Vana va wena va nga dyondza ku rhandza Xikwembu ntsena loko va ri ni vumbhoni bya leswaku xi kona nileswaku xa va rhandza. Leswaku va rhandza Xikwembu, va fanele va xi tiva. (1 Yohane 4:8) Hi xikombiso, va fanele va tiva tinhlamulo ta swivutiso leswi: A ku ri xihi xikongomelo xa Xikwembu loko xi vumba vanhu? Ha yini Xikwembu xi pfumelela ku xaniseka? Xikwembu xi ta va endlela yini vanhu enkarhini lowu taka?—Hlaya Vafilipiya 1:9.

Leswaku u pfuna vana va wena leswaku va rhandza Xikwembu, u fanele u va kombisa leswaku wena wa xi rhandza. Loko va vona sweswo, va ta tekelela xikombiso xa wena.—Hlaya Deteronoma 6:5-7; Swivuriso 22:6.

Rito ra Xikwembu ri ni matimba. (Vaheveru 4:12) Hikokwalaho, pfuna vana va wena leswaku va dyondza tidyondzo ta rona ta xisekelo. Leswaku Yesu a fikelela timbilu ta vanhu, u va vutise swivutiso, a va yingisela ni ku va hlamusela Matsalwa. Leswaku na wena u fikelela timbilu ta vana va wena, u fanele u tekelela tindlela ta Yesu to dyondzisa.—Hlaya Luka 24:15-19, 27, 32.

Ku engetela kwalaho, rungula ra le Bibeleni leri hlamuselaka ndlela leyi Xikwembu xi khomeke vanhu ha yona ri nga pfuna vana va wena leswaku va xi tiva ni ku xi rhandza. Minkandziyiso leyi endleriweke ku va pfuna ya kumeka eka www.pr2711.com/ts.—Hlaya 2 Timotiya 3:16.