MUSIK em i bikpela samting long kalsa bilong lain Israel bilong bipo. Baibel i stori long ol musik em ol man i pilaim long ol instramen na ol singsing ol i save mekim. Sapos yumi tilim Ol Skripsa i go long 10-pela hap, wanpela hap olgeta em ol singsing tasol. Sampela eksampel em Buk Song, Song Bilong Solomon, na Buk Krai. Wanpela buk (Music in Biblical Life) i tok olsem Baibel “i soim klia long yumi hau lain Israel i save mekim musik long planti narapela samting long laip bilong ol.”

Musik long laip bilong ol. Lain Israel i save pilaim musik bilong kamapim bel na tingting bilong ol. (Ais. 30:29) Ol meri i save pilaim ol tambarin na singsing amamas na danis long taim lain Israel i makim ol nupela king, taim bilong ol bung bilong lotu, na long taim ol man i winim pait. (Het. 11:34; 1 Sml. 18:​6, 7; 1 Kin. 1:​39, 40) Lain Israel i save mekim ol singsing sori long taim ol i krai sori long wanpela i dai. (2 Sto. 35:25) Buk McClintock and Strong’s Cyclopedia i tok: “Ol Hibru em ol lain tru bilong mekim musik.”

Musik long haus king. Ol king bilong Israel i save amamas long harim musik. King Sol i singautim Devit long i go stap long haus king na mekim musik long em. (1 Sml. 16:​18, 23) Bihain taim Devit yet i kamap king, em i wokim ol instramen bilong pilaim musik, em i raitim ol naispela song, na em i oganaisim lain bilong pilaim musik long tempel bilong Jehova. (2 Sto. 7:6; Amo. 6:5) King Solomon i gat ol man na ol meri bilong singsing i stap long haus bilong em.—Ekl. 2:8.

Musik long lotu. Bikpela samting tru, lain Israel i save yusim musik bilong lotuim Jehova. I gat olsem 4,000 man bilong pilaim musik long tempel long Jerusalem. (1 Sto. 23:5) Ol i save pilaim ol simbol, ol instramen i gat string, ol harp, na ol trampet. (2 Sto. 5:12) Tasol ol dispela man bilong mekim musik, i no ol tasol i save mekim musik bilong lotuim Jehova, nogat. I klia tru olsem planti manmeri Israel i save mekim ol Singsing Bilong Ol Man i Go Antap Long Taun long taim ol i mekim raun bilong ol i go long Jerusalem bilong mekim bung bilong lotu long olgeta yia. (Sng. 120-134) Na ol rait bilong ol Juda bilong bipo i stori olsem lain Israel i save mekim Singsing Halel a long taim bilong kaikai bilong Pasova.

Long nau, musik em i bikpela samting tu long ol wokman bilong God. (Jems 5:13) Yumi save mekim ol singsing olsem hap lotu bilong yumi. (Efe. 5:19) Musik i save helpim yumi long stap wanbel wantaim ol wanbilip Kristen. (Kol. 3:16) Na musik i save strongim yumi taim yumi karim ol hevi. (Apo. 16:25) Musik em naispela rot bilong soim olsem yumi bilip long Jehova na yumi laikim em.