Loko Timbhoni timbirhi ta Yehovha ti ri eku chumayeleni hi yindlu ni yindlu, ti gongondze emutini wun’wana. Wanuna loyi a a pfilunganyekile u pfule nyangwa; endzhaku ka yena a ku ri ni ntambhu leyi a yi lengalenga ehenhla ka switepisi.

Loko wanuna loyi a va byele leswaku va nghena endlwini, va n’wi vutisile leswaku ha yini ntambhu yoleyo a yi ri kwalaho. U va byele leswaku a a lava ku tidlaya kambe loko a twe ku gongondziwa, u tibyele leswaku a pfula ro hetelela. Timbhoni ti kombisane na yena ivi ti n’wi heleketa eka dokodela leswaku a n’wi pfuna.

Mhaka leyi yi humelele eka phepha-hungu ra le Belgium. Hambiswiritano, yi tele minkarhi leyi Timbhoni ti pfuneke vanhu lava a va lava ku tidlaya. Twana timhaka tin’wana leti fanaka leti humaka emisaveni hinkwayo.

Wansati un’wana eGreece u tsale a ku: “Ndzi hetiwe matimba swinene hi wanuna loyi a ndzi tshama na yena hiloko ndzi khomiwa hi ntshikilelo lowukulu wa mianakanyo. Ndzi twe ku vava swinene lerova ndzi teke xiboho xo tidlaya. Ku ehleketa hi ku tidlaya swi ndzi rhule ndzhwalo—a ndzi lava ku herisa ku vava loku a ndzi ku twa.”

Ematshan’weni yo tidlaya, wansati loyi u lave mpfuno wa madokodela. Endzhakunyana ka nkarhi, u lave Timbhoni naswona u sungule ku dyondza Bibele ni ku ya eminhlanganweni ya tona. U tsale a ku: “Ndzi kume rirhandzu ra xiviri eka vamakwerhu va moya leri a ndzi ri lava malembe lawa hinkwawo. Ndzi kume vanghana va ntiyiso lava ndzi nga va tshembaka. Ndzi ni ku rhula embilwini ni ntsako naswona a ndzi vileli hi vumundzuku.”

Mbhoni yin’wana eNgilandhi yi tsale yi ku: “Munghana wa mina un’wana u ndzi vitanile a karhateke swinene naswona u ndzi byele leswaku u lava ku tidlaya vusiku byebyo. Ndzi kombisane na yena ni ku n’wi hlayela matsalwa lama chavelelaka ndzi tirhisa tinhla leti humaka exihlokweni xin’wana xa Xalamuka! ya May 2008 lexi solaka ku tidlaya. Eku heteleleni a a nga ha lavi ku tidlaya ku nga khathariseki swiphiqo leswi a a ri na swona.”

EGhana, Michael, Mbhoni yin’wana ya Yehovha, u sungule bulo ni nhwanyana un’wana loyi a xavisaka swilo laha yena a tirhaka kona. Siku rin’wana, u xiye leswaku nhwanyana loyi a a karhatekile swinene naswona u n’wi vutisile leswaku ha yini a karhatekile.

U vule leswaku a a lava ku tidlaya hikuva nuna wakwe u n’wi tshikile a ya teka nsati un’wana. Michael u n’wi chavelerile ivi a n’wi nyika tibuku timbirhi leti hlamuselaka Matsalwa. Rungula leri a ri hlayeke eka tona ri n’wi susumetele ku va a tshika ku lava ku tidlaya. Kutani u ye emahlweni a hlaya Bibele naswona sweswi i Mbhoni ya Yehovha.

Phepha-hungu rin’wana eUnited States ri vike leswaku jaha rin’wana leri nga Mbhoni ri xiye movha yin’wana leyi a yi pakiwile kambe yi ri karhi yi duma loko ri ri eku chumayeleni.

Ri te: “Ndzi vone phayiphi ya mati leyi a yi tlhomiwe eka phayiphi ya movha yo humesa musi. Makumu ya yona a yi nghene efasitereni ra movha, leri a ri pfariwe hi ku helela hi xinamarheti.

“Loko ndzi hatlise ndzi ya emovheni, ndzi langute efasitereni kutani ndzi vona wansati a ri eku rileni, a rhendzeriwe hi musi wa ntima wa movha. Ndzi huwelele ndzi ku: ‘U endla yini?’

“Loko ndzi lava ku pfula nyangwa, ndzi vone vana vanharhu exitulwini xa le ndzhaku. Ndzi pfule nyangwa hiloko wansati loyi a ku: ‘Ndzi lava ku famba! Ndzi lava ku famba! Ndzi lava ku famba ni vana va mina.’

“Ndzi hlamule ndzi ku, ‘Ndza ku kombela u nga tidlayi, ku tidlaya a hi ntlhantlho!’

“U ndzi hlamule a ku: ‘Ndzi fanele ndzi ya etilweni. Ndzi fanele ndzi famba ni vana va mina.’

“Loko a ya emahlweni a rila, ndzi khinsamile hiloko ndzi sungula ku rila. Ndzi tlhele ndzi ku, ‘Ndza ku kombela u nga tidlayi.’ Kutani ndzi tshambulute voko ra mina ndzi n’wi khoma kutani ndzi n’wi koka kahle leswaku a huma emovheni.

“Hiloko a huwelela a ku, ‘Ponisa vana va mina!’

“Hiloko vana va tshambuluta mavoko. A ku ri swinhwanyetana swimbirhi swa malembe ya mune na ntlhanu ni xifanyetana xa malembe mambirhi. A swi tshame exitulwini xa le ndzhaku xa movha swi miyerile, swi nga swi tivi leswaku hi xinkarhana a swi ta va swi file.

“Endzhaku ka loko hinkwavo ka vona va humile emovheni, ndzi time njhini ya movha. Kutani hinkwerhu hi tshame ekhumbini ro koma hiloko ndzi ku, ‘Ndzi byeleni.’”

Timbhoni ta Yehovha ti teka vutomi tanihi nyiko ya nkoka leyi humaka eka Muvumbi wa hina. Emisaveni hinkwayo ti tikarhatela ku chavelela lava feriweke hi varhandziwa va vona hi ku tidlaya ni ku pfuna lava ringeteke ku tidlaya.