Ku ni swikhongelo swin’wana leswi Xikwembu xi nga swi yingisiki. Xiya swivangelo swimbirhi.

1. Loko xi nga fambisani ni ku rhandza ka Xikwembu

 Xikwembu a xi swi hlamuli swikombelo leswi lwisanaka ni ku rhandza ka xona kumbe milawu ya xona leyi tsariweke eBibeleni. (1 Yohane 5:14) Hi xikombiso, Bibele yi lava leswaku hi papalata ku va ni makwanga. Ku gembula ku hlohlotela makwanga. (1 Vakorinto 6:9, 10) Hikokwalaho, Xikwembu a xi nge ku hlamuli loko wo kombela leswaku xi ku pfuna u wina mubejo kumbe lotto. Xikwembu a hi munhu loyi u nga n’wi rhumaka leswaku a a ku endlela xin’wana ni xin’wana lexi u xi lavaka. Kahle-kahle u fanele u xi nkhensa hikwalaho ka sweswo. Hikuva loko a swi nga ri tano, a hi ta chava hikwalaho ka leswi vanhu van’wana a va ta xi kombela leswaku xi swi endla.—Yakobo 4:3.

2. Loko loyi a khongelaka a xandzuka

 Xikwembu a xi xi yingisi xikhongelo xa lava va hlawulaka ku nga xi yingisi hi vomu. Hi xikombiso, lava a vula leswaku va xi gandzela kambe va hanya hi ndlela leyi kombisaka leswaku a va nga xi yingisi, Xikwembu xi va byele leswi: “Hambiloko mi endla swikhongelo swo tala, a ndzi yingisi; mavoko ya n’wina ma tele ku halata ngati.” (Esaya 1:15) Kambe loko a va cince ndlela leyi a va hanya ha yona naswona va ‘lulamisa timhaka’ ni Xikwembu, a xi ta va xi yingise swikhongelo swa vona.—Esaya 1:18.