Yohane 21:1-25
21 Endzhaku ka swilo leswi, Yesu a tlhela a humelela eka vadyondzisiwa eLwandle ra Tiberiyo. U humelele hi ndlela leyi.
2 A ku ri na Simoni Petro, Tomasi (loyi a a vuriwa Hahla),+ Nathaniyele+ loyi a huma emutini wa Kana lowu nga eGaleliya, vana va Zebediya+ ni vadyondzisiwa van’wana vakwe vambirhi.
3 Simoni Petro a ku: “Ndzi ya eku phaseni ka tihlampfi.” Va ku: “Hi famba na wena.” Kutani va huma va ya khandziya xikepe, kambe a va phasanga nchumu vusiku byebyo.+
4 Kambe loko ri ya eku xeni, Yesu a yima eribuweni, hambiswiritano vadyondzisiwa vakwe a va swi xiyanga leswaku a ku ri yena.+
5 Hiloko Yesu a ku: “Vananga, xana mi na swakudya?”* Va n’wi hlamula va ku: “A hi na swona!”
6 Kutani a ku: “Hoxani nete etlhelweni ra xinene ra xikepe mi ta phasa.” Hiloko va ri hoxa, kambe va tsandzeka ku ri koka hikuva a ri ri ni tihlampfi to tala.+
7 Hiloko mudyondzisiwa loyi Yesu a a n’wi rhandza ngopfu+ a byela Petro a ku: “I Hosi!” Loko Simoni Petro a twa sweswo, a ambala xiambalo xakwe hikuva a a nga ambalanga* kutani a tlulela elwandle.
8 Kambe vadyondzisiwa lavan’wana va landzela hi xikepe lexitsongo, va ri karhi va koka nete leyi a yi tele hi tihlampfi, hikuva a va nga ri ekule ngopfu ni ribuwa, mpfhuka lowu a va ri eka wona a wu ri kwalomu ka timitara ta 90.*
9 Loko va fika eribuweni va kume ndzilo wa makala ku ri ni tinhlampfi ni xinkwa ehenhla ka wona.
10 Yesu a ku: “Tisani tin’wana ta tihlampfi leti ma ha ku ti phasaka.”
11 Hiloko Simoni Petro a khandziya xikepe a koka nete a ta na yona eribuweni yi tele hi tihlampfi letikulu leti a ti ri 153. Hambileswi a ti tele ngopfu, nete a yi handzukanga.
12 Yesu a ku: “Tanani mi ta fihlula.” Ku hava ni un’we wa vadyondzisiwa loyi a veke ni xivindzi xo n’wi vutisa a ku: “Hi wena mani?” hikuva a va swi tiva leswaku i Hosi.
13 Yesu a va nyika xinkwa ni tihlampfi.
14 A ku ri ra vunharhu+ Yesu a humelela eka vadyondzisiwa vakwe endzhaku ka loko a pfuxiwile eku feni.
15 Loko va heta ku dya swakudya swa nimixo, Yesu a vutisa Simoni Petro a ku: “Simoni n’wana wa Yohane, xana u ndzi rhandza ku tlula leswi?” Petro a ku: “Ina Hosi, wa swi tiva leswaku ndza ku rhandza.” Yesu a ku: “Phamela swinyimpfana swa mina.”+
16 A tlhela a n’wi vutisa ra vumbirhi a ku: “Simoni n’wana wa Yohane, xana wa ndzi rhandza?” Petro a hlamula a ku: “Ina Hosi, wa swi tiva leswaku ndza ku rhandza.” Yesu a ku: “Risa swinyimpfana swa mina.”+
17 A tlhela a n’wi vutisa ra vunharhu a ku: “Simoni n’wana wa Yohane, xana wa ndzi rhandza?” Hiloko Petro a khomiwa hi tingana hileswi a n’wi vutiseke kanharhu a ku: “Xana wa ndzi rhandza?” Hiloko a ku: “Hosi u tiva swilo hinkwaswo; wa swi tiva leswaku ndza ku rhandza.” Yesu a ku: “Phamela swinyimpfana swa mina.+
18 Hakunene ndzi tiyisile ndzi ri eka wena, loko wa ha kula a wu tiambexa u tlhela u ya laha u lavaka kona. Kambe loko se u dyuharile, u ta yimisa mavoko u ambexiwa hi munhu un’wana naswona u ta ku yisa laha u nga laviki ku ya kona.”
19 Yesu a a kombisa leswaku Petro u ta dlayiwa hikwalaho ko tshembeka eka Xikwembu naswona rifu rakwe ri ta dzunisa Xikwembu. Endzhaku ka sweswo, hiloko a ku: “U nga tshiki ku ndzi landzela.”+
20 Petro a hundzuluka a vona mudyondzisiwa loyi Yesu a a n’wi rhandza swinene+ a ri eku teni, loyi a a tshame ekusuhi na Yesu hi nkarhi wa swakudya swa nimadyambu naswona a vutiseke a ku: “Hosi, i mani loyi a nga ta ku xavisa?”
21 Loko Petro a n’wi vona, hiloko a vutisa Yesu a ku: “Hosi, ku ta endleka yini hi wanuna loyi?”
22 Yesu a n’wi hlamula a ku: “Loko ndzi swi rhandza a nga hanya kukondza ndzi vuya, hikwalaho ka yini u lava ku swi tiva? Wena yana emahlweni u ndzi landzela.”
23 Hiloko ku va ni mavarivari ya leswaku mudyondzisiwa yoloye a nge fi. Kambe Yesu a nga vulanga swona sweswo, u te: “Loko ndzi swi rhandza a nga hanya kukondza ndzi vuya, hikwalaho ka yini u lava ku swi tiva?”
24 Loyi i mudyondzisiwa+ loyi a vuleke vumbhoni bya swilo leswi, a tlhela a swi tsala naswona ha swi tiva leswaku vumbhoni byakwe i ntiyiso.
25 Kahlekahle ku ni swilo swin’wana swo tala leswi Yesu a swi endleke, leswi loko a ku lo tsariwa vuxokoxoko bya swona hinkwabyo, ndzi ehleketa leswaku misava a yi nga ta va ni ndhawu yo veka tibuku* leti.+
Tinhlamuselo ta le hansi
^ Kumbe “tihlampfi.”
^ Kumbe “a a ambale xirhangiso ntsena.”
^ Hi Xigriki, “swisungunu swa kwalomu ka 200.” Vona Xiengetelo B14.
^ Ku nga tibuku ta xikhale leti a ti songiwa kunene.
