Lembe ra 2024 ri ta va ni mihlawulo yo tala ematikweni yo hambanahambana. Hambiswiritano, vanhu vo tala a va ha va tshembi van’watipolitiki.

•   Vanhu vo tala lava vutisiweke eAmerika va vula leswaku “van’watipolitiki vo tala va susumetiwa hi makwanga” ku nga ri ku lava ku tirhela tiko. a—Pew Research Center, September 19, 2023.

 Vantshwa vo tala na vona, a va ha va tshembi van’watipolitiki.

•   “Vana lava se va tlhariheke, va bula hi swiphiqo leswi nga kona, kambe loko va vutisiwa va vula leswaku van’watipolitiki a va va tekeli enhlokweni.”—The New York Times, January 29, 2024.

•   “Vulavisisi byi komba leswaku vantshwa va tshemba vanhu lava va va yingiselaka eka YouTube ku ri ni ku tshemba van’watipolitiki.”—The Korea Times, January 22, 2024.

 Xana hi nga va tshemba van’watipolitiki leswaku va nga hi tisela vumundzuku byo antswa? I mani hi nga n’wi tshembaka?

 Swa fanela ku va vanhu va tivonela leswaku va nga tshembi mani na mani. Bibele yi vula leswaku “munhu loyi a nga riki na ntokoto u tshemba rito rin’wana ni rin’wana, kambe lowo tlhariha u anakanyisisa hi leswi a nga ta swi endla.”—Swivuriso 14:15.

•   Leswaku u kuma switsundzuxo leswi nga ku pfunaka ku kambela leswi u byeriwaka swona, hlaya nhlokomhaka leyi nge “Tisirhelele Eka Rungula Leri Nga Riki Ntiyiso.”

 Tlhandlakambirhi, hambi van’watipolitiki lava tshembekaka naswona va nga ni xikongomelo lexinene, a hi swilo hinkwaswo va kotaka ku swi endla. Hi yona mhaka Bibele yi hi lemukisa yi ku:

•   “Mi nga titshembeleni tihosi, hambi va ri vana va vanhu lava hlulekaka ku ponisa.”—Pisalema 146:3, Bibele Ya Xitsonga (Matsalelo lama’ntshwa)

 Bibele yi hlamusela leswaku Xikwembu xi veke murhangeri la nga tsandziwiki hi nchumu naswona a tshembekaka: Yesu Kreste. (Luka 1:32, 33) Yesu i Hosi ya mfumo wa Xikwembu, hulumendhe leyi fumaka yi ri etilweni.—Matewu 6:10.

•   Dyondza ndlela leyi u nga tshembaka Yesu hayona ni leswi a nga ta swi endla ku tlhantlha swiphiqo leswi hi nga na swona. Hlaya nhlokomhaka leyi nge “I Mani Hosi Ya Mfumo Wa Xikwembu?” ni leyi nge “I Yini Leswi Mfumo Wa Xikwembu Wu Nga Ta Swi Endla?”