Xana Hi Ta Kala Hi Va Na Yona Ikhonomi Leyinene?
Ematikweni yo tala, vanhu va toyatoya hikwalaho ko andza ka swiphiqo swa ikhonomi ya le ndhawini ya ka vona. Swiphiqo sweswo swi nyanyisiwe hi ntungu wa COVID-19, lowu endleke vo tala va heleriwa hi ntsako hileswi swipimelo swa lockdown, ku kayivela ka leswi va swi lavaka ni ku kayivela ka swa vutshunguri swi kombiseke ku hambana exikarhi ka swigwili ni swisiwana.
Xana swiphiqo swa ikhonomi leswi cinisaka vanhu gija swi ta kala swi hela? Ina. Bibele yi hi byela leswi Xikwembu xi nga ta swi endla ku nga ri khale leswaku xi herisa swiphiqo leswi hi nga na swona namuntlha.
Swiphiqo swa ikhonomi leswi Xikwembu xi nga ta swi lulamisa
Xiphiqo: Vanhu lava rhangelaka a va se tshama va simeka ikhonomi leyi enerisaka swilaveko swa vanhu hinkwavo.
Xitshunxo: Xikwembu xi ta siva mifumo ya vanhu hi Mfumo wa xona, lowu vuriwaka Mfumo wa Xikwembu. Wu ta fuma misava wu ri ematilweni.—Daniyele 2:44; Matewu 6:10.
Mbuyelo: Leswi Mfumo wa Xikwembu wu nga ta fuma misava hinkwayo, wu ta fikelela swilaveko swa vanhu hinkwavo laha misaveni. Vanhu a va nge he sogoli kumbe ku vilela hileswaku va ta dya yini. (Pisalema 9:7-9, 18) Ku ri na sweswo, va ta tsakela mbuyelo lowunene lowu tisiwaka hi mitirho ya mavoko ya vona naswona va ta tiphina hi vutomi ni mindyangu ya vona. Bibele yi hi tshembisa leswi: “Va ta aka tiyindlu va tshama eka tona, va ta rima masimu ya madiriva va dya mihandzu ya wona. A va nge he aki kutani ku tshama un’wana, a va nge rimi kutani ku dya un’wana.”—Esaya 65:21, 22.
Xiphiqo: Vanhu a va nge swi koti ku balekela swiyimo leswi endlaka va xaniseka ni ku pfumala leswi va swi lavaka evuton’wini.
Xitshunxo: Swiphiqo leswi endlaka vanhu va chava ni ku pfumala ntshembo, Xikwembu xi ta swi herisa hinkwaswo hi ku tirhisa Mfumo wa xona.
Mbuyelo: Ehansi ka Mfumo wa Xikwembu, vanhu a va nge he weriwi hi timhangu leti nga ta endla leswaku va sala va koka exilogweni. Hi xikombiso, tinyimpi, ku kayivela ka swakudya ni mitungu a swi nge he vi kona. (Pisalema 46:9; 72:16; Esaya 33:24) Xikwembu xi ri: “Vanhu va mina va ta tshama endhawini yo rhula, etindlwini leti sirhelelekeke laha ku nga riki na pongo.”—Esaya 32:18.
Xiphiqo: Vanhu lava lavaka leswi vuyerisaka vona vini ni lava nga ni makwanga, va va khoma ku biha vanhu van’wana.
Xitshunxo: Leswi nga ta endliwa hi Mfumo wa Xikwembu swi ta dyondzisa vanhu leswaku va rhandza warikwenu hilaha va tirhandzaka hakona.—Matewu 22:37-39.
Mbuyelo: Loko Mfumo wa Xikwembu wu fuma misava, vanhu hinkwavo va ta tekelela rirhandzu ra Xikwembu leri nga laviki “leswi vuyerisaka rona ntsena.” (1 Vakorinto 13:4, 5) Bibele yi ri: ‘A ku nge vaviseki munhu kumbe ku onha entshaveni ya mina yo kwetsima, hikuva misava hinkwayo yi ta tala hi ku tiva Yehovha a ku fana ni mati lama funengeteke lwandle.’—Esaya 11:9.
Bibele yi vula leswaku hi hanya emasikwini ya makumu ya misava leyi naswona ku nga ri khale, Xikwembu xi ta endla leswi xi swi tshembiseke hi ku herisa swiphiqo hinkwaswo swa ikhonomi. b (Pisalema 12:5) Kambe loko nkarhi wolowo wu nga se fika, milawu ya le Bibeleni yi nga ku pfuna leswaku u kota ku tiyisela swiphiqo leswi vangiwaka hi ikhonomi. Hi xikombiso, vona nhlokomhaka leyi nge “How to Live on Less” ni leyi nge “Xana Hi Fanele Hi Yi Teka Njhani Mali?”
a Yehovha i vito ra Xikwembu leri kumekaka eBibeleni.—Pisalema 83:18.
b Leswaku u dyondza xivangelo xo tshemba Bibele, hlaya nhlokomhaka leyi nge: “Bibele I Buku Leyi Tshembekaka.”
U Nga Ha Tsakela
XIHONDZO XO RINDZA
I Yini Leswi Mfumo Wa Xikwembu Wu Nga Ta Swi Endla?
Yesu a a swi tiva leswaku Mfumo wa Xikwembu hi wona ntsena lowu nga herisaka swiphiqo swa vanhu laha misaveni. I yini leswi Mfumo wolowo se wu swi endleke leswaku wu tiyisa ntshembo wa hina?
XALAMUKA!
Ntshembo Eka Lava Pfumalaka Makaya Ni Swisiwana
Swiringanyeto leswi nga eBibeleni swi nga ku pfuna eka swa ekhonomi ni rihanyo.
TINHLAMUSELO TA TIVHESE TA BIBELE
Matewu 6:34 Yi Hlamuseriwa—“Mi Nga Tshuki Mi Vilela Hi Siku Leri Landzelaka”
Yesu a nga ku hi tshika ku pulana vumundzuku.
XIHONDZO XO RINDZA
Xana Misava Leyi Nga Riki Na Vusweti Yi Ta Va Kona?
I mani a nga ta herisa vusweti?
