Mama i bin karim mi long liklik taun Texcoco. Long dispela taim, planti rot i no gat kolta na i gat planti das. Planti manmeri long ol viles i stap klostu ol i save kam wantaim ol donki bilong ol i karim ol traipela hip kago i kam long taun bilong salim. Long famili bilong mipela mi namba 7 bilong 9-pela pikinini. Mipela famili i stap rabis tru. Papa bilong mi i save samapim ol sandel i bruk na kisim mani bilong lukautim famili. Tasol em i dai taim mi gat 7-pela krismas. Kirap long dispela taim mama i wok hat tru long painim kaikai bilong famili.

Bubu man i save pilaim vaiolin na em i kondakta bilong wanpela lain bilong pilaim musik bilong lotu. Klostu olgeta long famili bilong mi i save pilaim wanpela musik. Mama i insait long grup bilong singim kwaia long haus lotu, na ankol bilong mi i save singsing long opera na em i save pilaim piano. Mipela save tingim lotu—mi mekim wok long alta, na mi gat bikpela laik long kamap misineri Katolik. Tasol mi save laikim tru ol karate muvi. Mi wok long lukim planti bilong dispela kain muvi na mi kisim pasin bilong belhat hariap na pait.

Long Puebla, mi go long wanpela skul bilong lotu i kain olsem semineri. Mi putim mak long kamap wanpela pris Katolik. Tasol long laspela yia bilong skul, mi les long Misin Katolik. Wanpela yangpela sister bilong lotu i laik pulim mi long mekim pasin pamuk wantaim em. Mi sakim dispela traim, tasol dispela samting i kirapim laik bilong mi long marit. Na tu, mi lukim olsem sampela pris ol i lain  bilong tupela maus. Bihain mi lusim dispela mak mi putim bilong kamap pris.

Mi kirap stadim musik long National Conservatory of Music long Mexico City. Taim mi grediuet, mi marit, na i no longtaim na mipela i gat 4-pela pikinini. Bilong kisim mani bilong lukautim famili, mi save singsing long taim bilong Misa long Katolik Sios.

Kirap long taim mipela i marit nupela, marit bilong mipela i gat hevi. Mi na meri bilong mi i save kros pait, long wanem, narapela i tingting nogut long narapela. Pastaim mipela save kros na tok pait, tasol bihain mipela save pait tru long han. Taim mipela i marit inap 13 yia pinis, mipela i seperet na bihain divos.

Taim mi stap yet wantaim meri bilong mi, mi bin bungim ol Witnes Bilong Jehova long namba 1 taim. Tupela Witnes i paitim dua na ol i laik toktok wantaim mi long Baibel. Mi ting mi gat bikpela save long lotu, olsem na mi laik kamapim klia olsem tok bilong ol i kranki. Mi givim ol strongpela askim long ol na mi ting ol i no inap bekim. Tasol mi kirap nogut olsem long olgeta taim ol i kamapim ol gutpela bekim em Baibel i as bilong en. Mi lukim olsem mi no gat bikpela save long lotu. Tasol meri bilong mi i no mekim gutpela pasin long ol Witnes, na tu, mi bisi tru, olsem na ol i no kam visitim mipela moa.

Faivpela yia bihain, mi sindaun wantaim narapela meri, nem bilong en Elvira, na mi bungim gen ol Witnes Bilong Jehova. Elvira i no biruaim ol Witnes, olsem na mi inap stadi long Baibel long olgeta wik. Tasol maski mi mekim olsem, mi wok strong inap sampela yia long senisim ol pasin bilong mi long bipo.

Mi save olsem sapos mi laik givim bel olgeta long lotuim Jehova, mi mas senisim pasin bilong mi. Pastaim mi mas lusim wok bilong mi long singsing long taim bilong Misa long Katolik Sios, na mi mas painim narapela rot bilong kisim mani. (Revelesen 18:4) Na tu, mi na Elvira i mas stretim marit bilong mipela long gavman.

Tasol wanpela senis mi hatwok tru long mekim, em long lain long bosim belhat bilong mi. Tupela ves bilong Baibel i bin helpim mi tru: Song 11:5 (NW), i soim olsem Jehova i heitim tru pasin pait, na 1 Pita 3:7, i skulim mi olsem, sapos mi laik bai Jehova i harim beten bilong mi, mi mas mekim gutpela pasin long meri bilong mi. Mi wok long tingim tingim long bel ol dispela ves na mi beten askim Jehova long helpim mi, na isi isi mi lusim pasin bilong mi long belhat.

Nau mi wantaim famili bilong mi i stap amamas. Mi wok strong long pas gut gen wantaim ol pikinini man bilong mi long fes marit na helpim famili bilong mi long nau long stap strong long bilip.

Taim mi pikinini yet, mi gat bikpela laik long kamap pris na helpim ol man. Nau mi pilim olsem i stap bilong mi i gat as tru bilong en. Bilong painim mani bilong lukautim famili, mi save skulim ol man long musik. Mi tenkyu tru long Jehova i no les kwik long mi, na em i givim rot long mi long senisim pasin bilong mi na kamap gutpela man!