Kingdom Bilong God em wanpela gavman long heven. Jisas i tokim ol disaipel bilong em long beten long dispela Kingdom i mas i kam, long wanem, dispela Kingdom bai kamapim stretpela pasin na pasin wanbel long graun. Kingdom Bilong God tasol bai pinisim pasin bilong pait na bagarapim man, wansait pasin, na olgeta kain sik. God i makim Pikinini bilong em Jisas long i stap olsem King bilong dispela Kingdom. Na tu, Jehova i makim sampela disaipel bilong Jisas long mekim wok king na jas wantaim em long heven.—Ritim Luk 11:2; 22:28-30.

Klostu nau, Kingdom Bilong God bai bagarapim ol man husat i no laik daun long wok bos bilong God. Olsem na taim yumi beten long Kingdom Bilong God i mas i kam, dispela i kamapim klia olsem yumi laik bai gavman bilong God i pinisim olgeta gavman bilong graun.—Ritim Daniel 7:13, 14; Revelesen 11:15, 18.

I stret Jisas i stap King, long wanem, em i save sori long ol man. Na tu, Jisas em i Pikinini Bilong God, olsem na em i gat strong long helpim ol man husat i laik bai God i helpim ol.—Ritim Song 72:8, 12-14.

Olgeta man husat i beten long Kingdom Bilong God i mas kam na ol i bihainim laik bilong God, ol bai kisim blesing long rot bilong dispela Kingdom. Bai yu amamas long kisim save long Kingdom Bilong God long rot bilong Baibel.—Ritim Luk 18:16, 17; Jon 4:23.