Ku Lavisisa Tinhlamulo

“Endzhaku ka loko se hi kume ndlela yo hanya vutomi bya le ka byandlana huku yo fa hi mafurha, hi ri ni xin’wana ni xin’wana lexi hi xi lavaka, hi tshama etindlwini leti nga ni fambiselo ro lawula mahiselo ni matitimelelo, hi ri ni swichayachayana swa xiyimo xa le henhla naswona hi tiphina hi mihandzu leyinene lembe hinkwaro, a hi tivutisa leswaku kahle-kahle hi hanyela yini. Ha yini hi tikarhatela ku hanya vutomi byo phikizana lebyi eku heteleleni byi vaka bya hava? Xana hi phikizanela yini?” —David G. Myers, profesa wa ntivo-miehleketo eKholichi ya Hope, edorobeni ra Holland, exifundzheni xa Michigan, le U.S.A.

U NGA swi hlamula njhani swivutiso leswi vutisiweke hi profesa loyi? Van’wana va nga ha tivutisa loko swi ri swa nkoka ku tikarhatela ku lavisisa tinhlamulo ta swivutiso sweswo. Hambiswiritano, ku ringeta ku honisa swivutiso leswi swi fana ni ku ringeta ku honisa xiribyana lexi nga endzeni ka ntanghu ya wena, u nga ha ya emahlweni ni riendzo ra wena kambe a ri nge tsakisi.

Loko u tshame u tivutisa loko vutomi byi ri ni xikongomelo, a hi wena ntsena. Hi ku ya hi Nkambisiso wa Misava Hinkwayo wa Mahanyelo, yin’wana ya tidyondzo letikulu swinene ta mahanyelo ya vanhu yi kombisa leswaku nhlayo ya vanhu lava ehleketaka “hi xikongomelo xa vutomi” yi ya yi andza ematikweni yo tala.

Loko u lava ku rhula ka xiviri evuton’wini, u fanele u kuma tinhlamulo ta swivutiso swinharhu swa nkoka leswi landzelaka.

Xana hi huma kwihi?

Hi xihi xikongomelo xa vutomi?

Xana vumundzuku byi hi khomele yini?

Xana u nga tikuma kwihi tinhlamulo ta ntiyiso ta swivutiso leswi swa nkoka? Ematshan’weni yo mbambela nhlamulo kumbe ku yi lava hi ku ya hi miehleketo ya vanhu, matluka lama landzelaka ma ta ku nyika tinhlamulo leti kumekaka eRitweni ra Xikwembu, ku nga Bibele. Ha ku rhamba leswaku u pfula Bibele ya wena kutani u tivonela hi wexe leswi yi swi vulaka.