Nogat. Em tru olsem oltaim mipela i save autim tok long ol haus, tasol mipela i no bilip olsem God bai kisim bek mipela long rot bilong dispela wok. (Efesus 2:8) Bilong wanem?

 Tingim dispela tok piksa: Wanpela gutpela man i tok promis long givim wanpela ekspensiv presen long olgeta man husat i kamap long wanpela hap long det em i makim. Sapos yu bilip tru long tok promis bilong em, yu ting yu bai bihainim tok bilong em? Yes, bai yu mekim olsem! Na ating yu bai tokim ol pren na famili bilong yu long dispela samting na bai ol tu inap kisim dispela presen. Tasol tingim, taim yu bihainim tok bilong dispela man na yu kisim presen, dispela presen i no olsem pe bilong yu, nogat. Em presen tasol.

 Long wankain wei, ol Witnes Bilong Jehova i bilipim promis bilong God olsem em bai givim laip oltaim long olgeta man i bihainim tok bilong em. (Rom 6:23) Mipela i wok strong long tokim ol narapela tu long samting mipela i bilip long en, na mipela i laik bai ol tu i kisim dispela blesing i kam long God. Tasol mipela i no bilip olsem God bai kisim bek mipela long rot bilong wok autim tok mipela i mekim, nogat. (Rom 1:17; 3:28) I no gat wanpela man inap mekim ol wok inap long mak we God i kolim bilong kisim dispela naispela blesing. God “i no ting long stretpela pasin yumi yet i bin mekim, na em i kisim bek yumi. Nogat. Long sori bilong em yet em i kisim bek yumi.”—Taitus 3:5, Buk Baibel.