Kutikhoma swi vula:

• kunga nyimeli kukuma leswi uswi lavaka hi nkama lowu uswi lavaka ha wona

• kuhlula kunavela ka mbilu

• kuyendla nchumu xokarhi anze uxi heta hambiloko ungaxi tsakeli

• kurhangisa leswi van’wana vaswi lavaka kumbe vona hi kukongoma

Vatsongwana lava tikhomaka vaswi kota kuyala nchumu xa kubiha hambiloko xi tikomba xi tsakisa swinene. Kuhambana na vona, vatsongwana lava tsandzekaka kutikhoma va tolovela:

• kuleva hintamu

• kuva ni gome

• kukukutlela gwala ni kudzaha timbangi

• kudla swakudla leswinga nyikiki lihanyo

Vativi van’wana va tsumbule swaku vanhu lava tikhomaka loko vaha li vatsongo hi xitalu loko se va kulile va ni swikarhato switsongo swa lihanyu ni swa timale naswona va landzela minawu ya tiko. Leswi tsumbuliweke hi vativi lava swi yendle swaku Angela Duckworth, lweyi a djondzisaka a Universidadi la Pennsylvania a gimeta hileswaku “kutikhoma i ka lisima minkama hinkwayu.”

Mu djondzisi kutwisisa swaku ahihim wa wena i ahihim.

LESWI BIBELE LISWI DJONDZISAKA: “Akuvulavuleni ka n’wina [ahihim] aave Ahihim”. — Matewu 5:37.

Vatsongwana vanyingi loko va lava nchumu va tshuka va ba huwa kumbe kurila. Hi kukala vanga tsaki hi kuvona vana va vona va rila kumbe va ba huwa, vapsali va tolovela kuva nyika leswi vaswi lavaka. Kambe loko va yendla leswo, vana vata tshamela kuyendla leswi fanaka minkama hinkwayu loko va lava nchumu.

Kambe loko vapsali vangava nyiki vana va vona leswi vaswi lavaka, vava pfuna kuvona leswaku ahingeswi koti kukuma leswi hiswi lavaka minkama hinkwayu. Dr. David Walsh a kombise leswaku “vapsali lava nyikaka vana xin’wana ni xin’wana lexi vaxi lavaka vova henha hikusa vata kula na va pimisa leswaku minkama hinkwayu vataswi kuma leswi vaswi lavaka. Kasi vana lava djondzisiwaka kutikhoma va tsaka hintamu awuton’wini kutlula lava kalaka vanga djondzisiwanga.” *

 Loko ungamu yinki n’wana wa wena xin’wana ni xin’wana lexi axi lavaka utava umu djondzisa kutikhoma. Leswo switamu pfuna kutiva kuyala swilo swa kubiha loko se a li mukulu, hi xikombiso loko a sindzisiwa kudzaha, kutikhoma hi ndlela yobiha hi tlhelo la masangu kumbe kuyendla swilo swin’wana swa kubiha.

Mu pfuni kutwisisa swaku leswi aswi yendlaka swita va ni vuyelo, kungaha va la kubiha kumbe lalinene.

LESWI BIBELE LISWI DJONDZISAKA: ‘Xin’wana ni xin’wana lexi munhu axibyalaka, atatshovela xona’. — Vagalatiya 6:7.

U fanele u djondzisa n’wana wa wena kutwisisa swaku leswi aswi yendlaka swita va ni vuyelo ni leswaku loko a tsandzeka kutikhoma swilo aswingatamu fambela kahle. Hi xikombiso, loko n’wana wa wena a li munhu wa kukala anga hlweli kukwata, vanhu van’wana swingahava tikela kumu rhandza. Kasi loko a tikhoma, anga hantliseli kuyangula hambiloko vamu q’ala kumbe kumu pfuka, van’wana vataswi tsakela kutlanga na yena. Mu pfuni kutwisisa swaku wutomi la yena lita tsakisa swinene loko a kota kutikhoma.

Djondzisa n’wana wa wena kutiva leswi a faneleke aswi rhangisa.

LESWI BIBELE LISWI DJONDZISAKA: ‘Mitakota kuhlawula leswinga swinene kutlula swin’wana.’ — Vafilipiya 1:10.

Handle ka kuhi pfuna leswaku hinga yendli swilo leswi hoxeke, kutikhoma kungahi pfuna kuyendla swilo leswi hi faneleke hiswi yendla hambiloko hingaswi tsakeli swilo swa kona. Hi mhaka leyo, i swa lisima kudjondzisa n’wana wa wena kutiva leswi a faneleke aswi rhangisa. Hi xikombiso, ka kuhamba T.P.C. ni kutlanga, n’wana a fanele a djondzisiwa swaku T.P.C. i la lisima kutlula kutlanga.

Vana xikombiso lexinene.

LESWI BIBELE LISWI DJONDZISAKA: ‘Nimivekele xikombiso, leswaku na n’wina miyendlisa leswi ningayendlisa swona ka n’wina.’ — Yohane 13:15.

U yangulisa kuyini loko kuhumelela nchumu lexiku kwatisaka kumbe lexiku hetaka ntamu? Ahinge n’wana wa wena a yendle nchumu xa kubiha swinene. Awuta yangulisa kuyini? Awuta tikhoma kumbe awuta hantla u kwata? Loko u tikhoma, uta va u djondzisa n’wana wa wena swaku hambiloko vanhu vahi kwatisa kumbe vahi heta ntamu, hi fanele hi tikhoma, hinga hantliseli kukwata.