Vaefesa 1:1-23
1 Mina Pawulo, muapostola wa Kreste Yesu hi ku rhandza ka Xikwembu, eka vakwetsimi lava nga eEfesa+ lava tshembekaka lava nga vadyondzisiwa va Kreste Yesu:
2 Onge mi nga va ni musa lowukulu ni ku rhula leswi humaka eka Xikwembu Tata wa hina ni le ka Hosi Yesu Kreste.
3 A ku dzunisiwe Xikwembu tlhelo Tata wa Hosi ya hina Yesu Kreste, hikuva xi hi katekise hi ku tirhisa moya lowo kwetsima etilweni evun’weni na Kreste.+
4 Xi hi hlawule leswaku hi va ni vun’we na yena* misava yi nga si va kona, leswaku hi kombisa rirhandzu hi tlhela hi kwetsima naswona hi nga soleki+ emahlweni ka xona.
5 Hikuva xi hi hlawule khale+ leswaku hi va vana va xona+ hi ku tirhisa Yesu Kreste, hi ku ya hi leswi xi tsakisaka ni ku rhandza ka xona,+
6 leswaku vanhu va ta dzunisa Xikwembu hikuva xi tirhise N’wana wa xona loyi a rhandzekaka+ leswaku xi hi komba musa wa xona lowukulu.+
7 Hikwalaho ka yena ha tshunxiwa hi ku tirhisa nkutsulo wa ngati yakwe.+ Hi rivaleriwa swidyoho swa hina+ hikwalaho ka musa lowukulu wa Xikwembu.
8 Xi endle leswaku musa lowu, lowukulu wu tala eka hina hi vutlhari hinkwabyo ni ku twisisa*
9 hi ku hi tivisa xihundla xo kwetsima+ xa ku rhandza ka xona. Xihundla xexo xi fambisana ni leswi tsakeriwaka hi xona hi ku ya hi xikongomelo xa xona
10 leswaku ku va ni vukongomisi bya ku hlengeleta swilo hinkwaswo eka Kreste, swilo swa le tilweni ni swilo swa la misaveni, eku heleni ka mikarhi leyi vekiweke.+ Eka yena
11 loyi hi nga ni vun’we na yena naswona hi averiweke ku va vadyandzhaka na yena,+ hi hlawuriwe khale hi ku ya hi xikongomelo xa loyi a endlaka swilo hinkwaswo hilaha a tiyimiselaka hakona hi ku ya hi ku rhandza ka yena,
12 leswaku hina lava veke vo sungula ku va ni ntshembo eka Kreste hi tirhela ku dzunisa ku vangama ka yena.
13 Kambe na n’wina mi ve ni ntshembo eka yena endzhaku ka ku twa rito ra ntiyiso, ku nga mahungu lamanene ya ku ponisiwa ka n’wina. Endzhaku ka loko mi khorwile, mi funghiwile+ hikwalaho ka yena hi moya lowo kwetsima lowu tshembisiweke,
14 lowu nga mfungho wa xitiyisekiso xa ndzhaka ya hina,+ hi xikongomelo xa ku tshunxa vanhu va Xikwembu+ hi nkutsulo+ leswaku xi dzunisiwa ni ku vangamisiwa.
15 Hi yona mhaka leyi na mina, ku sukela loko ndzi twile hi ripfumelo leri mi nga na rona eka Hosi Yesu ni rirhandzu leri mi ri kombisaka eka vakwetsimi hinkwavo,
16 ndzi nga tshikangiki ku khensa hikwalaho ka n’wina. Ndzi tshamela ku mi katsa eswikhongelweni swa mina,
17 leswaku Xikwembu xa Hosi ya hina Yesu Kreste, Tatana wa ku vangama, xi ta mi nyika matimba leswaku mi ta tlhariha mi tlhela mi twisisa swilo leswi xi swi paluxaka, loko mi ri karhi mi dyondza ku xi tiva kahle.+
18 Xikwembu xi pfula timbilu ta n’wina, leswaku mi vona ni ku tiva ntshembo lowu xi mi nyikaka wona ni swilo leswinene leswi nga ringanisiwiki na nchumu leswi xi swi tshembiseke vakwetsimi,+
19 ni leswaku mi ta tiva matimba lamakulu lawa xi ma kombiseke eka hina vapfumeri.+ Ma kombisiwile hi mitirho leyi xi yi endleke hi matimba ya xona lamakulu,
20 lawa xi ma kombiseke eka Kreste loko xi n’wi pfuxa eka lava feke kutani xi n’wi veka evokweni ra xona ra xinene+ etindhawini ta le tilweni,
21 ehenhla ka mfumo wun’wana ni wun’wana, lava lawulaka, matimba, vuhosi ni vito rin’wana ni rin’wana leri vitaniwaka,+ ku nga ri sweswi ntsena kambe ni le nkarhini lowu taka.
22 Xi tlhele xi veka swilo hinkwaswo ehansi ka milenge yakwe,+ kutani xi n’wi endla nhloko ya swilo hinkwaswo evandlheni,+
23 leri nga miri wakwe,+ leri taleke hi swilo hinkwaswo ha yena loyi a hetisaka swilo hinkwaswo.
