Olsem yumi bin skelim long atikol i kamap paslain, nambawan wok Jisas i mekim em long “autim gutnius bilong Kingdom bilong God.” (Luk 8:1) Jisas i mas wokabaut inap planti handret kilomita long olgeta hap bilong Israel long skulim ol man long Kingdom Bilong God. Dispela i soim olsem em i givim bel long mekim dispela wok. Fopela Gutnius i stori long wok autim tok bilong Jisas, na winim 100 taim samting ol i stori long Kingdom. Planti taim Jisas yet i mekim ol dispela tok, tasol i luk olsem Ol Gutnius i no kamapim olgeta tok Jisas i mekim long Kingdom Bilong God taim em i stap long graun!—Jon 21:25.

Taim Jisas i stap long graun, bilong wanem em i tingim Kingdom olsem bikpela samting? Wanpela as em olsem, Jisas i save olsem God i makim em long stap olsem Hetman bilong dispela Kingdom. (Aisaia 9:6; Luk 22:28-30) Tasol Jisas i no tingting long kisim biknem na namba, nogat. (Matyu 11:29; Mak 10:17, 18) Em i autim tok bilong Kingdom, long wanem, em i tingim ol samting Kingdom Bilong God a bai mekim long helpim Papa bilong em long heven na ol man husat i bihainim laik bilong em.

Jisas i laikim tru Papa bilong em long heven. (Sindaun 8:30; Jon 14:31) Em i laikim ol gutpela pasin bilong Papa, olsem pasin laikim, pasin sori, na stretpela pasin bilong em. (Lo 32:4; Aisaia 49:15; 1 Jon 4:8) Olsem na yumi ken ting Jisas i no laik tru long harim ol giaman stori long Papa bilong em, olsem God i save givim pen na hevi long ol man. Jisas i save olsem klostu nau Kingdom bai stretim bek gutnem bilong Papa bilong em, dispela em wanpela risen na Jisas i bin givim bel tru long “autim gutnius bilong kingdom bilong God.” (Matyu 4:23; 6:9, 10) Olsem wanem Kingdom bai stretim bek gutnem bilong Papa?

Long rot bilong Kingdom, Jehova bai mekim ol bikpela senis bilong helpim ol manmeri. “Em bai mekim drai aiwara i stap long ai bilong ol” man i stap gut long em. Na tu, Jehova bai pinisim olgeta samting we i givim pen na hevi long ol man, na ol man bai i no “dai moa, na ol bai i no bel hevi na krai moa, na ol bai i no inap pilim pen gen.” (Revelesen 21:3, 4) Long rot bilong Kingdom, God bai pinisim olgeta pen na hevi bilong ol man. b

 Olsem na i gat gutpela risen na Jisas i amamas long tokim ol man long Kingdom! Em i save olsem Kingdom bai kamapim long ples klia olsem Papa bilong em, em God i gat olgeta strong na em i gat pasin sori. (Jems 5:11) Na tu, Jisas i save olsem dispela Kingdom inap helpim ol man em i laikim tumas, em ol stretpela manmeri.

Paslain long Jisas i kam long graun, em i stap long heven wantaim Papa bilong em. Pikinini i helpim Papa long wokim olgeta samting i stap long graun na long ples antap. Olsem, em i wokim ol man na ol animal, na planti bilion sta na galaksi samting. (Kolosi 1:15, 16) Tasol long olgeta samting Papa na Pikinini i wokim, Jisas i “amamas long lukim dispela graun na ol manmeri i stap long en.”—Sindaun 8:30, 31.

Pasin laikim bilong Jisas i kirapim em long mekim wok autim tok. Taim em i stap long graun, Jisas i kamapim klia olsem em i kam long “autim gutnius” long ol man i nidim helpim. (Luk 4:18) Tasol Jisas i no tok tasol olsem em i laik helpim ol man, nogat. Long olgeta taim, em i mekim ol samting bilong soim pasin laikim bilong em. Olsem, taim bikpela lain manmeri i bung long harim tok bilong Jisas, em i “sori tru long ol na em i mekim orait ol sikman bilong ol.” (Matyu 14:14) Narapela taim, wanpela man i gat sik lepra i tokim Jisas olsem em i bilip olsem Jisas inap oraitim em. Jisas i pilim tru hevi bilong em, olsem na em i tokim dispela lepraman: “Mi laik. Yu ken kamap klin.” (Luk 5:12, 13) Na taim Jisas i lukim pren bilong em Maria i krai, long wanem, brata bilong em Lasarus i dai, Jisas i “sori tru na em i wari” na ‘aiwara bilong em i pundaun.’ (Jon 11:32-36) Olsem na Jisas i wokim mirakel, em i kirapim bek Lasarus maski em i dai inap 4-pela de pinis!—Jon 11:38-44.

Maski Jisas i helpim ol, em i save olsem ol dispela hevi inap painim ol gen. Olsem, ol man em i oraitim bai sik gen na ol man em i kirapim bek, ol bai stap sotpela taim na bihain ol bai dai. Tasol Jisas i save olsem Kingdom Bilong God bai pinisim sik, dai, na ol narapela hevi inap oltaim. Em as na Jisas i wokim ol mirakel, na tu, em i givim bel tru long “autim gutnius bilong Kingdom.” (Matyu 9:35) Ol mirakel Jisas i wokim i soim sampela tasol bilong ol gutpela samting Kingdom Bilong God bai mekim long graun olgeta. Skelim ol tok promis Baibel i mekim long ol samting bai kamap long bihain.

•  Ol man bai i no sik moa.

  “Orait na ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas. Na ol wara bai i kamap long ples wesan nating na ran i go long olgeta hap.” Na tu, “i no gat man . . . bai i tok olsem, ‘Mi gat sik.’”—Aisaia 33:24; 35:5, 6.

• Nogat moa dai.

  “Ol stretpela man bai i kisim graun God i givim ol, na bai ol i stap oltaim long en.”—Song 37:29.

  “Em bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.”—Aisaia 25:8.

• Ol man i dai pinis bai kirap bek.

  “Olgeta man i stap long matmat ol bai harim nek bilong Pikinini na kam ausait.” —Jon 5:28, 29.

  “Bai i gat kirap bek bilong ol man i dai pinis.”—Aposel 24:15.

• Ol man bai wok na i gat haus bilong ol yet.

  “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring. . . . Na bai ol i amamas long ol samting ol yet i bin hatwok long kamapim.”—Aisaia 65:21, 22.

•  Bai i no gat moa ol woa.

  “Em i save mekim i dai pait long olgeta hap graun.”—Song 46:9.

  “Na olgeta lain manmeri bai i no ken pait moa, na bai ol i no skul moa long pait.”—Aisaia 2:4.

• Ol man bai i no sot long kaikai.

  “Planti gutpela kaikai i kamap pinis long graun bilong mipela. God, em i God bilong mipela, em i bin mekim gut tru long mipela.”—Song 67:6.

  “Planti rais na wit samting i ken kamap long ol gaden bilong ol manmeri.”—Song 72:16.

• Ol man bai i no stap rabis moa.

  “Oltaim God i no save lusim tingting long ol rabisman.”—Song 9:18.

  “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.”—Song 72:12, 13.

Taim yu skelim ol dispela tok promis long ol samting Kingdom Bilong God bai mekim, yu inap save long risen na Kingdom i bikpela samting long Jisas. Taim Jisas i stap long graun, em i amamas long skulim ol man long Kingdom Bilong God, long wanem, em i save olsem Kingdom bai pinisim olgeta pen na hevi i stap long nau.

Yu amamas long tok Baibel i mekim long Kingdom? Olsem wanem yu inap kisim sampela save moa long Kingdom? Na yu mas mekim wanem na bai yu inap kisim ol blesing em Kingdom bai kamapim? Neks atikol bai bekim ol dispela askim.