LESWI VANHU VAN’WANA VA SWI VULAKA: “Xikwembu hi xona xi fumaka misava, kutani hi xona xi vangaka timhangu ta ntumbuluko; hikokwalaho xi ni tihanyi.”

LESWI BIBELE YI SWI VULAKA: “Misava hinkwayo yi le hansi ka matimba ya lowo homboloka.” (1 Yohane 5:19) I mani “lowo homboloka”? Bibele yi vula leswaku i Sathana. (Matewu 13:19; Marka 4:15) Xana mhaka yoleyo a hi ntiyiso? Anakanya hi mhaka leyi: Loko Sathana ku ri yena loyi a fumaka misava leyi, kutani hi yena a kucetelaka vanhu leswaku va va ni vutianakanyi, makwanga ni ku va ni mahanyelo yo biha ku fana na yena. Xana sweswo a swi nge pfuni ku hlamusela xivangelo lexi endlaka vanhu va tekelela mahanyelo yakwe yo biha laha misaveni? Vatshila vo tala va tsundzuxa leswaku mahanyelo yo biha ya vanhu ma nga hoxa xandla eka timhangu ta ntumbuluko, hi ku ti vanga kunene, ku endla leswaku ti andza kumbe ku endla leswaku ti hlasela vanhu hi ku olova.

Kutani ha yini Xikwembu xi pfumelela Sathana leswaku a va ni nkucetelo wo tano? Nhlamulo ya kona yi hi tlherisela eka matimu ya vanhu, loko vatswari va hina vo sungula va xandzukela Xikwembu tanihi Mufumi. Vanhu vo tala va landzele ndlela yoleyo ku sukela khale. Xiboho xexo—ku ala ku fumiwa hi Xikwembu—xi endle leswaku vanhu va lawuriwa hi Sathana, ku nga nala wa Xikwembu. Hi yona mhaka leyi Yesu a vulaka leswaku Sathana i “mufumi wa misava.” (Yohane 14:30) Xana Sathana u ta fuma hilaha ku nga heriki? Doo!

Yehovha * wa ku vona ku xaniseka loku Sathana a ku vangaka. Entiyisweni, Xikwembu xi khumbeka swinene hi ku xaniseka ka vanhu. Hi xikombiso, loko yi vulavula hi minkarhi yo tika leyi weleke tiko ra Israyele, Bibele yi vula leswi hi Xikwembu: “Enkarhini wa maxangu ya vona hinkwawo, na yena a a ri emaxangwini.” (Esaya 63:9) Hi tintswalo, Xikwembu xi hlele leswaku ku nga ri khale xi ta herisa ku fuma ka Sathana loyi a nga ni tihanyi. Xi veke N’wana wa xona, ku nga Yesu Kreste leswaku a va Hosi leyi nga ni vululami leyi nga ta fuma hilaha ku nga riki na makumu.

NDLELA LEYI U KATSEKAKA HA YONA: Hambileswi ku fuma ka Sathana ku tsandzekeke ku ponisa vanhu eka timhangu ta ntumbuluko, ku fuma ka Yesu ku ta swi kota. Yesu u tshame a teka goza leswaku a sirhelela vadyondzisiwa vakwe loko ku ri ni xidzedze lexikulu. Rungula ra Bibele ri ri: “Hiloko a . . . tshinya mheho, kutani a byela lwandle a ku: ‘Miyela! U ku whii!’ Kutani mheho yi hunguteka, hiloko ku va ni ku rhula lokukulu.” Vadyondzisiwa va ku: “Kahle-kahle loyi i mani, hikuva hambi ku ri mheho ni lwandle swa n’wi yingisa?” (Marka 4:37-41) Xiendlakalo xolexo xi hi nyika ntshembo wa leswaku Yesu u ta sirhelela vanhu hinkwavo lava yingisaka loko a ri karhi a fuma tanihi Hosi.—Daniyele 7:13, 14.