1. Yumi inap putim wanem ol mak bilong bilip?

 YUMI ol Kristen tru, olsem na yumi laikim tru Jehova. Yumi laik givim bel olgeta long mekim wok bilong em. Sapos yumi laik mekim olgeta samting yumi inap mekim long wok bilong Jehova, orait yumi mas putim ol mak bilong bilip, olsem kisim ol pasin Kristen, lain long mekim wanpela wok, o painim ol rot long helpim ol narapela. b

2. Wai na yumi mas putim ol mak bilong bilip na wok strong long winim ol dispela mak?

² Wai na yumi mas kamap ol gutpela wokman bilong Jehova? Nambawan risen em olsem: Yumi laik amamasim gutpela Papa bilong yumi long heven. Jehova i save amamas taim em i lukim olsem yumi yusim save bilong yumi long givim bel olgeta long sapotim wok bilong em. Narapela risen em olsem, yumi laik kamap strong moa long bilip na bai yumi ken helpim gut ol wanbilip bilong yumi. (1 Tes. 4:9, 10) Maski yumi stap insait long tok i tru inap hamas yia, yumi olgeta i ken kamap strong moa long bilip. Yumi bai stori long hau yumi ken mekim olsem.

3. Olsem 1 Timoti 4:12-16 i kamapim, aposel Pol i kirapim Timoti long mekim wanem?

³ Taim aposel Pol i raitim namba 1 pas bilong em long Timoti, dispela yangpela man i mekim wok elda inap sampela haptaim pinis. Maski i olsem, Pol i kirapim em long kamap gutpela moa long mekim wok bilong God. (Ritim 1 Timoti 4:12-16.) Taim yu tingim  ol tok bilong Pol, yu bai luksave olsem em i laik bai Timoti i kamap gutpela Kristen long 2-pela rot. Long rot bilong kisim ol pasin Kristen olsem pasin laikim, bilip, na pasin i klin, na long rot bilong kamap gutpela moa long mekim ol kain wok olsem rit long ai bilong ol manmeri, mekim ol tok bilong strongim ol narapela, na mekim gut wok tisa. Yumi bai stori long eksampel bilong Timoti na dispela bai helpim yumi long save long hau yumi inap putim ol mak long skel bilong yumi na bai yumi kamap ol gutpela wokman bilong God. Yumi bai stori tu long ol rot yumi ken mekim bikpela wok moa long autim tok.

4. Olsem Filipai 2:19-22 i kamapim, wai na Timoti i stap olsem gutpela wokman em Jehova i ken yusim?

⁴ Wai na Timoti i stap olsem gutpela wokman em Jehova i ken yusim? Timoti i gat ol naispela pasin. (Ritim Filipai 2:19-22.) Ol tok Pol i mekim long Timoti i soim olsem Timoti i gat pasin daun, em i stap gut long ol narapela, em i save wok hat tru, na ol narapela i ken trastim em. Em i gat pasin laikim na em i tingim tru ol wanbilip. Em risen na Pol i laikim tru Timoti na em i no gat tupela tingting taim em i givim Timoti ol bikpela asainmen long mekim. (1 Kor. 4:17) Olsem tasol, Jehova bai laikim tru yumi na yumi bai mekim gutpela wok bilong helpim kongrigesen taim yumi kisim ol pasin em Jehova i laikim.​—Sng. 25:9; 138:6.

5. (a) Olsem wanem yu ken makim wanpela pasin Kristen em yu laik kisim? (b) Olsem piksa i soim, hau dispela yangpela sista i wok strong long winim mak em i putim long pilim hevi bilong narapela?

⁵ Putim wanpela mak. Beten na skelim wanem ol pasin yu laik kisim. Makim wanpela pasin em yu laik mekim i kamap gutpela moa. Olsem wanem? Yu laik kisim pasin bilong pilim tru hevi bilong ol narapela, o yu laik strongim laik bilong yu long sapotim ol wanbilip bilong yu? O ating yu mas kisim pasin bilong kamap bel isi wantaim ol narapela o redi long fogivim ol narapela. Yu inap kisim gutpela helpim taim yu askim wanpela pren em yu trastim long tokim yu long sampela samting yu ken mekim bilong kisim ol dispela pasin.​—Prov. 27:6.

6. Yu ken mekim wanem bilong winim mak yu putim long kisim wanpela pasin?

⁶ Wok strong long winim dispela mak. Hau yu ken mekim olsem? Wanpela rot em long stadi gut long dispela pasin em yu laik kisim. Ating yu laik wok strong long kisim pasin bilong redi long fogivim ol narapela. Ating pastaim yu bai ritim na tingim tingim ol eksampel bilong ol manmeri  long Baibel em ol i amamas long fogivim ol narapela, na eksampel bilong ol manmeri husat i no fogivim ol narapela. Tingim eksampel bilong Jisas. Em i redi long fogivim ol narapela. (Luk 7:47, 48) Em i no tingim ol popaia bilong ol; em i tingim ol gutpela wok ol inap mekim. Tasol ol Farisi long taim bilong Jisas “i tingim ol arapela olsem ol i man nating.” (Luk 18:9) Bihain long yu tingim tingim ol dispela eksampel, askim yu yet: ‘Mi save tingim wanem samting taim mi lukim ol narapela? Mi save tingim wanem ol pasin bilong ol?’ Sapos yu pilim hatwok long fogivim wanpela, orait traim long raitim long notbuk ol gutpela pasin bilong em. Bihain, askim yu yet: ‘Jisas i holim wanem tingting long em? Jisas bai fogivim em?’ Kain stadi projek i ken helpim yu long senisim tingting yu gat. Ating pastaim yumi mas wok hat tru long fogivim wanpela husat i bin rongim yumi. Tasol taim yumi traim bes long mekim olsem long olgeta taim, isi isi yumi bai kisim pasin bilong redi long fogivim ol narapela.

7. Olsem Provep 22:29 i kamapim, hau Jehova i yusim ol manmeri i save gut long mekim wok long nau?

⁷ Narapela mak yu ken putim em long lain long mekim gut wanpela wok. I gat bikpela nid tru long planti bratasista i ken helpim wok bilong sanapim ol haus Betel, ol Haus Kibung, na ol Haus Kingdom. Planti bilong ol dispela bratasista i lain long mekim kain kain wok taim ol i wok wantaim ol bratasista em ol i gat ekspiriens long mekim ol wok konstraksen. Olsem piksa i soim, ol brata na sista wantaim i lain long mekim ol wok bilong helpim long lukautim ol Haus Kibung na ol Haus Kingdom. Long ol dispela rot na ol narapela rot, God Jehova, “King bilong oltaim oltaim,” na Krais Jisas, “King bilong olgeta king,” i yusim ol manmeri i save gut long mekim wok long mekim planti bikpela wok. (1 Tim. 1:17; 6:15; ritim Provep 22:29.) Yumi laik wok hat tru long yusim save bilong yumi long givim glori long Jehova, na i no long yumi yet.​—Jon 8:54.

8. Yu ken mekim wanem bilong putim mak long lain long mekim wanpela wok?

⁸ Putim wanpela mak. Yu inap lain long mekim wanem wok? Askim ol elda long kongrigesen bilong yu na ating wasman sekit bilong yu long wanem wok ol i ting yu inap lain long mekim. Ating ol bai tok long yu ken kamap gutpela moa long pasin bilong mekim ol tok na skulim ol manmeri. Sapos olsem, askim ol long helpim yu long luksave long wanem pasin bilong toktok em yu ken bihainim. Bihain, mekim ol samting bilong kamap gutpela moa long pasin bilong mekim tok. Hau yu inap mekim olsem?

9. Yu ken mekim wanem bilong winim mak long lain long mekim wanpela wok?

⁹ Wok strong long winim dispela mak. Ating yu laik mekim gut wok tisa bilong yu. Yu inap stadi gut long buklet Kamap Gutpela Moa Long Pasin Bilong Rit na Skulim Man. Taim yu gat tok long wanpela hap bilong miting i save kamap namel long wik, askim wanpela brata i save mekim gut wok tisa long harim tok bilong yu paslain long yu mekim dispela tok, na em i ken tokim yu long sampela rot yu inap bihainim long kamap gutpela tisa moa. Redim gut ol asainmen bilong yu, na bai ol narapela i ken luksave olsem yu save wok hat tru na ol i ken trastim yu.​—Prov. 21:5; 2 Kor. 8:22.

10. Stori long eksampel bilong wanpela brata long hau em i kamap gutpela moa long mekim wanpela wok.

¹⁰ Yu ken mekim wanem sapos yu laik lain long mekim wanpela wok em yu save pilim hatwok long mekim? No ken givap! Wanpela brata nem bilong em Garry, em i no save rit gut. Em i tingim bek olsem em i save pilim sem taim em i traim long rit bikpela long ol miting bilong kongrigesen. Tasol em i wok hat long kamap gutpela long pasin bilong rit. Em i tok em i bin kisim gutpela trening, olsem na nau em i save mekim ol tok  long Haus Kingdom, ol kibung sekit, na ol rijinel kibung!

11. Olsem Timoti, wanem samting bai helpim yumi long mekim planti wok moa?

¹¹ Yu ting Timoti i kamap man bilong mekim gut ol tok na gutpela tisa tru? Baibel i no stori long dispela samting. Tasol yumi save tru olsem Timoti i kamap gutpela moa long mekim ol asainmen bilong em bikos em i bihainim edvais bilong Pol. (2 Tim. 3:10) Olsem tasol, sapos yumi lain gut long mekim ol wok, yumi bai mekim planti wok moa bilong Jehova.

12. Yu kisim wanem helpim taim ol narapela i mekim ol wok bilong sapotim yu?

¹² Yumi olgeta i save kisim helpim taim ol narapela i mekim ol gutpela wok bilong sapotim yumi. Taim yumi stap long haus sik, yumi save amamas tru taim ol elda long Hospital Lieson Komiti, na tu, ol elda long Lain Bilong i Go Lukim Ol Sikman i kam visitim yumi. Taim yumi karim wanpela bikpela hevi long laip bilong yumi, yumi save pilim tru gutpela pasin bilong wanpela elda husat i lusim haptaim long putim yau long yumi na mekim isi bel bilong yumi. Taim yumi nidim helpim long mekim Baibel stadi, yumi save amamas tru taim wanpela painia i gat ekspiriens i sindaun wantaim yumi long stadi na em i kamapim sampela sajesten bilong helpim yumi. Olgeta dispela bratasista i amamas long helpim yumi. Yumi tu i ken kisim wankain amamas taim yumi redi long mekim ol wok bilong helpim ol wanbilip. Jisas i tok: “Amamas bilong givim samting i winim amamas bilong kisim samting.” (Apo. 20:35) Sapos yu laik mekim bikpela wok moa bilong Jehova long ol dispela rot o long ol narapela rot, orait wanem samting bai helpim yu long mekim olsem?

13. Taim yumi laik putim wanpela mak, yumi mas tingim wanem samting?

¹³ Taim yu putim wanpela mak, tingim stret samting yu laik mekim. Ating yu tok, ‘Mi laik mekim sampela wok moa bilong helpim kongrigesen.’ Tasol ating yu no save hau long winim dispela mak, na yu no inap save long wanem taim stret yu bin winim dispela mak. Olsem na taim yu putim wanpela mak, tingim stret samting yu laik mekim. Ating yu ken raitim long notbuk dispela mak na hau yu plen long winim dispela mak.

14. Wai na yumi mas redi long mekim ol senis taim yumi putim ol mak?

¹⁴ Yumi mas redi long mekim ol senis taim  yumi putim ol mak. Wai? Bikos yumi no inap kontrolim olgeta samting i kamap long laip bilong yumi. Tingim, aposel Pol i helpim wok bilong kirapim nupela kongrigesen long Tesalonaika. Na ating em i tingting long stap long hap na helpim ol nupela Kristen. Tasol ol man i birua long Pol, olsem na em i lusim Tesalonaika. (Apo. 17:1-5, 10) Sapos Pol i bin stap long hap, em bai putim hevi long ol wanbilip bilong em. Tasol Pol i no givap. Em i redi long mekim ol senis long laip bilong em. Bihain, em i salim Timoti i go long Tesalonaika bilong helpim ol nupela Kristen long kamap strong long bilip. (1 Tes. 3:1-3) Yumi ken save tru olsem ol Kristen long Tesalonaika i bin amamas tru taim Timoti i redi long go long wanem ol hap i gat nid bilong mekim asainmen bilong em!

15. Taim senis i kamap long sindaun bilong yumi, hau yumi ken senisim ol mak yumi putim? Stori long dispela.

¹⁵ Yumi ken kisim skul long samting i kamap long Pol long Tesalonaika. Ating yumi laik mekim wanpela asainmen, tasol sampela samting i kamap em yumi no inap kontrolim na dispela i pasim rot bilong yumi. (Ekl. 9:11) Sapos kain samting olsem i painim yu, yu mas redi long mekim senis na putim narapela mak em yu ken winim. Dispela em samting tupela marit, nem bilong ol Ted na Hiedi, i bin mekim. Helt bilong wanpela bilong ol i no gutpela moa, so tupela i lusim Betel. Tasol ol i laikim tru Jehova, olsem na ol i painim ol narapela rot bilong mekim bikpela wok moa bilong em. Pastaim, tupela i kamap painia oltaim. Bihain liklik, tupela i kamap spesel painia, na Ted i kisim trening long stap olsem helpim bilong wasman sekit. Tasol senis i kamap long krismas bilong ol brata husat i ken mekim wok sekit. Ted na Hiedi i luksave olsem krismas bilong tupela i pasim rot bilong ol long mekim yet wok sekit. Ol i bel hevi, tasol ol i luksave olsem ol i ken mekim wok bilong Jehova long ol narapela rot. Ted i tok: “Mipela i kisim skul olsem i gat kain kain wok mipela i ken mekim long wok bilong Jehova.”

16. Yumi kisim wanem skul long tok bilong Galesia 6:4?

¹⁶ Yumi no inap long kontrolim olgeta samting i kamap long laip bilong yumi. Olsem na yumi no ken ting olsem ol asainmen bilong yumi i mekim na yumi dia tumas long Jehova, na yumi no ken skelim yumi yet wantaim ol narapela em ol i amamas long mekim ol asainmen em yumi no inap mekim. Hiedi i tok: “Bel isi bilong yu bai pinis sapos yu skelim laip bilong yu wantaim samting i kamap long laip bilong ol narapela.” (Ritim Galesia 6:4.) Em i bikpela samting long yumi mas painim ol rot bilong helpim ol narapela na mekim wok bilong Jehova. c

17. Yu inap mekim wanem na bai yu ken mekim planti moa wok bilong Jehova?

¹⁷ Yu ken mekim planti moa wok bilong Jehova  taim yu bungim liklik kago tasol na yu abrusim pasin bilong kisim nating dinau. Putim ol liklik mak na dispela bai helpim yu long winim ol bikpela mak. Olsem, ating yu putim mak long kamap painia oltaim. Sapos olsem, orait yu ting yu ken mekim wok painia haptaim inap sampela mun pastaim? Sapos yu putim mak long kamap kongrigesen sevan, orait yu ting yu ken lusim bikpela haptaim moa long autim tok na visitim ol lain i sik na ol lapun long kongrigesen bilong yu? Ekspiriens yu kisim long nau bai opim rot long yu inap mekim planti narapela wok long bihain. Yu mas tingting strong long givim bel olgeta long mekim wanem wanem asainmen yu kisim.​—Rom 12:11.

18. Olsem piksa i soim, yu kisim wanem skul long eksampel bilong Beverley?

¹⁸ Maski yumi gat hamas krismas, yumi ken putim na winim ol mak bilong bilip. Tingim eksampel bilong Sista Beverley, em i gat 75 krismas. Em i gat bikpela sik na dispela i mekim na i hatwok long em i wokabaut. Tasol em i laik tru long sapotim kempein bilong tilim ol invatesen bilong Memorial. Olsem na em i putim ol mak em i ken winim. Taim Beverley i winim ol mak bilong insait long dispela kempein, em i amamas tru. Gutpela wok em i mekim i kirapim ol narapela long givim bel tru long autim tok. Jehova i tingim tru gutpela wok ol lapun bratasista bilong yumi i mekim, maski ol i no inap mekim bikpela wok olsem ol narapela i mekim.​—Sng. 71:17, 18.

19. Yumi ken putim wanem ol mak bilong bilip?

¹⁹ Putim ol mak yu inap winim. Kisim ol pasin we bai mekim yu dia tumas long ai bilong Jehova. Lain long mekim ol wok na dispela bai opim rot long God na oganaisesen bilong em i ken yusim yu long mekim planti moa wok. Painim ol rot bilong helpim gut ol bratasista bilong yu. d Olsem Timoti, Jehova bai blesim yu na “bai olgeta manmeri i ken lukim klia olsem yu wok long kamap strong moa.”​—1 Tim. 4:15.