Hina hi nhlengeletano ya misava hinkwayo leyi nga ti hlanganisiki ni mintlawa yin’wana ya vukhongeri. Hambileswi ntsindza wa hina wu nga le United States, Timbhoni ta Yehovha to tala ti tshama ematikweni man’wana. Hi vanhu va kwalomu ka timiliyoni ta nhungu, hi dyondzisa vanhu Bibele ematikweni lama tlulaka 230. Hi endla hilaha Yesu a vuleke hakona loko a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo.”—Matewu 24:14.

Eka tiko rin’wana ni rin’wana laha hi tshamaka kona, hi yingisa milawu ya kona. Kambe a hi hlanganyeli eka swa tipolitiki. Sweswo hi swi endla hi leswi Yesu a vuleke leswaku Vakreste a va fanelanga va va “xiphemu xa misava.” Hi tlhela hi nga katseki eka timhaka ta tipolitiki ni mintirho yin’wana leyi seketelaka nyimpi. (Yohane 15:19; 17:16) Hi nkarhi wa Nyimpi ya Vumbirhi ya Misava, Timbhoni ta Yehovha ti khomiwile, ti xanisiwa hileswi a ti nga lavi ku hlanganyela eka tipolitiki. Khale ka mubixopo wa le Jarimani u tsale a ku: “Ti nga vula hi ku tiyiseka leswaku eka Mfumo wa Manazi wa le Jarimani hi tona ntsena ti khomeleleke eka leswi ti pfumelaka eka swona.”

Hambiswiritano, a hi tihambanisi ni vanhu van’wana. Yesu u khongelele valandzeri vakwe eka Xikwembu a ku: “Ndza ku kombela leswaku u nga va susi emisaveni.” (Yohane 17:15) Hikokwalaho, na hina hi ya entirhweni, eswitolo ni le xikolweni laha hi tshamaka kona.