Yu Save Long Dispela?

Wanem mining bilong tok Jisas i bin mekim long Sol olsem: “Yu wok long kikim stik i gat sap na dispela i givim hevi long yu”?​—Aposel 26:14.

▪ Long taim bilong ol man i bin raitim Baibel, ol fama i save yusim stik bilong stiaim ol animal i wok long brukim graun. Longpela bilong stik em inap olsem 2.5 mita. Ol i pasim ain i gat sap long wanpela sait bilong stik. Sapos animal i subim em yet i go pas long dispela ain, em inap kisim bagarap. Long narapela sait bilong stik planti taim ol i pasim ain olsem naip long en bilong rausim doti o graun samting i pas long ain bilong brukim graun.

Sampela taim ol i save yusim dispela stik long pait. Hetman na man bilong pait, em Samgar bilong lain Israel, em i bin kilim i dai 600 man Filistia long “wanpela liklik spia bilong hariapim ol bulmakau long wok.”​—Hetman 3:31.

Baibel i mekim tu tok piksa long dispela stik. Olsem: King Solomon i tok, ol tok bilong wanpela saveman i olsem “ol stik i gat sap” bilong stiaim poroman long wokim gutpela disisen.​—Saveman 12:11.

Jisas husat i kirap bek pinis i bin mekim wankain tok piksa. Em i tokim Sol, em man bilong bagarapim ol Kristen, long lusim pasin bilong “kikim stik i gat sap.” Dispela tok i makim pasin bilong wanpela bikhet animal long sakim stia bilong bosman bilong en. I gutpela tru olsem Sol i bin bihainim tok bilong Jisas na senisim pasin bilong em, na em i kamap aposel Pol.

Long taim bilong ol aposel, olsem wanem ol Juda inap makim ol aua long nait?

▪ Ol Juda long taim bilong ol aposel i save yusim san klok bilong save long taim bilong de. Tasol taim klaut i pasim san o long nait, ol i save yusim wanpela klepsidra, olsem klok bilong wara. Ol Isip, Persia, Grik, na Rom bilong bipo, ol tu i bin yusim dispela klok.

Buk The Jewish Encyclopedia i tok, buk Misna na buk Talmut i stori long klepsidra na “i kolim narapela narapela nem bilong en, ating em bilong makim sais na ol mak i stap long en, tasol olgeta i makim wanpela samting; olsem wara i lus isi isi​—olsem stilim​—em mining tru bilong dispela tok Grik ‘klepsidra.’”

Klepsidra i wok olsem wanem? Long rot bilong wanpela hul long kontena, wara i save lus isi isi i go insait long narapela kontena. Man inap lukim mak bilong wara insait long 2-pela kontena na em inap save long taim. Ating 2-pela kontena wantaim i gat ol mak long sait bilong ol bilong makim ol aua.

Ol kem bilong ami bilong Rom ol i save yusim kain klok olsem long nait bilong makim ol haptaim bilong was. Ol i winim biugel bilong makim olsem wanpela haptaim bilong was i pinis na narapela haptaim i kirap. Taim ol man i harim krai bilong biugel ol i save long kirap na pinis bilong dispela 4-pela haptaim bilong was long nait.​—Mak 13:35.