Xikwembu xi endle vatukulu va Abrahama va va tiko xi tlhela xi va nyika milawu. Xi va vitane “Vaisrayele” naswona xi va nyike vutihlamuleri byo sirhelela vugandzeri bya ntiyiso ni rito ra xona. (Pisalema 147:19, 20) Hikwalaho vanhu va tinxaka hinkwato a va ta vuyeriwa eka tiko ra Israyele.—Hlaya Genesa 22:18.

Xikwembu xi hlawule Vaisrayele leswaku va va timbhoni ta xona. Matimu ya vona ya khale ma kombisa vuyelo lebyi vaka kona loko vanhu va yingisa milawu ya Xikwembu. (Deteronoma 4:6) Hikwalaho, vanhu a va ta kota ku tiva Xikwembu xa ntiyiso eka Vaisrayele.—Hlaya Esaya 43:10, 12.

Hi ku famba ka nkarhi, Yehovha u va tshikile Vaisrayele naswona u va sive hi vandlha ra Vukreste. (Matewu 21:43; 23:37, 38) Sweswi, ematshan’weni ya Vaisrayele, Vakreste va ntiyiso i timbhoni ta Yehovha.—Hlaya Mintirho 15:14, 17.

Yesu u lerise valandzeri va yena leswaku va chumayela ni ku endla vanhu vadyondzisiwa ematikweni hinkwawo. (Matewu 10:7, 11; 24:14; 28:19, 20) Ntirho lowu wu ta hela ku nga ri khale, emakumu ka mafambiselo lawa ya swilo. A ku ri ro sungula ematin’wini ku va Yehovha a hlengeleta vanhu va timiliyoni va matiko hinkwawo evugandzerini bya ntiyiso. (Nhlavutelo 7:9, 10) Vakreste va ntiyiso va hleleriwe ku khutazana ni ku pfunana. Emisaveni hinkwayo va kuma ndzetelo lowu fanaka lowu humaka eBibeleni eminhlanganweni ya vona.—Hlaya Vaheveru 10:24, 25.

Hi va-1870, ntlawa lowutsongo wa swichudeni swa Bibele wu sungule ku kuma ntiyiso wa Bibele lowu a wu lahleke khale. A wu swi tiva leswaku Yesu u lerise vandlha ra Vukreste leswaku ri chumayela, hikwalaho wu sungule tsima ro chumayela hi Mfumo ematikweni yo hambana-hambana. Hi 1931 wu amukele vito leri nge, Timbhoni ta Yehovha.—Hlaya Mintirho 1:8; 2:1, 4; 5:42.

Eka lembe-xidzana ro sungula, ematikweni yo tala mavandlha ya Vukreste ma vuyeriwile eka huvo leyi fumaka leyi a yi teka Yesu tanihi Nhloko ya vandlha. (Mintirho 16:4, 5) Hilaha ku fanaka namuntlha, Timbhoni ta Yehovha emisaveni hinkwayo ta vuyeriwa eka Huvo leyi Fumaka leyi vumbiwaka hi vakulu lava nga ni ntokoto. Yi langutela marhavi ya Timbhoni ta Yehovha lama hundzuluxelaka, ma kandziyisa ni ku fambisa minkandziyiso leyi sekeriweke eBibeleni hi tindzimi leti tlulaka 600. Hikwalaho, Huvo leyi Fumaka yi nyikela xikhutazo lexi humaka eMatsalweni ni nkongomiso emavandlheni lama tlulaka 100 000 emisaveni hinkwayo. Emavandlheni hinkwawo, vavanuna lava fanelekaka i vakulu kumbe valanguteri. Vavanuna lava va khathalela ntlhambi wa Xikwembu hi ku swi rhandza.—Hlaya 1 Petro 5:2, 3.

Timbhoni ta Yehovha ti hleleriwe ku chumayela mahungu lamanene ni ku endla vadyondzisiwa. Ku fana ni vaapostola, hi chumayela hi yindlu ni yindlu. (Mintirho 20:20) Hi tlhela hi dyondza Bibele ni lava rhandzaka ntiyiso hi timbilu ta vona hinkwato. Kambe, hina Timbhoni ta Yehovha a ho va nhlengeletano ntsena. Hi ndyangu lowu nga ni Tatana la nga ni rirhandzu. Hi vamakwerhu va xinuna ni va xisati lava khathalelanaka. (2 Vatesalonika 1:3) Leswi vanhu va Yehovha va hleriweke leswaku va n’wi tsakisa ni ku pfuna van’wana, va vumba ndyangu lowu tsakeke swinene wa laha misaveni.—Hlaya Pisalema 33:12; Mintirho 20:35.