Mi go bikpela long Ancram, em wanpela liklik taun long hap not bilong New York long Amerika. Dispela taun i gat planti fam bilong lukautim ol bulmakau bilong kisim milk na sis samting. Namba bilong ol bulmakau i winim namba bilong ol manmeri long dispela taun.

I gat wanpela haus lotu tasol long taun, na famili bilong mi i save go lotu long dispela hap. Long olgeta Sande moning, bubu man i save polisim su bilong mi na bai mi inap go long Sande skul. Na tu, bubu meri i givim mi wanpela liklik waitpela Baibel em mi save kisim i go wantaim mi. Mi na ol bratasusa bilong mi i save mekim gut ol wok, soim rispek long ol neiba na helpim ol, na tu, mipela i gat pasin bilong tenkyu long ol gutpela samting i kamap long mipela.

Taim mi go bikpela mi kamap tisa, olsem na mi lusim famili na i go stap mi yet. Mi gat planti askim long God na i stap bilong yumi ol man. Sampela sumatin bilong mi i kisim save kwik na sampela nogat, tasol ol i save wok hat long skul. Sampela pikinini i gat sik long bodi na skin i no strong, tasol ol narapela i gat gutpela helt, olsem na ol i insait long pilai ol spot samting. Dispela i mekim na mi save tingting planti. Sampela taim papamama bilong ol pikinini i gat hevi long skin o ol i hatwok long kisim save i mekim kain tok olsem: “Em laik bilong God na pikinini i kamap olsem.” Tasol mi save tingting, bilong wanem God i larim sampela pikinini i bon wantaim sampela kain sik o bagarap long bodi maski ol i no bin mekim rong.

Na tu, mi tingting olsem, ‘Mi mas mekim wanem na bai laip bilong mi i gat as bilong en?’ Mi pilim olsem laip bilong mi i no longpela tumas. Mi go bikpela insait long gutpela famili, mi go long ol gutpela skul, na nau mi mekim wanpela wok mi laikim tru. Tasol ol dispela samting i no helpim mi long stap amamas tru. Pastaim mi ting mi inap marit na baim wanpela gutpela haus, kamapim ol pikinini, na mekim wok mani i go inap long mi ritaia. Na taim mi go lapun bai mi stap long haus bilong lukautim ol lapun. Ol dispela samting i mekim na mi tingting planti long as bilong i stap bilong ol man.

Wanpela taim mi go  raun long Yurop wantaim sampela wanwok bilong mi. Mipela i go visitim ol bikpela haus lotu olsem Westminster Abbey, Notre-Dame de Paris, Vatiken, na ol narapela liklik haus lotu. Mi save kamapim planti askim long ol samting mi lukim. Taim mi go bek long Sloatsburg, New York, mi go tu long sampela haus lotu. Tasol i no gat man inap bekim gut ol askim bilong mi.

Wanpela taim, wanpela sumatin i gat 12-pela krismas i givim tripela askim long mi. Namba 1, em i tok, ‘Yu save olsem mi wanpela Witnes Bilong Jehova?’ Mi tok yes, mi save. Namba 2, em i tok, ‘Yu laik kisim sampela save moa long ol Witnes Bilong Jehova?’ Mi tok yes, mi laik kisim save long ol Witnes. Na namba 3, em i askim long hap mi stap long en. Mi tokim em long ples mi stap long en na em i luksave olsem haus bilong mipela i stap klostu long narapela narapela. Long dispela taim mi no ting ol askim dispela liklik meri i givim long mi bai senisim i stap bilong mi.

Bihain dispela liklik meri i raidim baisikol i kam long haus bilong mi na em i kirapim Baibel stadi wantaim mi. Mi kamapim ol askim em mi bin givim long planti bikman bilong lotu. Na mi kirap nogut olsem em i yusim Baibel bilong mi long kamapim ol bekim i klia tru, em ol bekim mi no bin save long en bipo!

Save mi kisim long rot bilong Baibel i mekim mi i stap amamas tru. Mi kirap nogut long tok bilong 1 Jon 5:19, em i tok: “Dispela graun olgeta i stap long han bilong Satan.” Na mi belgut tru taim mi kisim save olsem Satan i as bilong olgeta pen na hevi i painim yumi, na God i no as bilong en. Na tu, mi kisim save olsem klostu nau God bai pinisim olgeta hevi bilong yumi. (Revelesen 21:3, 4) Mi luksave olsem mi inap kliagut long ol tok bilong Baibel taim wanpela i stori gut wantaim mi. Maski dispela Witnes husat i stadi wantaim mi i gat 12-pela krismas tasol, em i kamapim gut ol tok na dispela i helpim mi long luksave olsem mi kisim save long tok i tru.

Maski i olsem, mi laik save ol Witnes i save bihainim ol tok ol i autim long ol man o nogat. Dispela liklik meri i tok ol Kristen tru i save kamapim pasin bilong i no les kwik na ol i save mekim gutpela pasin long ol narapela. (Galesia 5:22, 23) Mi laik save sapos em i save bihainim ol dispela pasin o nogat. Olsem na wanpela taim mi go leit liklik long stadi. Mi tingting: ‘Bai em i wetim mi o nogat? Na em bai kros olsem mi go leit?’ Taim mi go kamap long haus, mi lukim em i wet long dua. Em i ran i kam na tok: “Klostu mi laik go long haus na tokim mama olsem mipela i mas ringim haus sik na polis na bai mipela i ken save yu stap orait o nogat, long wanem, yu no save kam leit long stadi. Man! Mi wari stret long yu!”

Long narapela taim, mi givim wanpela askim na mi ting em i no inap long bekim dispela askim. Mi laik save em bai kolim nating wanpela bekim o nogat. Taim mi givim askim long em, em i lukluk long mi na i tok: “Dispela em i strongpela askim. Bai mi raitim long pepa na askim papamama bilong mi.” Em i truim tok bilong em na taim em i kam bek bilong mekim stadi, em i karim wanpela Wastaua we i gat bekim bilong dispela askim. Mi laikim dispela pasin bilong ol Witnes long mekim wok painimaut, na tu, ol buk na nius bilong ol i kamapim ol tok bilong Baibel i bekim olgeta askim bilong mi. Dispela liklik meri i stadi wantaim mi na wanpela yia bihain mi kisim baptais olsem wanpela Witnes Bilong Jehova. a

Taim mi kisim ol gutpela bekim bilong ol askim bilong mi, mi amamas long stori wantaim ol arapela long ol dispela save. (Matyu 12:35) Pastaim famili bilong mi i birua long nupela bilip bilong mi, tasol bihain ol i senisim tingting na rispektim bilip bilong mi. Klostu long taim mama i dai, em i kirap stadi long Baibel. Tru, em i dai paslain long em i kisim baptais, tasol mi save olsem em i tingting pinis long mekim wok bilong Jehova.

Long 1978, mi maritim Elias Kazan em wanpela Witnes. Na long 1981, ol i singautim mitupela Elias long i go wok long Betel long Amerika. b Tasol sori tru, mipela i mekim wok long Betel inap 4-pela yia tasol, na Elias i dai. Maski mi stap wanpis, mi givim bel long mekim wok long Betel na dispela i helpim mi long stap bel isi.

Long 2006, mi maritim Richard Eldred, em tu i mekim wok long Betel. Mitupela Richard i amamas yet long mekim wok long Betel. Nau mi save long ol tok i tru bilong God, olsem na mi pilim tru olsem mi painim bekim bilong ol askim bilong mi. Na tu, nau mi save olsem i stap bilong mi i gat as bilong en. Long rot bilong 3-pela askim wanpela liklik meri i bin givim long mi, mi kisim save long rot bilong i stap amamas tru.