DON em wanpela Witnes Bilong Jehova long Kanada, na em i traim long toktok wantaim ol manmeri long strit. Don i stori long wanpela man em i bungim. Em i tok: “Peter em wanpela taranguman, na em i luk doti tru. Mi no bin bungim kain man olsem long bipo. Em i save les tru long ol man i go klostu long em. Planti taim em i no kisim ol samting ol man i givim.” Tasol Don i wok strong long mekim gutpela pasin long dispela man inap 14 yia.

Wanpela taim, Peter i askim Don: “Wai na yu save tingim mi? Olgeta narapela i no bisi long mi. Bilong wanem yu mekim gut long mi?” Don i tingting gut na i yusim 3-pela skripsa bilong kirapim tru bel bilong Peter. Namba 1, em i askim Peter sapos em i save olsem God i gat nem, na em i askim em long ritim Song 83:18 long Baibel. Namba 2, Don i soim Peter long risen na em i tingim em tru. Don i tokim em long ritim Rom 10:13, 14. Dispela ves i tok olsem “olgeta manmeri i singaut long nem bilong Jehova, em bai kisim bek ol.” Namba 3, Don i ritim Matyu 9:36, na em i askim Peter long ritim gen dispela skripsa. Ves i tok: “Taim [Jisas] i lukim bikpela lain manmeri, em i sori tru long ol, long wanem, ol man i bin mekim nogut long ol na ol i stap nogut tru olsem ol sipsip i no gat wasman.” Bihain long em i ritim skripsa, aiwara i kam daun na em i askim Don: “Mi wanpela bilong ol dispela sipsip, a?”

Isi isi Peter i mekim ol senis. Em i waswas, katim mausgras, na werim ol gutpela klos em Don i givim. Peter i wok yet long mekim ol samting bilong i stap klin.

Peter i save raitim ol tingting bilong em long notbuk. Pastaim, ol tok em i raitim i soim olsem em i no amamas long laip bilong em, tasol ol stori em i raitim bihain i narapela kain, em i tok: “Long dispela de, mi kisim save long nem bilong God. Taim mi beten, mi inap beten long Jehova. Mi amamas tru long mi inap save long nem bilong em. Don i tok olsem Jehova inap kamap Pren bilong mi, na  em bai harim beten bilong mi long olgeta taim.”

Laspela tok em i raitim i go long brata na susa bilong em. Em i tok:

“Mi no pilim orait moa. Ating krismas bilong mi i wok long winim mi. Maski sapos dispela em laspela de bilong mi, mi save olsem mi bai lukim gen pren bilong mi [Don] long Paradais. Sapos yu ritim dispela tok, mi no stap moa. Tasol sapos yu lukim wanpela man long fiuneral bilong mi husat i no wanfamili bilong yumi, toktok long em, na plis ritim dispela blupela buk [em buk “The Truth That Leads to Eternal Life” we em i kisim sampela yia i go pinis]. * Buk i stori olsem mi bai lukim gen pren bilong mi long Paradais. Mi bilip tru long dispela tok. Brata bilong yu, Peter.”

Bihain long fiuneral, sista bilong Peter, em Ummi, em i tok: “Inap 2-pela yia i go pinis, Peter i kontektim mi. Em fes taim bilong em long i stap amamas. Na tu, em i smail.” Ummi i tokim Don: “Ating ol tok bilong dispela buk i spesel tru, olsem na mi bai ritim bikos em i senisim laip bilong brata bilong mi.” Na tu, em i kirap stadi long buk Tru Tru Baibel i Tok Wanem? wantaim wanpela Witnes Bilong Jehova.

Olsem Don, yumi laik kamapim pasin laikim na mekim pasin isi long olgeta kain man, na yumi no ken skelim lukluk bilong man. (1 Tim. 2:3, 4) Dispela bai stiaim yumi long helpim ol man olsem Peter, em lukluk bilong ol i no gutpela tumas, tasol ol i gat gutpela bel. Yumi inap bilip tru olsem God i “save lukim tingting na laik bilong man,” na em bai mekim tok i tru i kamap strong long bel bilong ol kain man olsem.—1 Sml. 16:7; Jon 6:44.