Timinete to sungula ta 60 loko n’wana a ha ku tswariwa, i nkarhi wa nkoka swinene. Hikwalaho ka yini? Hikuva loko vamanana va tirhisa nkarhi wolowo leswaku va va ni vana va vona swi endla leswaku vana va kula kahle ni ku tlhariha. *

I yini lexi endlaka leswaku manana a khathala swinene hi n’wana wa yena la ha ku tswariwaka? Eka Buku leyi vuriwaka Journal of Perinatal Education, Profesa Jeannette Crenshaw u vula leswaku homoni leyi vuriwaka oxytocin ‘yi endla leswaku loko manana a ha ku veleka n’wana a titwa a n’wi rhandza, ngopfungopfu loko a n’wi khoma, a n’wi languta ni ku n’wi mamisa.’ Homoni yin’wana leyi vaka kona loko manana a ha ku tswala n’wana yi n’wi ‘pfuna leswaku a kombisa ku khathala hi n’wana wa yena’ ni ku tlhela yi tiyisa vuxaka bya yena ni n’wana wakwe. Hikwalaho ka yini sweswo swi ri swa nkoka?

I Muvumbi wa hina Yehovha Xikwembu, la nga ni rirhandzu, la endleke leswaku manana ni n’wana va va ni vuxaka byo tano. * Hosi Davhida u dzunise Xikwembu hi leswi xi n’wi ‘humeseke embelekweni’ ni leswi xi endleke leswaku a titwa a sirhelelekile emavokweni ya mana wakwe. U khongele a ku: “Ndzi lahleriwe ehenhla ka wena loko ndzi huma embelekweni, u ve Xikwembu xanga loko ndzi huma ekhwirini ra manana.”—Pisalema 22:9, 10.

ANAKANYA HI LESWI: Loko Xikwembu xi endle nchumu wolowo, lowu swi tikaka ku wu twisisa, leswaku manana a kota ku khathala hi n’wana wakwe, xana a swi le rivaleni leswaku Xikwembu xa khathala hi hina ‘vana va xona’?—Mintirho 17:29.

Yesu Kreste loyi a tivaka Muvumbi ku tlula vanhu hinkwavo, u dyondzise leswi: “Xana swindzingiri swimbirhi a swi xavisiwi hi mali ya nsimbi ya risima leritsongo ke? Kambe ku hava ni xin’we xa swona lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo. Hikokwalaho mi nga chavi: Mi ni risima ku tlula swindzingiri swo tala.”—Matewu 10:29-31.

A hi vangani lava nga na mhaka ni xindzingiri xin’wana ni xin’wana hambi ku ri ku xiya lexi waka ehansi. Nilokoswiritano, Tata wa hina wa le tilweni u ni mhaka ni xin’wana ni xin’wana xa swona! Naswona hambi ku ri swinyenyana swo tala a hi swa nkoka eka yena ku tlula munhu. Dyondzo ya kona yi le rivaleni: A wu fanelanga ‘u chava’ leswaku Xikwembu a xi na mhaka na wena. Xikwembu xa khathala swinene ha wena!

 Matsalwa lama hi tiyisekisaka

• “Mahlo ya Yehovha ma le ndhawini yin’wana ni yin’wana, ma tshama ma langute lavo biha ni lavanene.”—SWIVURISO 15:3.

• “Mahlo ya Yehovha ma le henhla ka lavo lulama, ni tindleve takwe ti yingisa xirilo xa vona xo kombela mpfuno.”—PISALEMA 34:15.

• “Ndzi ta tsaka ndzi tsakisisa hi musa wa wena wa rirhandzu, hileswi u voneke ku xaniseka ka mina; wa ma tiva maxangu ya moya-xiviri wa mina.”—PISALEMA 31:7.

Xana swi nga endla ku cinca evuton’wini bya hina ku tiva leswaku Xikwembu xa khathala hi vuhlayiseki bya hina naswona xi ni mhaka na hina hi leswi xi hi rhandzaka? Ina, hilaha Hannah, * wa le England a hlamuselaka ha kona:

“Mikarhi yo tala a ndzi vona onge Yehovha a nga ndzi rhandzi naswona swikhongelo swa mina a swi nga hlamuriwi. A ndzi anakanya leswaku hileswi ndzi kayivelaka ripfumelo. A ndzi anakanya leswaku ndzi le ku xupuriweni kumbe Xikwembu xi ndzi honisa hileswi ndzi nga riki wa nkoka. A ndzi twa onge a xi ndzi rhandzi.”

Hambiswiritano, sweswi Hannah a nga ha kanakani leswaku Yehovha Xikwembu wa khathala ha yena naswona wa n’wi rhandza. I yini lexi cinceke ndlela leyi a a titwa ha yona? U ri:“Swi endleke hakatsongotsongo. Ndzi tsundzuka mbulavulo wun’wana wa Bibele lowu ndzi wu tweke eka malembe yo tala lama hundzeke, lowu a wu vulavula hi xitlhavelo xa nkutsulo xa Yesu, lowu ndzi khumbeke swinene ni ku ndzi pfuna leswaku ndzi tiyiseka leswaku Yehovha wa ndzi rhandza. Nakambe loko ndzi swi vona leswaku swikhongelo swa mina swi hlamuriwile, ndzi xiririke mihloti hikuva a ndzi swi xiya leswaku Yehovha wa ndzi rhandza. Nakambe hi ku dyondza Bibele ni ku ya eminhlanganweni ya Vukreste ndzi dyondze swo tala hi Yehovha, vumunhu byakwe ni ndlela leyi a titwaka ha yona hi hina. Sweswi ndzi swi vona kahle leswaku Yehovha wa hi seketela, wa hi rhandza naswona u lava ku pfuna un’wana ni un’wana wa hina.”

Leswi Hannah a swi vulaka swa khutaza. Kambe u nga tiyiseka njhani leswaku Xikwembu xa yi twisisa ni ku tiva ndlela leyi u titwaka ha yona? Xivutiso lexi, xi ta hlamuriwa eka xihloko lexi landzelaka.