EKA ndhavuko wa Vaisrayele, vuyimbeleri a byi ri bya nkoka swinene. Bibele yi vulavula ko tala hi vuyimbeleri bya swichayachayana ni bya marito. Bibele yi ni tinsimu to tala, xikombiso xa tinsimu toleto i buku ya Tipisalema, Risimu ra Solomoni na Swirilo. Hi ku ya hi buku ya Music in Biblical Life yi vula leswaku Bibele “yi kombisa leswaku vuyimbeleri a byi ri bya nkoka swinene evuton’wini bya Vaisrayele.”

Vuyimbeleri eka vutomi bya siku ni siku. Vaisrayele a va tirhisa vuyimbeleri ku kombisa ndlela leyi a va titwa hayona. (Esa. 30:29) Vavasati a va tlanga swingomana, va yimbelela va tsakile ni ku cina eminkhubyeni loko ku vekiwa hosi ni loko masocha ma hlurile. (Vaav. 11:34; 1 Sam. 18:​6, 7; 1 Tih. 1:​39, 40) Loko Vaisrayele va feriwile a ku ri ni tinsimu ta kona ta xirilo. (2 Tikr. 35:25) McClintock and Strong’s Cyclopedia yi vula leswaku a swi kanakanisi leswaku “vuyimbeleri a byi ri xiphemu lexikulu evuton’wini bya Vaheveru.”

Vuyimbeleri evuhosini. Tihosi ta Israyele a ti byi rhandza vuyimbeleri. Hosi Sawulo a a vitana Davhida endlwini yakwe ya vuhosi leswaku a ta n’wi tlangela vuyimbeleri. (1 Sam. 16:​18, 23) Hi ku famba ka nkarhi, loko Davhida se a ri hosi, u endle swichayachayana, a tsala tinsimu ni ku tlhela a hlela ntlawa wa vatlangi va swichayachayana etempeleni ya Yehovha. (2 Tikr. 7:6; Amo. 6:5) Hosi Solomoni a a ri ni swilombe swa vaxinuna ni swa vaxisati endlwini yakwe ya vuhosi.—Ekl. 2:8.

Vuyimbeleri evugandzerini. Xa nkoka swinene, Vaisrayele a va tirhisa vuyimbeleri loko va gandzela Yehovha. Kahlekahle a ku ri ni vanhu va 4 000 lava a va yimbelela etempeleni ya le Yerusalema. (1 Tikr. 23:5) A va tlanga swiphambati, switende, tiharipa ni timhalamhala. (2 Tikr. 5:12) Kambe vanhu lava a ku nga ri vona ntsena lava a va gandzela Yehovha hi vuyimbeleri. Swi vonaka onge Vaisrayele vo tala a va yimbelela Risimu Ra Lava Tlhandlukaka loko va ya eYerusalema eminkhubyeni ya lembe ni lembe. (Ps. 120-134) Hi ku ya hi matsalwa ya Xiyuda, Vaisrayele a va yimbelela Tipisalema to Dzunisa a hi nkarhi wa Paseka.

Vuyimbeleri bya ha ri bya nkoka eka vanhu va Xikwembu. (Yak. 5:13) Ha yimbelela loko hi dzunisa. (Efe. 5:19) Vuyimbeleri byi endla hi va ni vun’we ni vamakwerhu. (Kol. 3:16) Byi tlhela byi hi tiyisa loko hi ri emaxangwini. (Mit. 16:25) Ha yimbelela ku kombisa ripfumelo ra hina eka Yehovha ni ndlela leyi hi n’wi rhandzaka hayona.