Maikel, em sampela lotu i kolim olsem “Santu Maikel,” em nem bilong Jisas long heven, paslain long em i kam long graun na bihain long em i lusim graun na go bek long heven. a Maikel i bin tok pait wantaim Satan bihain long dai bilong Moses, na em i bin helpim wanpela ensel long bringim tok bilong God i go long profet Daniel. (Daniel 10:13, 21; Jut 9) Maikel i mekim ol samting i stret wantaim mining bilong nem bilong em​—“Husat i Wankain Olsem God?”​—taim em i sambai long wok bos bilong God na pait long ol birua bilong God.​—Daniel 12:1; Revelesen 12:7.

 Yumi ken skelim ol risen i kamapim klia olsem i stret long tok Jisas em i dispela nambawan ensel Maikel.

•   Maikel em “nambawan ensel.” (Jut 9) Dispela biknem “nambawan ensel,” i makim “nambawan bilong ol ensel,” na dispela biknem i stap long tupela ves tasol bilong Baibel. Taim dispela tupela ves i tok long “nambawan ensel,” ol i tok long wanpela ensel tasol, dispela i kamapim klia olsem wanpela ensel tasol i holim dispela biknem. Wanpela bilong dispela tupela ves i stori long Jisas husat i bin kirap bek na go bek long heven olsem em “bai lusim heven na kam daun wantaim strongpela singaut, na wantaim nek bilong nambawan ensel.” (1 Tesalonaika 4:​16) Jisas i gat “nek bilong nambawan ensel” bikos em tasol em dispela nambawan ensel, Maikel.

•   Maikel em lida bilong lain ami, em ol ensel. “Maikel na ol ensel bilong em i pait wantaim dispela traipela snek,” Satan. (Revelesen 12:7) Maikel i holim bikpela namba long heven bikos Baibel i kolim em olsem “wanpela bilong ol nambawan prins” na “nambawan prins.” (Daniel 10:13, 21; 12:1) Wanpela saveman bilong Nupela Testamen, em David E. Aune, em i tok ol dispela biknem i makim olsem Maikel em “komanda bilong ol lain ensel.”

   Baibel i kolim narapela nem long lida bilong planti lain ensel. Baibel i stori olsem “Bikpela Jisas i kamap ples klia long heven wantaim ol strongpela ensel bilong em. Em bai kam wantaim paia i lait, taim em i bekim rong.” (2 Tesalonaika 1:​7, 8; Matyu 16:27) Jisas “i go long heven na . . . God i putim ol ensel na olgeta lain i gat namba na olgeta samting i gat strong i stap aninit long em.” (1 Pita 3:​21, 22) I no stret long ting olsem God i makim Jisas lida bilong wanpela lain ami bilong ol ensel na Maikel lida bilong narapela lain ami bilong ol ensel. Nogat. I stret long tok olsem dispela tupela nem, Jisas na Maikel, i makim wankain man tasol.

•   Maikel “bai kirap sanap” long wanpela narapela kain haptaim, em “taim bilong bikpela hevi.” (Daniel 12:1) Long Buk Daniel, planti taim dispela tok “kirap sanap” i makim olsem king i sanap bilong redi long mekim wanpela spesel wok. (Daniel 11:​2-4, 21) Jisas Krais, em Baibel i kolim em olsem “Tok Bilong God,” em bai mekim spesel wok olsem “King bilong olgeta king” na pinisim tru olgeta birua bilong God na sambai long lain manmeri bilong God. (Revelesen 19:11-​16) Em bai mekim dispela wok long taim bilong “traipela hevi tru,” em haptaim we “kirap long taim God i wokim graun na i kam inap long nau, kain hevi olsem i no bin kamap.”​—Matyu 24:21, 42.