“Mi nga tshuki mi vilela hi siku leri landzelaka hikuva siku leri landzelaka ri ta va ni mivilelo ya rona. Siku rin’wana ni rin’wana ri ni swiphiqo swa rona leswi swi ri ringaneke.”—Matewu 6:34, Bibele—Matsalwa Yo Kwetsima Ya Misava Leyintshwa.

 “Mi nga tshuki mi vilela hi swa mundzuku, hikuva mundzuku wu ta tikarhatela swa wona. Ku karhateka ka siku rin’wana ni rin’wana, ku ringene rona.”—Matewu 6:34, Bibele—Mahungu Lamanene.

 Yesu loyi a vuleke marito lawa, u byele vayingiseri vakwe leswaku va nga vileli ku tlula mpimo hi swiphiqo swa le nkarhini lowu taka. Ematshan’weni ya sweswo, a swi ta va pfuna ku langutana ni swiphiqo swa siku rero ntsena.

 Yesu a nga vuli swona leswaku a hi fanelanga hi ehleketa hi siku ra mundzuku kumbe hi nga pulani vumundzuku. (Swivuriso 21:5) Kambe a hi pfuna leswaku hi nga vileli ngopfu hi swilo leswi nga ha endlekaka enkarhini lowu taka. Ku vilela ko tano ku nga hi tekela ntsako ku tlhela ku hi sivela ku endla swilo leswi hi faneleke hi swi endla. Ku vilela hi swilo swa le nkarhini lowu taka sweswi a swi nge hi pfuni nchumu. Mikarhi yo tala swilo leswi nga hi dyisiki byi rhelela a swi vi tano kumbe swi endleka hi ndlela leyi a hi ehleketa leswaku swi ta va ha yona.

 Yesu u boxe marito lawa eka Dyondzo yakwe leyi dumeke ya le ntshaveni, lama kumekaka eka Matewu tindzima 5 ku ya eka 7. Eka dyondzo yoleyo, Yesu u hlamusele leswaku ku vilela ngopfu a swi nge endli hi tsaka kumbe hi hanya nkarhi wo leha. (Matewu 6:27) U tlhele a vula leswaku loko hi rhangisa Xikwembu evuton’wini bya hina, a hi nge boheki ku vilela ngopfu hi vumundzuku. Loko Xikwembu xi khathalela swimilana ni swiharhi a xi nge tsandzeki ku endla hilaha ku fanaka eka lava xi tirhelaka.—Matewu 6:25, 26, 28-33.