Mi bon long Moundsville, wanpela taun klostu long wara Ohio long hap not bilong West Virginia, long Amerika. Mi namba 2 bilong 4-pela pikinini​—mipela 3-pela pikinini man, olsem na mipela save amamas long mekim planti kain kain samting. Papamama bilong mi i save wok strong, bihainim onest pasin, na laikim tru ol narapela man. Mipela i no gat planti samting bilong skin, tasol oltaim mipela i gat ol samting mipela i nidim. Papamama bilong mi ol i Witnes Bilong Jehova, olsem na ol i traim bes long skulim mipela long ol stiatok bilong Baibel kirap long taim mipela i liklik yet.

Tasol taim mi tineja, bel i kirapim mi na mi lusim rot papamama i bin skulim mi long en. Mi ting pasin bilong bihainim ol stiatok bilong Baibel i no inap mekim mi stap amamas. Na mi ting pasin bilong stap fri long mekim olgeta samting mi laik mekim, em i rot bilong stap amamas tru. Bihain, mi no go moa long ol miting Kristen. Wanpela brata na susa bilong mi tu i mekim olsem. Papamama bilong mipela i traim olgeta samting ol inap mekim bilong helpim mipela, tasol mipela i sakim dispela.

Mi no luksave olsem fridom mi laik kisim i mekim na mi kalabus long kain kain samting. Wanpela de mi lusim skul na wokabaut i go long haus, na wanpela pren i givim smok long mi. Mi kisim. Kirap long dispela de, mi tok yes long planti pasin i save nogutim man. I no longtaim, mi kisim ol drak, dring planti alkohol, na mekim pasin pamuk. Inap sampela yia, mi kisim ol strongpela drak na mi kalabus long ol dispela drak. Mi insait tru long dispela pasin, na mi kirap salim ol drak bilong helpim dispela sindaun bilong mi.

Planti taim maus bilong bel i kotim mi olsem pasin mi mekim i no stret, tasol mi no laik tingim dispela. Mi pilim olsem mi nogut pinis na mi no inap senisim pasin bilong mi. Maski mi stap wantaim ol manmeri long ol pati na konset, planti taim mi bel hevi na pilim olsem mi stap wanpis. Sampela taim mi tingim gutpela pasin bilong papamama bilong mi na tingting long hau na pasin bilong mi i kamap nogut olsem.

Maski mi yet i ting olsem mi no inap senis, ol narapela i no gat dispela kain tingting. Long yia 2000, papamama i singautim mi long kam long kibung distrik bilong ol Witnes Bilong Jehova. Mi no gat laik long go, tasol mi go. Mi kirap nogut olsem bratasusa bilong mi em ol i bin bikhet, ol tu i kam long kibung.

Taim mi stap long kibung, mi tingim olsem inap 1-pela yia i go pinis, mi bin kam long wanpela rok konset long dispela seim ples. Ol samting mi lukim long kibung i narapela kain olgeta long konset mi bin go long en, na mi pilim tru dispela samting. Long konset, ples i pulap long pipia na smok tabak. Planti lain i kam long konset i no gat pasin pren, na musik i stori long ol samting nogut. Tasol long kibung, mi stap namel long ol manmeri i amamas tru​—ol i tok amamas long mi, maski ol i no bin lukim mi inap planti yia. Ples em kibung i kamap long en i klin, na ol tok i stori long ol gutpela samting bai kamap bihain. Taim mi lukim gutpela samting em tok i tru bilong Baibel i mekim long ol man, mi ting wai na mi bin lusim dispela samting!​—Aisaia 48:​17, 18.

Bihain stret long kibung, mi wokim disisen long kam bek long kongrigesen Kristen. Bratasusa bilong mi tu i pilim tru ol samting ol i lukim long kibung, na ol tu i laik kam bek. Mipela olgeta 3-pela i kirap stadi long Baibel.

Wanpela ves bilong Baibel mi pilim tru, em Jems 4:​8, em i tok: “Yupela i mas i go klostu long God, na em bai kam klostu long yupela.” Mi luksave olsem sapos mi laik i go klostu long God, mi mas lusim ol pasin nogut. Mi mas lusim smok, ol drak na alkohol.​—2 Korin 7:1.

Mi lusim ol olpela pren bilong mi na kisim ol nupela pren insait long lain i lotuim Jehova. Elda husat i stadi long Baibel wantaim mi, em i helpim mi tru. Planti taim em i ringim mi o kam lukim mi long haus bilong save mi stap orait o nogat. Kirap long dispela taim na i kam, em i wanpela gutpela pren tru bilong mi.

Long 2001, mi kisim baptais bilong makim olsem mi dediket pinis long God, na bratasusa bilong mi tu i mekim olsem. Papamama na liklik brata bilong mi husat i bin stap gut long Jehova, ol i pilim bikpela amamas tru taim famili bilong mipela i wanbel wantaim long lotuim Jehova.

Bipo mi bin ting ol stiatok bilong Baibel i strong tumas, tasol nau mi tingim ol i olsem gutpela samting bilong lukautim man. Baibel i givim strong long mi long lusim pasin bilong kisim na salim ol drak, na i helpim mi long kamap gutpela man.

Mi insait long wanpela lain bratasista i stap long olgeta hap bilong graun na i lotuim Jehova. Ol i save laikim tru narapela narapela, na ol i wanbel long lotuim God. (Jon 13:​34, 35) Mi bin kisim wanpela spesel blesing namel long dispela lain bratasista, em meri bilong mi, Adrianne, mi laikim em tumas. Pasin bilong mipela long lotuim Krieta bilong yumi, i givim bikpela amamas long mipela.

Mi no bihainim moa rot bilong inapim ol laik bilong mi yet, nau mi volantia long mekim wok bilong God fultaim, mi save lainim ol manmeri long rot bilong kisim helpim long Tok Bilong God. Dispela wok i bin givim nambawan bikpela amamas long mi. Mi inap tok tru olsem Baibel i bin senisim i stap bilong mi. Nau mi stap fri tru.