Timbhoni ta Yehovha ti xixima mimfumo ni mimfungho leyi yi yimelaka. Ha swi xixima leswaku van’wana va nga hlawula ku losa mujeko kumbe ku yimbelela risimu ra rixaka.

 Hambiswiritano, Timbhoni ta Yehovha ti hlawula ku nga katseki eka minkhuvo yo tano hikuva yi lwisana ni leswi Bibele yi swi dyondzisaka. Ha tsaka loko van’wana va xixima leswi hi pfumelaka eka swona tanihi leswi na hina hi xiximaka leswi va pfumelaka eka swona.

Eka nhlokomhaka leyi

•  Hi tihi tidyondzo ta le Bibeleni leti katsekaka?

•  Ku vuriwa yini loko ku ri nawu lowu vulaka leswaku hi fanele hi katseka?

•  Xana Timbhoni ta Yehovha ta nghenelela eka swa tipolitiki?

 Xiya tinhla timbirhi ta le Bibeleni leti khumbaka swiboho swa hina:

•   I Xikwembu ntsena xi faneriwaka hi ku dzunisiwa. Bibele yi ri: “U fanele u gandzela Yehovha Xikwembu xa wena u tirhela yena ntsena.” (Luka 4:8) Tinsimu ta rixaka mikarhi yo tala ti katsa marito lama kombisaka ku rhandza tiko ku tlula swilo hinkwaswo. Hikwalaho, Timbhoni ta Yehovha a ti katseki eka minkhuvo yo tano hikwalaho ka ripfalo ra tona.

   Timbhoni ta Yehovha ti teka ku losa mujeko ku ri ndlela yin’wana yo gandzela, ku nga leswi Bibele yi nga swi pfumeleriki. (1 Vakorinto 10:14) Van’wamatimu van’wana va teka mujeko ku ri swifaniso swa vugandzeri. N’wamatimu Carlton J.H Hayes u tsale leswi: Mujeko i mfungho lowukulu wa ripfumelo, tlhelo nchumu wo gandzela hi wona wa vutiko. a Loko swi ta eka Vakreste vo sungula Mutsari Daniel P. Mannix u xiye leswi: “Vakreste va ale ku . . . gandzela mufumi wa [Rhoma] ku nga nchumu lowu namuntlha wu fanaka ni ku ala ku losa mujeko.” b

  Hambileswi Timbhoni ta Yehovha ti nga wu losiki mujeko a ti wu hisi kumbe ku endla swin’wana leswi kombisaka leswaku a ti wu xiximi naswona ti endla hilaha ku fanaka ni le ka mimfungho yin’wana ya tiko.

•   Eka Xikwembu vanhu hinkwavo va ringana. (Mitirho 10:34, 35) Bibele yi vula leswaku Xikwembu “xi endle tinxaka hinkwato ta vanhu.” (Mitirho 17:26) Hikwalaho ka sweswo, Timbhoni ta Yehovha ti tshemba leswaku swi ta va swi hoxile ku khoma rixaka kumbe tiko ro karhi onge hi loko ri antswa ku tlula rin’wana. Hi khoma vanhu hinkwavo ku fana swi nga ri na mhaka leswaku va huma kwihi kumbe va tshama kwihi.—1 Petro 2:17.

 Timbhoni ta Yehovha a ti lwisani na mfumo. Hi tshemba leswaku Xikwembu hi xona xi pfumelelaka mimfumo leswaku yi va kona tanihi xiphemu xa ‘lunghiselelo ra Xona.’ (Varhoma 13:1-7) Hi tlhela hi pfumela leswaku Vakreste va fanele va yingisa lava rhangelaka. —Luka 20:25.

 Xana u ta endla yini loko milawu ya mfumo yi lava u endla leswi Yehovha a nga swi tsakeriki? Eka swiyimo swin’wana, u nga endla xikombelo eka mfumo leswaku wu olovisa yin’wana ya milawu yoleyo. c Loko swi nga koteki leswaku milawu yoleyo yi olovisiwa, Timbhoni ta Yehovha hi xichavo ti hlawula ku “yingisa Xikwembu tanihi mufumi ku tlula vanhu.” —Mitirho 5:29.

 Doo! Timbhoni ta Yehovha a ti ngheneleli etimhakeni ta swa tipolitiki. Loko hi nga losi mujeko kumbe ku yimbelela tinsimu ta rixaka a swi vuli swona leswaku hi lwisana ni van’watipolitiki. Ematshan’weni ya sweswo, hi yingisa milawu ya le Bibeleni loko swi ta eka minkhuvo yoleyo.