Namel long yia 1990 na 2015 long Amerika, namba bilong ol marit i gat 50 krismas i kisim divos em i go antap inap tupela taim moa, na ol marit i winim 65 krismas i kisim divos i go antap inap tripela taim moa. Ol man bilong mekim wok painimaut i kamapim dispela hap tok “grei divos” bilong makim lain i gat bikpela krismas i kisim divos i wok long go bikpela. Wanem samting i kamapim “grei divos”? Yu ken mekim wanem na dispela i no ken kamap long marit bilong yu?

Long dispela atikol

•  Wanem ol samting i kamapim grei divos?

•  Samting yu ken mekim

•  Ol askim bilong toktok wantaim

•    Planti taim, ol marit husat i gat bikpela krismas i kisim divos bikos isi isi pasin pren bilong ol i wok long pinis. Bihain long sampela haptaim, sampela maritman na maritmeri i kisim narapela narapela laik na i luk olsem ol i no gat wankain laik long planti samting. O bihain long ol pikinini i lusim haus, tupela marit inap luksave olsem ol i mekim wok olsem papa na mama inap planti yia na ol i lusim tinging long pasin bilong stap olsem maritman na maritmeri.

•    Long nau, ol saveman i tokim ol poroman marit long tingim ol yet. ‘Olsem wanem? Marit bilong mi i mekim mi amamas?’ ‘Marit bilong mi i helpim mi long kamap gutpela man?’ ‘Poroman marit bilong mi i save mekim isi bel na tingting bilong mi?’ Sapos nogat, long nau ol man i tingting olsem, yu mas mekim samting i gutpela moa long yu—kisim divos na kirapim nupela sindaun.

•   Planti man i no tingim moa divos olsem samting nogut. Saveman Eric Klinenberg i tok: “I no longtaim i go pinis, sapos wanpela husat i no amamas long poroman marit bilong em na i laik kisim divos, em i mas gat gutpela risen. Long nau em narapela kain: Sapos marit i no inapim laik bilong yu, i mas i gat gutpela risen long yu stap gut yet long dispela marit, bikos planti manmeri long nau i ting olsem em i bikpela samting long mekim wanem samting i gutpela long yu yet.” a

 Tru tumas, planti taim divos i pinisim wanpela hevi, tasol em i kamapim ol nupela hevi. Olsem, wanpela wok painimaut i kamapim olsem “planti taim grei divos i kamapim hevi bilong mani, moa yet long ol meri.”

 Tasol i gat narapela samting yumi mas tingim. Buk Don’t Divorce i tok: “Yu ken statim nupela sindaun tasol yu bai i stap wankain yet. Wanem samting yu bin mekim bilong senisim pasin bilong yu long toktok wantaim poroman marit bilong yu? Wanem samting yu bin mekim bilong senisim pasin yu save mekim taim kros i kamap?” b

•   Redi long senis. Senis i save kamap long pasin pren. Ating pasin pren bilong yu wantaim poroman marit inap senis taim ol pikinini i lusim yupela o yupela kirap long laikim narapela narapela samting. Tasol no ken tingim olsem i gutpela sapos ol samting i stap wankain olsem long pastaim, tingim hau yu inap mekim ol samting i kamap gutpela moa long nau.

   Stiatok bilong Baibel: “No ken tok, ‘Wai na taim bipo i gutpela moa winim dispela taim nau?’ Bikos em i no savetingting long yu askim olsem.”​—Eklisiastis 7:10.

•   Strongim pasin pren bilong yu wantaim poroman marit. Yu ken laikim samting em poroman marit bilong yu i laikim, o helpim poroman marit bilong yu long laikim samting yu laikim. Lusim sampela haptaim long mekim nupela samting em yutupela i amamas long mekim. Putim mak long lusim sampela haptaim wantaim na bai yupela i pilim olsem yupela i stap olsem ol marit na i no olsem ol rumeit.

   Stiatok bilong Baibel: “Olgeta wan wan i mas wok long tingim ol samting bilong helpim narapela, na ol i no ken tingting long ol samting bilong helpim ol yet.”​—1 Korin 10:24.

•   Wok yet long soim gutpela pasin. Wok yet long soim rispek na no ken ting yupela i stap longpela taim pinis na no gat wok long mekim. Toktok long poroman marit bilong yu long pasin rispek, na mekim ol pasin em yu bin mekim taim yutupela bin pren long fes taim. Yu ken mekim ol kain tok olsem “plis” na “tenkyu.” Oltaim mekim pasin olsem yu laikim em tru, na soim olsem yu tenkyu long ol samting em i mekim long yu.

   Stiatok bilong Baibel: “Mekim pasin helpim long narapela narapela, na sori tru long ol.”​—Efesus 4:32.

•   Tingim ol gutpela taim yutupela i stap wantaim. Lukim ol weding poto wantaim o ol poto bilong ol narapela bung em yutupela i bin stap wantaim. Dispela bai helpim yupela long strongim—o kisim bek—pasin laikim na rispek insait long marit.

   Stiatok bilong Baibel: “Olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong em.”​—Efesus 5:33.