“Endzhaku ka rifu, mimoya-xiviri ya lava faka va ri ni xidyoho yi ya etiheleni laha yi xanisiwaka hi ku xupuriwa ‘endzilweni hilaha ku nga heriki.’” (Catechism of the Catholic Church) Varhangeri van’wana va vukhongeri va vula leswaku lava nga etiheleni va hambanisiwe hi ku helela na Xikwembu.

“Moya-xiviri lowu dyohaka—wona wu ta fa.” (Ezekiyele 18:4) Lava feke “a va tivi nchumu nikatsongo.” (Eklesiasta 9:5) Loko ku ri hileswaku moya-xiviri wa fa naswona a wu tivi nchumu, xana swi nga kotekisa ku yini leswaku wu xaniseka “endzilweni hilaha ku nga heriki” kumbe hambi ku ri ku twa ku vava hikwalaho ko hambanisiwa na Xikwembu hilaha ku nga heriki?

EBibeleni, marito ya Xiheveru na Xigriki lama hakanyingi ma hundzuluxeriweke ma va “tihele” entiyisweni ma kombetela eka sirha leri tolovelekeke ra vanhu. Hi xikombiso, loko Yobo a ri ni vuvabyi lebyi vavaka u khongele a ku: “Loko ingi a wu ndzi tumbetile esirheni ra mina [“etiheleni,” Douay-Rheims Version].” (Yobo 14:13, Holy Bible—Easy-to-Read Version) Yobo a a nga lavi ku wisa endhawini leyi a a ta xaniseka kumbe a va a hambanisiwe na Xikwembu, kambe a a lava ku ya esirheni.

Tihanyi a ti hi tshineti ekusuhi na Xikwembu; ti hi hambanisa na xona. Rocío, loyi a tshamaka eMexico u ri: “Ku sukela loko ndza ha ri ricece, ndzi dyondzisiwe dyondzo ya ndzilo wa tihele. A ndzi khomiwe hi rhumbyana lerova a ndzi anakanya leswaku Xikwembu a xi na timfanelo letinene. A ndzi anakanya leswaku xi ni vukarhi ni tihanyi.”

Ndlela leyi Rocío a a teka Xikwembu ha yona yi cincile loko a vona marungula ya Bibele lama nga erivaleni ya malunghana ni vuavanyisi bya xona ni xiyimo xa vafi. U ri: “Ndzi titwe ndzi ntshunxekile—onge hiloko ndzi rhuriwe ndzhwalo lowu a ndzi ri na wona emianakanyweni. Ndzi sungule ku tshemba leswaku Xikwembu xi langutele leswinene eka hina, xa hi rhandza ni leswaku ndzi nga xi rhandza. Xi fana na tatana loyi a khomaka vana vakwe hi voko naswona a languteleke leswinene eka vona.”—Esaya 41:13.

Vo tala va tikarhatela ku tshembeka evukhongerini ni ku hanya hi ndlela leyinene hileswi va chavaka ndzilo wa tihele kambe Xikwembu a xi lavi u xi tirhela hileswi u xi chavaka. Ematshan’weni ya sweswo, Yesu u te: “U fanele u rhandza Yehovha Xikwembu xa wena.” (Marka 12:29, 30) Ku tlula kwalaho, loko hi xiya leswaku Xikwembu a xi na tihanyi, hi nga tshemba vuavanyisi lebyi xi nga ta byi endla enkarhini lowu taka. Ku fana ni munghana wa Yobo, ku nga Elihu, hi nga vula handle ko kanakana hi ku: “A swi ve ekule swinene ni Xikwembu xa ntiyiso leswaku xi endla hilaha ku hombolokeke, ni Lowa Matimba Hinkwawo ku endla hilaha ku nga lulamangiki.”—Yobo 34:10.