Yes, Devil em wanpela man i stap tru. Em i “hetman bilong dispela graun,” em i wanpela spirit i bin kamap man nogut na bikhet long God. (Jon 14:30; Efesus 6:11, 12) Baibel i kamapim klia pasin bilong Devil long rot bilong ol dispela nem na pasin bilong em:

•   Satan, mining bilong en “Birua.”​—Jop 1:6.

•   Devil, mining bilong en “Man Bilong Krungutim Gutnem.”​—Revelesen 12:9.

•   Snek, long Baibel em min olsem “Man Bilong Giaman.”​—2 Korin 11:3.

•   Man Bilong Traim Man.​—Matyu 4:3.

•   Man Bilong Giaman.​—Jon 8:44.

Em i no wanpela pasin nogut

 Sampela man i tingim Satan, dispela Devil, olsem wanpela pasin nogut i stap insait long yumi. Tasol Baibel i stori long toktok i bin kamap namel long God na Satan. God i gutpela olgeta, so em i no inap toktok long wanpela pasin nogut i stap insait long em yet, nogat. (Lo 32:4; Jop 2:1-6) Na tu, Satan i bin traim Jisas, em man i no gat sin. (Matyu 4:8-10; 1 Jon 3:5) Olsem na Baibel i kamapim klia olsem Devil em man i stap tru na em i no wanpela pasin nogut.

 Yu ting yumi mas kirap nogut olsem planti man i no bilip olsem Devil em wanpela man i stap tru? Nogat, bikos Baibel i tok Satan i yusim pasin giaman bilong inapim ol samting em i laik mekim. (2 Tesalonaika 2:9, 10) Wanpela bilong ol pasin trik bilong em, em long pasim tingting bilong ol man na bai ol i no ken save olsem em i stap tru.​—2 Korin 4:4.

 Stori tru: Tok Hibru em sampela Baibel i tanim olsem “Lusifa” i min olsem “sta i lait tumas.” (Aisaia 14:12) Ol tok i stap klostu long ves i makim olsem dispela tok i makim kingdom, o lain king bilong Babilon, em God i bin daunim tru ol bikos long pasin antap bilong ol. (Aisaia 14:4, 13-20) Baibel i yusim dispela tok “sta i lait tumas” bilong tok bilas long king bilong Babilon bihain long em i pundaun.

 Stori tru: Devil em birua bilong God, i no wokman bilong em. Satan dispela Devil i birua na sutim tok giaman long ol manmeri i lotuim God.​—1 Pita 5:8; Revelesen 12:10.