Pait bilong Armagedon em laspela pait namel long ol gavman bilong graun na God. Ol dispela gavman na ol sapota bilong ol i birua long God, na long nau tu ol i no laik stap aninit long wok bos bilong God. (Buk Song 2:2) Pait bilong Armagedon bai pinisim wok bos bilong ol man.​—Daniel 2:​44.

 Dispela tok “Armagedon” i stap wanpela taim tasol long Baibel, long Revelesen 16:16. Buk Revelesen i tok profet “long dispela ples long tok Hibru ol i kolim Armagedon,” “ol king bilong olgeta hap graun” bai bung wantaim “long i go long pait long dispela bikpela de bilong God i Gat Olgeta Strong.”​—Revelesen 16:14.

 Husat bai pait long Armagedon? Jisas Krais bai go pas long lain ami bilong heven na ol bai pait long ol birua bilong God na winim ol. (Revelesen 19:11-​16, 19-​21) Ol dispela birua i makim ol man i birua long wok bos bilong God na i no rispektim God.​—Esekiel 39:7.

 Pait bilong Armagedon bai kamap long hap bilong Midel Is? Nogat. Armagedon bai kamap long olgeta hap bilong graun na i no long wanpela hap tasol.​—Jeremaia 25:32-​34; Esekiel 39:17-​20.

 Sampela taim ol i kolim dispela tok Armagedon olsem, “Har–​Magedon” (Hibru Har Meghiddohnʹ), na em i makim “Maunten Bilong Megido.” Megido em wanpela taun long Israel bilong bipo. Ol samting bilong bipo i soim olsem Megido em wanpela ples we ol bikpela pait i bin kamap long dispela hap, na Baibel tu i stori long sampela pait i bin kamap long hap. (Hetman 5:​19, 20; 2 King 9:​27; 23:29) Tasol Armagedon i no makim dispela ples i stap long bipo klostu long Megido. Nogat. I no gat wanpela bikpela maunten long dispela hap, na tu, hap bilong Ples Daun Bilong Jesril em i no bikpela inap long olgeta king i laik pait long God i ken kam bung long dispela hap. Olsem na Armagedon bai kamap long olgeta hap bilong graun we ol kantri bai bung wantaim na mekim laspela pait long God.

 Ol samting long graun bai stap olsem wanem long taim bilong pait bilong Armagedon? Yumi no save olsem wanem God bai yusim strong bilong em, tasol em bai yusim ol samting bilong pait olsem em i bin yusim long bipo​—ren ais, bikpela guria, bikpela ren na tait wara, paia na salfa, laitning, na ol sik. (Jop 38:22, 23; Esekiel 38:19, 22; Habakuk 3:​10, 11; Sekaraia 14:12) Ol birua bilong God bai paul na sampela bilong ol bai kilim narapela narapela, na ol bai luksave olsem God i pait long ol.​—Esekiel 38:21, 23; Sekaraia 14:13.

 Armagedon bai pinisim dispela graun? Nogat. Graun bai i no inap pinis bikos graun em ples bilong ol manmeri i ken i stap long en inap oltaim oltaim. (Buk Song 37:29; 96:10; Eklisiastis 1:4) Armagedon bai i no inap bagarapim olgeta manmeri, nogat. Em bai opim rot long ol wokman bilong God em “bikpela lain manmeri” long abrusim dispela bagarap.​—Revelesen 7:​9, 14; Buk Song 37:34.

 Sampela taim dispela tok “graun ” long Baibel i makim ol man nogut long graun i sakim tok bilong God. (1 Jon 2:​15-​17) Olsem na yumi ken tok, Armagedon bai “pinisim dispela graun.”​—Matyu 24:3, King James Version.

 Wanem taim bai Armagedon kamap? Taim Jisas i stori long “traipela hevi tru” we bai kirapim pait bilong Armagedon, Jisas i tok: “I no gat wanpela man i save long dispela de na dispela aua, ol ensel long heven i no save, na Pikinini tu i no save, Papa tasol i save.” (Matyu 24:21, 36) Maski i olsem, Baibel i soim olsem Armagedon bai kamap long taim Jisas i kam i stap, dispela haptaim i kirap long 1914.​—Matyu 24:37-​39.