Solomon i wokim tempel bilong Jerusalem antap long wanpela liklik maunten, na em i wokim ol banis i go antap tru long hap is na wes na bai ples i stret wantaim ples holi. Herot i laik wokim wanpela tempel i gutpela moa, olsem na em i wokim bikpela tempel winim bilong Solomon.

Ol ensinia bilong Herot i skruim ol ples stret bilong hap not na bai dispela hap we tempel i stap long en i ken go bikpela. Na long hap saut, ol i wokim pletfom i go bikpela inap 32 mita. Bilong mekim olsem, ol i wokim ol pos ston bilong banisim dispela tempel. Long sampela hap, longpela bilong dispela banis em inap olsem 50 mita.

Herot i no laik mekim ol samting bilong bagarapim bel bilong ol Juda, na tu, em i no laik pasim ol long givim ol ofa na mekim lotu. Josifas em saveman bilong Juda i tok Herot i skulim tu ol pris long katim ol ston na mekim wok kapenta, na bai ol man nating i no ken wok long ples holi.

Herot i dai paslain long wok bilong sanapim gen tempel i pinis. Long yia 30 C.E., ol i wok yet long mekim dispela wok inap 46 yia. (Jon 2:20) Agripa Namba 2, em tumbuna pikinini bilong Herot i pinisim wok bilong sanapim tempel long yia 50 C.E. samting.

Ating sampela man long ailan Malta i bihainim tingting bilong lotu Grik. Tingim stori long buk Aposel long samting i kamap long Pol taim sip em i kalap long en i bagarap long Malta. Taim em i bungim ol liklik han diwai na putim antap long paia bilong hatim skin bilong em na ol poroman bilong en, wanpela snek i kaikai han bilong en. Olsem na ol man long ailan i tok: “Em mas wanpela kilman, maski em i no i dai long solwara, em i kisim strafe i stret long em na em i no inap stap laip.”—Aposel 28:4.

Dispela tok “stretpela pasin” long tok Grik ol i kolim olsem“di’ke.” Dispela tok inap makim tingting ol man i gat taim ol i lukim wanpela samting ol i ting i stret. Long ol stori nating bilong ol Grik, Dike em nem bilong god meri bilong stretpela pasin. Ol man i ting dispela god meri i save tokim Sus long ol pasin nogut bilong ol man na bai em i ken panisim ol. Wanpela buk i tok ating ol man bilong Malta i ting olsem: “Maski Pol i abrusim bagarap long solwara, god meri Dike i mekim save long em . . . long rot bilong snek.” Tasol ol i senisim tingting taim ol i luksave olsem posin bilong snek i no kilim i dai Pol.