet i putim pinis king bilong mi . . . mi bai givim olgeta lain manmeri long yu na mi bai givim graun olgeta long yu.”—Buk Song 2:6, 8.

• Tumbuna pikinini bilong King Devit. “Wanpela pikinini i bon pinis long yumi, God i givim pinis wanpela pikinini man long yumi . . . Wok bos bilong em bai wok long kamap bikpela moa na bel isi bai i no gat pinis bilong en, em bai sindaun long sia king bilong Devit na kisim wok king bilong em na mekim i kamap strong tru.”—Aisaia 9:6, 7.

• Bon long Betlehem. “O Betlehem . . . , wanpela man bai kamap long yu long nem bilong mi na em bai kamap king . . . Wok bos bilong em bai go long olgeta hap bilong graun.”—Maika 5:2, 4.

• Ol man i bin birua na kilim em i dai. “Ol man i bin luk daun long em, na yumi mekim olsem em i samting nating. . . . Long ol sin bilong yumi, na ol i bin sutim em; long ol rong bilong yumi, na ol i bin krungutim em.”—Aisaia 53:3, 5.

• Kirap bek long dai na kisim glori. “Bai yu no lusim mi i stap long Matmat. Bai yu no larim dispela man i stap gut long yu i lukim hul bilong matmat. . . . Mi stap long rait sait bilong yu na dispela i mekim mi i stap amamas inap oltaim oltaim.”—Buk Song 16:10, 11.

Kirap long bipo yet na i kam inap long nau, wanpela man tasol i inapim ol dispela mak bilong gutpela King; dispela man em Jisas Krais. Ensel i bin tokim Maria, mama bilong Jisas: “God . . . bai givim em sia king bilong papa bilong em Devit, . . . na bai i no gat pinis bilong Kingdom bilong em.”—Luk 1:31-33.

Jisas i no bin kamap king long graun, nogat. Em bai stap long heven olsem King long Kingdom Bilong God na bosim ol man. Wanem samting i mekim na em i gutpela King? Tingim samting Jisas i mekim taim em i stap long graun.

•   Jisas i tingim tru ol man. Jisas i helpim ol man na meri, ol yangpela na lapun, maski ol i gat wanem kain bekgraun. (Matyu 9:36; Mak 10:16) Taim wanpela lepraman i tok: “Sapos yu laik, yu inap mekim mi kamap klin,” Jisas i sori tru long em na i oraitim em.—Mak 1:40-42.

• Jisas i skulim yumi long rot bilong amamasim God. Em i tok: “Yupela i no inap stap wokboi bilong God na Mani wantaim.” Em i tok tu long yumi mas mekim pasin long ol narapela olsem yumi laik ol i mas mekim long yumi—em dispela stiatok ol i kolim olsem Gutpela Lo Tru. Na em i kamapim olsem God i amamas long save long ol samting yumi mekim, na tu, ol samting yumi pilim na tingting long en. Olsem na bilong amamasim God, yumi mas bosim tingting i stap long bel bilong yumi. (Matyu 5:28; 6:24; 7:12) Jisas i strongim tok gen olsem bilong stap amamas tru, yumi mas kisim save long ol samting God i laik yumi mekim na yumi kirap mekim.—Luk 11:28.

• Jisas i skulim ol man long pasin laikim. Toktok na pasin Jisas i mekim i gat strong na ol man i harim tok i pilim tru. “Bikpela lain manmeri i kirap nogut long pasin bilong em long skulim ol man. Long wanem, em i skulim ol olsem man em God i givim namba long em.” (Matyu 7:28, 29) Em i skulim ol: “Laikim . . . ol birua bilong yupela.” Em i beten tu long helpim ol man i gat asua long dai bilong em: “Papa, fogivim ol, ol i no save long samting ol i mekim.”—Matyu 5:44; Luk 23:34.

Jisas inap tru long stap gutpela King husat bai helpim na tingim ol man. Tasol em i kirap mekim wok bos long wanem taim?