Dyondza Eka Rito Ra Xikwembu

Xana Ku Ta Humelela Yini Hi Siku Ra Vuavanyisi?

TLANGA

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. I yini Siku ra Vuavanyisi?

Hilaha swi kombisiweke hakona eka xifaniso lexi nga exineneni, vanhu vo tala va anakanya leswaku hi Siku ra Vuavanyisi vanhu va tibiliyoni va ta tisiwa emahlweni ka xiluvelo xa Xikwembu leswaku va ta avanyisiwa hi ku ya hi swiendlo swa vona swa khale—van’wana va ta nyikiwa hakelo ya ku ya hanya etilweni kasi van’wana va ya xanisiwa etiheleni. Hambiswiritano, Bibele yi vula leswaku xikongomelo xa Siku ra Vuavanyisi i ku ntshunxa vanhu eka vuhomboloki lebyi nga kona. (Pisalema 96:13) Xikwembu xi hlawule Yesu leswaku a va Muavanyisi loyi a nga ta vuyetela vululami eka vanhu.—Hlaya Esaya 11:1-5; Mintirho 17:31.

2. Xana Siku ra Vuavanyisi ri ta byi vuyetela njhani vululami?

Loko Adamu wanuna wo sungula a xandzukela Xikwembu hi vomu, u endle leswaku vana va yena hinkwavo va va ni xidyoho, va xaniseka ni ku fa. (Varhoma 5:12) Leswaku a lulamisa vuhomboloki byebyo, Yesu u ta pfuxa vanhu va tibiliyoni lava feke. Buku ya Nhlavutelo yi vula leswaku leswi swi ta endleka hi nkarhi wa ku fuma ka Kreste Yesu ka gidi ra malembe.—Hlaya Nhlavutelo 20:4, 11, 12.

Lava pfuxiweke va ta avanyisiwa, ku nga ri hikwalaho ka leswi va swi endleke va nga si fa, kambe hikwalaho ka leswi va swi endlaka loko leswi nga eka “tibuku-nsongwa” leti ku vulavuriweke ha tona eka Nhlavutelo ndzima 20 swi paluxiwa. (Varhoma 6:7) Muapostola Pawulo u vule leswaku exikarhi ka lava nga ta pfuxeriwa evuton’wini va tlhela va va ni lunghelo ra ku dyondza hi Xikwembu ku ni ‘lava lulameke ni lava nga lulamangiki.’—Hlaya Mintirho 24:15.

3. I yini leswi Siku ra Vuavanyisi ri nga ta swi endla?

Lava feke va nga tivanga Yehovha Xikwembu ni ku n’wi tirhela va ta va ni lunghelo ra ku hundzuka kutani va endla leswinene. Loko va endla leswinene, va ta “pfukela evuton’wini.” Hambiswiritano, van’wana va lava pfuxiweke va nge swi lavi ku dyondza tindlela ta Yehovha. Vona va ta “pfukela eku avanyisiweni.”—Hlaya Yohane 5:28, 29; Esaya 26:10; 65:20.

Loko Siku ra Vuavanyisi leri leheke malembe ya gidi ri fika emakumu, Yehovha u ta va a vuyetele vanhu lava yingisaka eka xiyimo lexi hetisekeke. (1 Vakorinto 15:24-28) Mawaku ntshembo wo tsakisa lowu vanhu lava yingisaka va nga na wona! Eka ndzingo wo hetelela, Xikwembu xi ta ntshunxa Sathana Diyavulosi loyi a nga ta va a bohiwe ku ringana malembe ya gidi ekheleni ro enta. Sathana u ta tlhela a ringeta ku hambukisa vanhu eka Yehovha, kambe lava lwisanaka na Sathana va ta tiphina hi ku hanya emisaveni hilaha ku nga heriki.—Hlaya Esaya 25:8; Nhlavutelo 20:7-9.

4. Hi rihi siku rin’wana ra vuavanyisi leri nga ta vuyerisa vanhu?

Bibele yi tlhela yi tirhisa marito lama nge “siku ra vuavanyisi” ku kombetela eka xiendlakalo lexi nga ta tisa makumu ya mafambiselo ya sweswi ya swilo. Siku leri ra vuavanyisi ri ta ta hi xitshuketa ku fana ni Ndhambi ya siku ra Nowa leyi loviseke xitukulwana hinkwaxo xo homboloka. Lexi tsakisaka, ku lovisiwa ka “vanhu lava va nga xi xiximiki Xikwembu” loku nga kwala nyongeni ku ta basisa ndlela ya misava leyintshwa ya vanhu laha ku nga “ta va ni ku lulama eka [yona].”—Hlaya 2 Petro 3:6, 7, 13.