ASKIM BILONG OL YANGPELA
Hau Bai Mi Daunim Pasin Bilong Sem?
Nius nogut: Pasin bilong sem inap mekim na yu no painim ol gutpela pren na kisim save long ol samting.
Gutpela nius: Sampela taim pasin bilong sem bai helpim yu. Em inap helpim yu long tingting gut paslain long yu toktok na yu inap lukluk na harim gut.
Nius i gutpela moa: Bihain pasin bilong sem bai pinis, so yu ken daunim ol samting nogut we dispela pasin i save kamapim. Dispela atikol bai stori long hau yu inap mekim olsem.
Kliagut long samting yu pret long en
Pasin bilong sem inap mekim na taim yu tingim tasol olsem yu bai toktok wantaim ol narapela, dispela i mekim na yu pret. Dispela inap mekim na yu pilim wanpis, i olsem yu stap wanpis long rum i tudak. Dispela inap mekim yu pret. Tasol sapos yu kliagut long ol samting yu pret long en, bai yu lukim olsem i no gat gutpela risen long pret. Skelim 3-pela eksampel.
Pret #1: “Mi no save bai mi stori long wanem samting.”
Samting tru: Ol manmeri i save tingim samting yu mekim long ol na ol i no tingim tumas tok bilong yu. Yu inap daunim pasin bilong pret taim yu wok long kisim pasin bilong putim gut yau, na yu gat laik long harim tok ol narapela bai mekim.
Samting bilong tingim: Yu laikim wanem kain pren—wanpela husat i save toktok planti o wanpela husat i save putim gut yau?
Pret #2: “Ol manmeri bai ting mi wanpela skin dai man o meri.”
Samting tru: Ol manmeri bai gat narapela narapela tingting long yu maski yu gat pasin bilong sem o nogat. Yu inap daunim pret bilong yu—na helpim ol manmeri long holim stretpela tingting long yu—sapos yu mekim ol samting bilong soim olsem yu wanem kain man o meri tru.
Samting bilong tingim: Sapos yu ting olgeta i tingim yu olsem man o meri nogut, ating yu yet i wok long skelim ol?
Pret #3: “Mi bai sem sapos mi mekim tok kranki.”
Samting tru: Sampela taim, dispela i save kamap long olgeta man. Yu inap daunim pret bilong yu taim yu tingim ol popaia bilong yu olsem samting bilong soim olsem yu no gutpela olgeta.
Samting bilong tingim: Olsem wanem? Yu amamas long stap wantaim ol manmeri husat i save tokaut olsem ol i no gutpela olgeta?
Yu save long dispela? Sampela manmeri i ting ol i no save sem bikos ol i ken salim planti teks mesis. Tasol em isi long painim ol gutpela pren long taim yu bungim ol narapela na toktok wantaim ol. Savemeri Sherry Turkle i tok: “Taim yumi lukim pes bilong narapela narapela na toktok wantaim dispela i mekim na yumi inap savegut long narapela.” a
Taim yu daunim dispela 4-pela samting yu save pret long en, yu bai luksave olsem bai yu no pret long toktok wantaim ol narapela olsem long pastaim
Wokim plen
Sakim pasin bilong skelim. I no olsem yu mas kamap man o meri bilong toktok planti, nogat. Yu laik putim mak long daunim pasin bilong yu long pret na bai dispela i helpim yu long kisim ol gutpela pren na mekim ol samting yu inap mekim.
“I no gat wok long toktok longpela taim na stori long planti samting, na i no olsem yu mas mekim ol samting bilong pulim tingting bilong ol narapela. Tok halo tasol long wanpela nupela na givim sampela askim long em.”—Alicia.
Stiatok bilong Baibel: “Olgeta man wan wan i mas skelim wok bilong ol yet. Na long dispela rot, bai ol i amamas long samting ol yet i mekim, na ol i no ken skelim ol yet wantaim narapela.”—Galesia 6:4.
Luksave. Lukim lain bilong toktok na luksave long hau ol i toktok wantaim ol narapela. Wanem samting i kamap gut? Wanem samting i no kamap gut? Yu inap wok strong long kisim wanem pasin bilong ol?
“Lukim na kisim save long ol manmeri husat i save hariap long painim ol pren. Lukim pasin na toktok ol i mekim long taim ol i bungim wanpela long namba wan taim.”—Aaron.
Stiatok bilong Baibel: “Ain i save sapim ain, olsem tasol wanpela man inap helpim narapela long kamap gutpela moa.”—Provep 27:17.
Givim ol askim. Planti taim ol man i laik kamapim tingting bilong ol long ol samting, so pasin bilong givim askim em gutpela rot long kirapim tok wantaim ol. Dispela bai mekim tu na ol man i no tingting tumas long skelim yu.
“Pasin bilong redi paslain yet inap helpim yu long daunim pasin bilong pret. Yu ken tingim sampela topik o askim paslain long wanpela bung na bai yu no pret long bungim planti nupela lain.”—Alana.
Stiatok bilong Baibel: “Yupela i no ken tingim laik bilong yupela yet tasol, nogat, yupela i mas tingim tu laik bilong ol arapela.”—Filipai 2:4.
a I kam long buk Reclaiming Conversation.
