PAIT NA BAGARAPIM OL MERI: Wanpela ripot bilong lain Yunaitet Nesen i tok: “Wanpela long olgeta 3-pela meri i save bungim hevi long man o boipren bilong ol i pait na bagarapim ol.” Na sori tru olsem, “long graun olgeta wanpela long olgeta 5-pela meri bai bungim hevi long man i reipim ol o i traim long reipim ol.”

PASIN RASKOL LONG STRIT: Ol ripot i soim olsem winim 30,000 lain raskol long Amerika i save pait na bagarapim ol narapela. Long Latin Amerika, 1-pela long olgeta 3-pela man i karim hevi long ol man i bin pait na bagarapim ol.

KILIM MAN I DAI: Ol man i ting long yia 2012, ol man i kilim i dai klostu 500 tausen man, dispela namba i winim namba bilong ol man i dai long ol woa. Long hap saut bilong Afrika na Sentral Amerika, namba bilong ol man i kilim i dai narapela i go antap tru. Olsem, long populesen we i gat 100 tausen man, ol i kilim i dai 26 i go 30 man. Long Latin Amerika, insait long wanpela yia ol i kilim i dai winim 100 tausen man, na long Brasil ol i kilim i dai winim 50 tausen man. Yu ting i gat rot bilong pinisim tru pasin bilong pait na bagarapim man?

Bilong wanem pasin bilong pait na bagarapim man i stap long olgeta hap? I gat planti risen, sampela bilong ol em, hevi bilong mani na i stap bilong ol man, pasin bilong kisim drak na alkohol, heitim na luk daun long ol narapela, ol pikinini i bihainim pasin bilong ol man i bikpela pinis long belhat na pait, na i no givim panismen long ol man i save pait na bagarapim ol narapela.

Long sampela hap bilong graun, ol man i painim sampela rot long daunim pasin bilong pait na bagarapim man. Long São Paulo, Brasil we planti milion manmeri i stap, ol ripot i soim olsem namba bilong ol man i kilim i dai narapela i go daun inap olsem 80 pesen insait long 10-pela yia i go pinis. Maski i olsem, ol man i insait long kain kain pasin bilong pait na bagarapim man long dispela siti, na long olgeta 100 tausen man ol i kilim i dai 10-pela man. Olsem wanem? Pasin bilong pait na bagarapim man bai pinis olgeta?

Bilong pinisim tru dispela hevi, ol man i mas senisim pasin na tingting bilong ol. Sapos ol man bilong pait na bagarapim narapela i laik senisim pasin bilong ol, ol i mas lusim olkain pasin olsem pasin antap, gridi, na tingim ol yet. Na ol i mas laikim ol narapela, na rispektim na tingim ol.

Wanem samting bai helpim man long mekim kain bikpela senis olsem? Tingim tok Baibel i skulim yumi long en:

• “Pasin bilong laikim God i olsem, yumi bihainim ol lo bilong en.”—1 Jon 5:3.

• “Man i save aninit long Bikpela, em i no save laikim tru ol pasin nogut.”—Sindaun 8:13.

Pasin bilong laikim God na pret long mekim ol samting God i no orait long en, ol dispela pasin i gat strong long helpim ol man bilong pait na bagarapim man long mekim ol senis long i stap bilong ol. Na ol  senis ol i mekim i no bilong sotpela taim tasol, nogat, ol i senisim tru ol pasin bilong ol. Yu ting ol man inap mekim olsem?

Tingim, Alex * i bin stap long kalabus bilong Brasil inap 19 yia, long wanem, em i insait long olkain pasin bilong pait. Em i stadi wantaim ol Witnes Bilong Jehova, na long yia 2000 em i kamap wanpela Witnes. Olsem wanem? Em i senisim tru pasin bilong em? Alex i bel hevi tru long ol pasin nogut em i mekim, na em i tok: “Mi laikim God, long wanem, em i lusim tru rong bilong mi. Pasin bilong tenkyu long Jehova na laikim Em i helpim mi long senisim pasin bilong mi.”

César i stap tu long Brasil, em i bin insait long pasin bilong stil na holim gan na hansapim ol man. Em i mekim olsem inap 15 yia samting. Tasol wanem samting i helpim em long lusim dispela pasin? Taim em i stap long kalabus, ol Witnes Bilong Jehova i bungim em na em tu i bin stadi long Baibel. César i tok: “Em fes taim mi luksave olsem i gat as bilong i stap laip. Mi kisim pasin bilong laikim God na pret long Em, dispela pasin bilong pret i helpim mi long sakim ol pasin nogut na bai Jehova i no ken bel hevi long mi. Mi laik mekim ol samting bilong soim olsem mi amamas long gutpela pasin bilong Em. Pasin laikim na pasin bilong pret i kirapim mi long senisim ol pasin bilong mi.”

Yumi kisim wanem skul long ol dispela ekspiriens? Baibel i gat strong long helpim ol man long mekim ol bikpela senis long laip bilong ol, olsem senisim tingting bilong ol. (Efesus 4:23) Alex em yumi stori pinis long en i tok: “Ol tok mi lainim long Baibel i olsem klinpela wara, na isi isi ol dispela tok i helpim mi long rausim ol tingting nogut bilong mi. Pastaim mi ting mi no inap tru long mekim olsem.” Tru tumas, taim yumi tingim tingim ol gutpela tok bilong Baibel, dispela inap helpim yumi long rausim ol tingting nogut. Tok Bilong God i gat strong long mekim olsem. (Efesus 5:26) Olsem na ol man i gat hatpela pasin na ol i save tingim ol yet, ol inap long senisim ol pasin bilong ol, mekim gut long ol arapela, na stap wanbel wantaim ol. (Rom 12:18) Ol i bihainim ol stiatok bilong Baibel na dispela i helpim ol long stap amamas.—Aisaia 48:18.

Winim 8 milion Witnes Bilong Jehova long 240 kantri i kisim save long rot bilong pinisim tru pasin bilong pait na bagarapim man. Ol man bilong olgeta kain skin na sindaun i kisim save long pasin bilong laikim God na pret long Em, na tu, ol i laikim narapela narapela, olsem na ol i stap wanbel wantaim olsem wanpela famili long graun olgeta. (1 Pita 4:8) I stap bilong ol i soim olsem pasin bilong pait na bagarapim man inap pinis.

Baibel i tok promis olsem klostu nau God bai pinisim ol man i save pait na bagarapim ol narapela. Ol i wetim “de bilong bikpela kot, na ol man i sakim tok bilong God, ol bai bagarap olgeta.” (2 Pita 3:5-7) Ol man bilong pait na bagarapim man bai i no mekim nogut moa long ol arapela. Hau na yumi inap bilip tru olsem God i laik pinisim pasin bilong pait na bagarapim man?

Baibel i tok, God “i heitim tru ol man i laikim pasin pait.” (Song 11:5, NW) Krieta bilong yumi i laikim gutpela na stretpela pasin. (Song 33:5; 37:28) Em risen na God bai pinisim tru ol man bilong pait na bagarapim narapela.

Klostu nau ol man bai stap amamas long graun olgeta. (Song 37:11; 72:14) I gutpela yu kisim sampela save moa long olsem wanem yu inap stap long dispela taim we i no gat pasin bilong pait na bagarapim man.