Ku rivalela swi vula ku rivala hi ku helela hi mhaka leyi ku khunguvanyiseke ni ku ka u nga vi na xikhomela. A swi vuli swona leswaku u teka mhaka yoleyo ku nga ri nchumu kumbe ku yi ba hi makatla.

NSINYA WA NAWU WA LE BIBELENI: “Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana.”—Vakolosa 3:13.

“Loko u rhandza munhu, u swi ba hi makatla swihoxo swakwe kutani u vona leswinene leswi a ringetaka ku swi endla.”—Aaron.

Xikhomela xi nga ku vangela mavabyi ni ku ku hetela ntsako naswona xi nga tlhela xi onha vukati bya n’wina.

“Siku rin’wana nuna wa mina u kombele ku rivaleriwa hileswi a a ndzi twise ku vava swinene. A swi ndzi tikela ku n’wi rivalela. Ndzi hetelele ndzi n’wi rivalerile kambe ndzi tisorile hileswi ndzi hlweleke ku n’wi rivalela. Sweswo swi endle leswaku hi tsuvelana.”—Julia.

TIKAMBELE

Loko murhandziwa wa wena a ku twise ku vava hi leswi a swi endleke kumbe ku swi vula, tivutise:

• ‘Xana ndza nyenyela?’

• ‘Xana mhaka leyi i yikulu lerova yi lava leswaku a ta kombela ku rivaleriwa kumbe ndzi nga yi ba hi makatla?’

BURISANA NI NKATAKU

• Swi hi tekela nkarhi wo tanihi kwihi ku rivalelana?

• Hi nga endla yini leswaku hi hatla hi rivalelana?

SWIRINGANYETO

• Loko nkataku a ku khunguvanyisile, u nga n’wi khomi hi ndlela yo biha.

• Ringeta ku twisisa leswi a swi endleke hi ku tsundzuka leswaku hinkwerhu ha va ‘khunguvanyisa van’wana.’—Yakobo 3:2.

“Swa olova ku rivalelana loko hinkwenu mi endle xihoxo, kambe swa tika ku endla tano loko xi endliwe hi munhu un’we. Loko u rivalela swi kombisa leswaku wa titsongahata.”—Kimberly.

NSINYA WA NAWU WA LE BIBELENI: “Lulamisa timhaka hi ku hatlisa.”—Matewu 5:25.