RIRIMI ra Xigeorgia hi rin’wana ra tindzimi to sungula leti hundzuluxeleke Bibele, ku katsa ni Xiarmenia, Xicoptic, Xilatini, Xisiriya ni tindzimi tin’wana. Matsalwa ya khale ya Xigeorgia lama tsariweke hi voko ya Tievhangeli, mapapila ya Pawulo ni Tipisalema ma nga ha va ma tsariwe emalembeni ya va-401 ku ya eka 500. Eka malembe lama landzeleke, ku ye ku va ni xilaveko xo hundzuluxela ni ku kopa Bibele ya Xigeorgia, leswi endleke leswaku ku va ni vuhundzuluxeri byo hambanahambana. *

Bibele yi tirhisiwe ngopfu loko ku tsariwa minkandziyiso ni le ka mindhavuko ya vanhu va le Georgia. Hi xikombiso swi nga ha endleka leswaku xitori lexi tsemaka nhlana xa Hosi ya xisati Shushanik lexi tsariweke emalembeni ya va-401 ku ya eka 500, xi katsa ni swikombo swa swiyenge swo hambanahambana swa le Bibeleni. Eka xiphato xakwe lexi nge Vepkhvistqaosani (The Knight in the Panther’s Skin), lexi qambhiweke hi va-1220, Shota Rustaveli u tsale swiphato leswi vulavulaka hi nkoka wa mahanyelo ya Vakreste. U tsale hi tinhlokomhaka leti nge, xinakulobye, malwandla ni ku rhandza vanhuvambe, ku nga mahanyelo lawa ni sweswi ma ha tekiwaka ma ri ya nkoka eka vanhu va le Georgia.