Ol Witnes Bilong Jehova i laikim God na ol narapela manmeri, olsem na ol i amamas long tokim olgeta long tok bilong Baibel, dispela i makim tu ol manmeri em pastaim ol i tok “Mi no laik.” (Matyu 22:37-​39) Pasin laikim bilong God i kirapim mipela long bihainim tok bilong Pikinini bilong em long “autim tok long ol manmeri na stori gut tru.” (Aposel 10:42; 1  Jon 5:3) Bilong mekim olsem, mipela i autim tok bilong God planti taim, wankain olsem ol profet bilong God long bipo. (Jeremaia 25:4) Bikos mipela i laikim ol narapela, mipela i autim “gutnius bilong Kingdom,” long olgeta na dispela bai helpim ol long kisim laip, dispela i makim tu ol manmeri em pastaim ol i tok ol i no laik harim.​—Matyu. 24:14.

 Planti taim mipela i bungim ol man i amamas long harim tok long ol haus em pastaim ol i no laik harim. Skelim 3-pela risen:

•   Ol manmeri i save go long narapela hap.

•   Ol narapela long haus i soim olsem ol i amamas long harim tok.

•   Ol manmeri i save senis. Ol samting i wok long kamap long olgeta hap bilong graun i mekim na sampela i laik “kisim save long God” na ol i amamas long harim tok bilong Baibel. (Matyu 5:3) Maski ol man husat i birua inap senisim tingting, olsem aposel Pol.​—1 Timoti 1:​13.

 Maski i olsem, mipela i no fosim man long harim tok mipela i autim. (1 Pita 3:​15) Mipela i bilip olsem olgeta wan wan i mas mekim disisen bilong ol long samting bilong lotu.​—Lo 30:19, 20.