WANPELA taim yu bin karim hevi na yu pilim olsem i no gat wanpela i stap bilong helpim yu? Yumi stap long “taim nogut . . . na dispela bai givim hatwok long ol man,” olsem na yumi inap bel hevi na pilim olsem yumi stap wanpis. (2 Tim. 3:1) Tasol i no olsem yumi mas karim ol hevi long strong bilong yumi yet, nogat. Baibel i tok ol trupela pren i ken helpim yumi long “taim bilong hevi.”—Prov. 17:17.

Aposel Pol i kisim helpim long ol pren bilong em husat i go wantaim em long ol misineri raun bilong em. (Kol. 4:​7-11) Taim Pol i stap kalabus long Rom, ol pren bilong em i mekim ol wok em Pol yet i no inap long mekim. Olsem, ol bratasista long Filipai i givim ol samting em Pol i nidim na em i kisim ol dispela samting long rot bilong Epafroditus. (Fili. 4:18) Tikikus i bringim ol pas Pol i raitim i go long narapela narapela kongrigesen. (Kol. 4:7; lukim stadi nout long Study Bible) Ol pren bilong Pol i helpim em na em i mekim yet wok autim tok bilong em, maski em i kalabus long haus o em i stap wanpis long haus kalabus. Hau yu ken stap trupela pren bilong ol narapela long nau?

Ol eksampel bilong ol bratasista long nau i soim hau ol trupela pren i ken helpim narapela narapela. Tingim eksampel bilong wanpela sista husat i stap gutpela pren bilong Elisabet, em wanpela painia oltaim long Spen. Taim mama bilong Elisabet i kisim sik kensa, dispela sista i salim planti teks mesis i gat tok bilong ol Baibel ves i go long Elisabet bilong strongim em. Elisabet i tok: “Ol dispela mesis i strongim mi long karim hevi bilong wan wan de na mi no pilim olsem mi stap wanpis.”—Prov. 18:24.

Yumi ken strongim pasin pren bilong yumi wantaim ol wanbilip long rot bilong helpim ol long go autim tok na go long ol miting. Yu ting yu inap helpim wanpela lapun brata o sista long rot bilong draivim em i go long miting o autim tok? Taim yu mekim olsem, rot i op long yu ken strongim ol na ol i ken strongim yu tu. (Rom 1:12) Tasol sampela Kristen i no inap long lusim haus bilong ol. Hau yumi ken stap trupela pren bilong ol?

Sampela wanbilip i gat hevi long sait bilong helt o sampela narapela samting i mekim na ol i no inap go long ol miting long Haus Kingdom. Tingim eksampel bilong David, em i bin kisim sik kensa. Winim 6-pela mun em i kisim kimoterapi, em tritmen bilong daunim sik kensa. Long haptaim em i kisim tritmen, David na meri bilong em Lidia i konek long ol miting long rot bilong vidio konferens.

Ol pren bilong ol long kongrigesen i bin mekim wanem bilong strongim ol? Bihain long miting i pinis, sampela long Haus Kingdom i save lusim sampela haptaim long toktok wantaim David na Lidia long rot bilong vidio konferens. Na tu, taim David na Lidia i bekim tok, ol wanbilip i save salim ol teks mesis long ol bilong strongim ol. Wanem gutpela samting  i kamap? David na Lidia i pilim tru pasin laikim bilong ol bratasista na ol i no pilim olsem ol i stap wanpis.

Ating yumi inap stretim rot long autim tok wantaim ol bratasista em ol i no inap long lusim haus bilong ol. Yumi ken mekim sampela liklik senis long sediul bilong yumi na bai yumi ken wok wantaim ol, na long dispela rot yumi soim ol olsem yumi tingim ol. (Prov. 3:27) Yu ken makim haptaim long sediul bilong yu long raitim pas wantaim ol o autim tok long telefon wantaim ol. Na tu, ol bratasista em ol i no inap lusim haus bilong ol, ol inap insait long bung bilong autim tok long rot bilong vidio konferens. David na Lidia i amamas tru long ol i ken mekim olsem. David i tok: “Taim mipela i insait long bung bilong autim tok na mipela i harim brata i stori liklik na bihain em i beten, dispela i strongim mipela tru.” Na tu, sampela taim ating yu ken askim brata o sista husat i no inap lusim haus bilong em sapos em orait long yu ken bringim Baibel sumatin bilong yu i kam long haus bilong em bilong mekim Baibel stadi.

Taim yumi wok wantaim ol bratasista em ol i no inap lusim haus bilong ol na yumi lukim ol naispela pasin bilong ol, yumi bai pas gut moa wantaim ol. Olsem, taim yu mekim wok autim tok wantaim ol kain pablisa olsem na yu lukim hau ol i yusim gut Tok Bilong God long putim tok i tru i go daun long bel bilong man, dispela bai kirapim yu long pas gut moa wantaim ol. Taim yu helpim ol wanbilip long mekim ol wok lotu, rot i op long yu inap kisim planti nupela pren.—2 Kor. 6:13.

Taim Pol i karim ol hevi, pren bilong em Taitus i go visitim em na long dispela rot em i mekim gut bel bilong Pol. (2 Kor. 7:​5-7) Dispela stori i kirapim yumi long tingim olsem yumi inap mekim gut bel bilong ol narapela long rot bilong ol tok yumi mekim, na tu, long rot bilong lusim haptaim long stap wantaim ol na mekim ol samting bilong helpim ol.—1 Jon 3:18.

Ol bratasista bilong yumi long Rasia i stap gutpela piksa tru long pasin bilong sapotim narapela narapela. Tingim ekspiriens bilong Sergey na meri bilong em, Tatyana. Bihain long polis i go painim ol samting long haus bilong ol, ol i kisim ol i go long polis stesin bilong kwestenim ol. Pastaim ol i rilisim Tatyana na em i go bek long haus. Sergey i tok: “Taim [Tatyana] i go kamap long haus, wanpela sista i strongim bel na em i kam long haus long visitim em. Planti pren tru i kam na helpim mipela long stretim bek ol samting long apatmen bilong mipela.”

Sergey i tok moa olsem: “Mi save laikim tok bilong Provep 17:​17, em i tok: ‘Trupela pren i save soim pasin laikim long olgeta taim na em i kamap olsem brata bilong yu long taim bilong hevi.’ Mi pilim tru ol dispela tok long taim mi pilim olsem mi no inap karim hevi moa long pasin birua ol man i mekim long mi. Jehova i givim mi ol pren em ol i strongim bel na sanap long sait bilong mi.” a

Yumi bai karim yet planti bikpela hevi, olsem na yumi mas i gat ol pren bilong helpim yumi. Na yumi bai nidim helpim bilong ol moa yet long taim bilong traipela hevi tru. So long nau yet, yumi mas mekim olgeta samting yumi inap mekim bilong stap olsem trupela pren bilong ol narapela!—1 Pita 4:​7, 8.