1. Hi swini swilo swa swinene leswi vanhu va Xikwembu va swi yentxaka?

 BIBELE se a li vulile swaku vanhu va Xikwembu “va ta tinyikela hi ku swi rhandza” ka ntirho wa Yehovha na va kongomisiwa hi Yesu Kreste. (Pis. 110:3) Phela wuprofeta leli, la hetiseka namuntlha. Hi xikombiso, lembe ni lembe va heta mawora ya manyingi na va yentxa ntirho wa ku chumayela. Phela minkama yin’wana swi lava va tirhisa male ya vona ni swilo swa vona swaku va yentxa ntirho lowu, kambe va wu yentxa hi ku swi rhandza va tlhela va pfuna vamakwerhu va vona hi ku va nyika leswi va swi lavaka, va va tiyisa va tlhela va va pfuna swaku va tiyisa wunghanu la vona na Yehovha. Naswona madoda ni vapfunisi va bandla va heta nkama wa wunyingi na va lunghiselela madixkursu ya mintlhanganu va tlhela va ya pfuxela vamakwerhu leswaku va va tiyisa. Hi mhaka muni vanhu va Yehovha va yentxa swilo leswi hinkwaswu? Hikusa va mu rhandza hintamu Yehovha va tlhela va rhandza vanhu van’wana. — Mat. 22:37-39.

2. Hi ku ya hi Varoma 15:1-3, hi xini xikombiso xa xinene lexi Yesu a nga hi vekela xona?

² Yesu a hi vekele xikombiso xa xinene xa ku pfuna vanhu van’wana, hi ku rhangisa leswi laviwaka hi van’wana ku tlula ku yentxa swilo leswi a swi ta tsakisa yena ntsena. Se hi fanele hi yentxa hinkwaswu leswi hi nga swi kotaka swaku hi tekelela xikombiso xa yena. (Lerha Varoma 15:1-3.) Loko hi yentxa leswo, hi ta swi twisisa kahle leswi Yesu a nga swi vula, loko a te: “Swi tsakisa hintamu ku nyika ku tlula ku yamukela.” — Mint. 20:35.

3. Hi ta djondza hi yini ka nhlokomhaka leyi?

³ Ka nhlokomhaka leyi, hi ta djondza hi swilo leswi Yesu a nga swi yentxa swaku a pfuna vanhu van’wana ni swaku hi nga xi tekelelisa ku yini xikombiso xa yena. Hi ta tlhela hi vona swaku hi nga yentxa yini swaku hi pfuna vanhu van’wana.

4. Yesu a swi kombisise ku yini swaku a a rhangisa ku pfuna vanhu van’wana ku tlula ku yentxa swilo leswi a swi ta pfuna yena ntsena?

⁴ Yesu a a pfuna van’wana hambiloko a karhalile. Pimisa hi leswi Yesu a nga swi yentxa, nkama lowu vanhu va vanyingi va nga mu yela na a li nhaveni. Phela swi nga yentxeka nhava yoleyo a yi li kusuhi ni Kapernawumi. Yesu a hete wusiku hinkwalu na a khongela, naswona a a karhalile. Kambe nkama a nga vona vanhu volavo na va mu tela, a khumbeke mbilu loko a vona swaku xikarhi ka vona a ku ni swisiwana ni vanhu lava a va vabya. Yesu a dahe vanhu volavo a tlhela a va vekela dixkursu leli nga va yentxa va tsaka hintamu, ku nga Dixkursu la le Nhaveni, leli hambi swoswi li hi pfunaka hintamu. — Luk. 6:12-20.

5. Tinhloko ta mindjangu ti nga xi tekelelisa ku yini xikombiso xa Yesu hambiloko ti karhalile?

⁵ Leswi tinhloko ta mindjangu ti nga mu tekelelisaka xiswona Yesu. Pimisa hi xiyimu lexi: Papayi wa ndjangu a heta siku hinkwalu na a li ntirhweni naswona a vuya kaya na a karhalile hintamu. Hi mhaka leyo, a pimisa hi ku kala a nga li fambisi Wugandzeli la Ndjangu ka wusiku lolelo. Kambe a khongela ka Yehovha a mu kombela swaku a mu nyika ntamu wa ku fambisa Wugandzeli la Ndjangu. Se Yehovha a hlamula xikhongelo xa yena hi ku mu pfuna swaku a fambisa Wugandzeli la Ndjangu. Hi wusiku lolelo, vana va vona va djondze nchumu wa lisima hintamu hikusa va vone swaku ka vapsali va vona ku tirhela Yehovha i swa lisima hintamu.

6. Hambileswi Yesu a a swi lava ku tshama a li yexe, i yini leswi a nga swi yentxa swaku a pfuna vanhu?

⁶ Yesu a tirhise nkama wa yena swaku a pfuna van’wana hambiloko a lava ku va yexe. Pimisa hi leswi Yesu a nga titwisa xiswona nkama a nga tiva swaku munghanu wa yena Yohani Mutsakamisi a file. Yesu a vaviseke hintamu hi mhaka leyo. Naswona Bibele li li: “Loko Yesu a swi twa, a suka kolanu hi boti, a ya nhoveni swaku a ya va yexe.” (Mat. 14:10-13) Phela swa twala ku va Yesu a lave ku tshama a li yexe hikusa van’wana ka hina loko hi kumana ni xiyimu lexi fanaka ha swi rhandza ku tshama hi li hoxe. Kambe Yesu a nga swi kotanga ku tshama a li yexe nkama a nga feliwa hi munghanu wa yena, hikusa xitshungu xi rhange xi fika ka  ndhawu leyi a a ya ka yona, na yena a nga se fika. Se a yentxe yini? Yesu a pimise hi leswi a nga va pfunisaka xiswona vanhu volavo naswona ‘a va twele wusiwana.’ Yesu a swi vonile swaku vanhu lavayani a va lava ku tiyisiwa hi Xikwembu. Hi mhaka leyo, hi ku hantlisa, a tekele ku va pfuna a tlhela ‘a sungula ku va djondzisa minchumu ya yinyingi.’ — Marku 6:31-34; Luk. 9:10, 11.

7-8. Nyikela xikombiso xa leswi madoda ma swi yentxaka loko makwerhu a lava ku pfuniwa abandleni.

⁷ Madoda ma nga mu tekelelisa ku yini Yesu? Hi wu khensa hintamu ntirho lowu madoda ma wu yentxaka swaku ma hi pfuna. Ku tala ka hina, a hi yi tivi mintirho hinkwayu leyi madoda ma yi yentxaka swaku ma hi pfuna. Hi xikombiso, loko ku ni makwerhu lweyi a lavaka ku pfuniwa hi xihantla hileswi a vabyaka, madoda lawa ma tirhaka ka ku vulavulisana ni swibelhela ma yentxa hinkwaswu leswi ma nga swi kotaka swaku ma mu pfuna hi ku hantlisa. Phela minkama yin’wana, vamakwerhu va lava ku pfuniwa niwusiku hintamu, kambe leswi madoda lawa ma va rhandzaka hintamu vamakwerhu, wona ni mindjangu ya wona ma yentxa leswi ma nga swi kotaka swaku ma va pfuna.

⁸ Madoda ma tlhela ma tinyikela swaku ma pfunisa ka ku yaka Tiyindlo ta Wugandzeli ni tindhawu tin’wana leti tirhiseliwaka ku gandzela Yehovha ma tlhela ma pfunisa loko vamakwerhu va kumana ni swidzedze, tindhambi kumbe ku tsekatseka ka misava. Naswona, ma heta nkama wa wunyingi na ma hi djondzisa, ma hi tiyisa ma tlhela ma hi pfuna. Phela hinkwerhu hi fanele hi ma khensa hintamu madoda ni mindjangu ya wona hi leswi va swi yentxaka naswona hi navela swaku Yehovha a tama a katekisa minzamu leyi va yi yentxaka swaku va hi pfuna. Hambileswo,  madoda ma fanele ma tinyika nkama wa ku yentxa swilo swin’wana swa lisima. Madoda a ma fanelanga ma heta nkama wa wunyingi na ma yentxa mintirho ya bandla lakaku ma nga wu kumi nkama wa ku pfuna mindjangu ya wona.

9. Hi ku ya hi Vafilipiya 2:4, 5, i yini leswi hinkwerhu hi faneleke hi swi yentxa?

⁹ Lerha Vafilipiya 2:4, 5. I ntiyiso swaku a hi hinkwerhu hi nga madoda. Kambe i swa lisima kuva hinkwerhu hi tekelela xikombiso xa Yesu hi ku pfuna van’wana ku tlula ku yentxa minchumu leyi tsakisaka hina ntsena. Bibele li vula swaku Yesu ‘a tiyentxe xikarawa.’ (Filp. 2:7) Pimisa hi leswi hi nga swi djondzaka ka marito ya ndzimana leyi. Phela xikarawa xa xinene xi yentxa hinkwaswu leswi xi nga swi kotaka swaku xi tsakisa n’winyi wa xona. Se, leswi hi nga swikarawa swa Yehovha hi tlhela hi tirhela vamakwerhu, hi swi lava hintamu ku yentxa swilo leswi nga ta tsakisa Yehovha hi tlhela hi pfuna vamakwerhu. Leswo swi nga koteka loko hi yentxa swilo leswi landzelaka.

10. Hi swini swivutiso leswi hi faneleke hi tivutisa swona?

¹⁰ Pimisa hi leswi u swi yentxaka. Tivutisi leswi: ‘Ni tinyimisele ku yentxa hinkwaswu leswi ni nga swi kotaka swaku ni pfuna van’wana? Ni ta yentxa yini loko va ni kombela swaku ni ya pfuxela makwerhu lweyi a nga guga naswona a kalaka a nga humi kaya? Kumbe ni pfuna makwerhu wawansati lweyi a nga guga swaku a ya mintlhanganwini? Ni tinyikela hi xihantla loko ku kombeliwa vamakwerhu swaku va yentxa limpeza ka ndhawu leyi ku nga ta yentxeliwa ka yona a kongresu kumbe loko ku kombeliwa vanhu swaku va ya lunghisa swilo ka Yindlo ya Wugandzeli?’ Nkama lowu hi nga tinyiketela ka Yehovha, hi mu tshembise swaku hi ta tirhisa wutomi la hina hinkwalu kuva hi mu tirhela. Hi mhaka leyo, a lava leswaku hi tirhisa nkama wa hina, ntamu ni swilo leswi hi nga na swona swaku hi mu tirhela. Naswona Yehovha wa tsaka loko hi yentxa leswo. Se hi nga yentxa yini loko hi vona swaku ku ni lani hi faneleke hi yampsisa kona?

11. Ku khongela swi nga ku pfunisa ku yini loko swi ku karhatela ku pfuna vanhu van’wana?

¹¹ Khongela ka Yehovha hi mbilu hinkwayu. A hi nge u vona swaku u fanele u yampsisa leswaku u pfuna vanhu van’wana, kambe swa ku karhatela. Loko ku li leswo, khongela ka Yehovha u mu kombela swaku a ku pfuna. Mu byeli leswi u titwisaka xiswona, u tlhela u mu kombela swaku a ku nyika “ntamu wa ku yentxa leswi yena a swi lavaka.” — Filp. 2:13.

12. Majovhem ma nga yentxa yini swaku ma pfuna ka mabandla ya wona?

¹² Loko wa ha li jovhem naswona se u tsakamisiwile, kombela Yehovha swaku a ku pfuna swaku u yentxa leswi u nga swi kotaka leswaku u pfuna vamakwerhu abandleni. Ka matiko man’wana ku ni madoda ya manyingi ku tlula vapfunisi va bandla, naswona vapfunisi volavo va bandla a hi majovhem. Leswi nhlengeletanu ya Yehovha yi yaka yi kula, ku laveka vamakwerhu lava nga majovhem leswaku va pfuna madoda ku hlayisa vamakwerhu amabandleni. Phela loko u tinyikela leswaku u pfuna vamakwerhu abandleni u ta tsaka hintamu. Hi mhaka muni? Hikusa u ta tsakisa Yehovha funtshi vamakwerhu abandleni va ta swi vona swaku wa swi rhandza ku pfuna van’wana, naswona u ta tsaka hileswi u swi rhandzaka ku pfuna van’wana.

13-14. Hi swini swilo leswi hi nga swi yentxaka swaku hi pfuna vamakwerhu? (Vona mufoto wa pajina la ku sungula.)

¹³ Zama ku tiva lava va lavaka ku pfuniwa. Mupostolo Pawulo, a byele Vakreste lava a va tshama Yudiya a ku: “Mi nga khohlweni ku yentxa minchumu ya yinene ni ku pambulela  van’wana leswi mi nga na swona, hikusa Xikwembu xi tsaka hintamu hi magandzelo lawa.” (Heb. 13:16) Leswi mupostolo Pawulo a nga swi byela Vakreste volavo, swi va pfunile hikusa ndzhakunyana ka leswo, Vakreste lava a va tshama Yudiya a va fanele va tshika makaya ya vona, mintirho ya vona ni maxaka ya vona lawa a ma nga tirheli Yehovha leswaku ‘va baleka va ya ka tinhava.’ (Mat. 24:16) Hi nkama wolowo a swi laveka hintamu kuva Vakreste volavo va pfuna van’wana. Phela loko Vakreste volavo a va yo yingisa marito ya Pawulo, ya ku va fanele va pfuna van’wana a swi ta va vevukela ku titwananisa ni wutomi la vona la nyuwani.

¹⁴ A hi minkama hinkwayu leyi vamakwerhu va hina va nga ta hi byela leswi va swi pfumalaka. Hi xikombiso, loko makwerhu wawanuna a feliwa hi nsati wa yena, swi nga yentxeka a lava ku nyikiwa swakudla, ku yentxeliwa mintirho ya le kaya kumbe a pfuniwa hi swin’wana. Kambe swi nga yentxeka a nga kombeli ku pfuniwa hileswi a pimisaka swaku a nga hi karhata. Phela makwerhu lweyi, a nga tsaka hintamu loko hi mu pfuna hambiloko a nga hi kombelanga. Se a hi fanelanga hi pimisa swaku vanhu van’wana va ta mu pfuna makwerhu wa hina kumbe hi pimisa swaku loko a lava ku pfuniwa a ta hi byela. Tivutisi leswi: ‘Loko a ni li ka xiyimu xa ku fana ni lexi, a ni ta lava ku pfuniwa hi yini?’

15. Hi nga yentxa yini swaku hi pfuna vanhu van’wana?

¹⁵ Yentxa swaku vamakwerhu va nga chavi ku ku kombela swaku u va pfuna. Swi nga yentxeka u tiva vamakwerhu va bandleni la wena lava minkama hinkwayu va nga tinyimisela ku pfuna van’wana. Vamakwerhu lava, va hi yentxa hi nga chavi ku kombela swaku va hi pfuna, naswona minkama hinkwayu ha swi tiva swaku va tinyimisele ku hi pfuna, funtshi ha swi  navela ku fana na vona. Makwerhu Alan, lweyi i nga doda naswona a nga ni 45 wa malembe, a swi lava hintamu ku tekelela xikombiso xa Yesu ni ku pfuna van’wana. Yena a te: “Yesu a a ni swilo swa swinyingi swa ku swi yentxa, kambe vanhu va tintanga hinkwatu a va nga chavi ku kombela Yesu swaku a va pfuna. Phela vanhu volavo a va swi vona swaku Yesu wa va rhandza. Ni swi lava hintamu ku tekelela xikombiso xa Yesu ni tiviwa ni li munhu lweyi a rhandzaka ku pfuna van’wana ni ku va tiyisa.”

16. Hi ku ya hi Tipisalema 119:59, 60, i yini swi nga ta hi pfuna ku tekelela xikombiso xa Yesu?

¹⁶ A hi fanelanga hi hela ntamu loko swi hi karhatela ku tekelela Yesu. (Yak. 3:2) Munhu lweyi a djondzisiwaka a nge vi ni wutivi la ku tlula lweyi a mu djondzisaka. Kambe loko a ya a djondza swi ta mu vevukela ku tekelela mudjondzisi wa yena a tlhela a yampsisa lani a faneleke a yampsisa kona. Hi ku fana, loko hi tirhisa leswi hi swi djondzaka ka Bibele, swi ta hi vevukela ku tekelela xikombiso xa Yesu hi kusuhi. — Lerha Tipisalema 119:59, 60.

17-18. Hi mhaka muni swi li swa lisima ku tekelela xikombiso xa Yesu xa ku pfuna vanhu van’wana?

¹⁷ Loko hi pfuna vamakwerhu, vanhu van’wana na vona va ta lava ku tekelela xikombiso xa hina. Makwerhu Tim lweyi i nga doda a te: “Vamakwerhu van’wana lava nga majovhem, va ve vapfunisi va bandla hileswi va nga tekelela vamakwerhu lava nga tinyimisela ku pfuna vanhu van’wana. Majovhem wolawo, ma li pfuna hintamu bandla la hina hikusa ma pfuna madoda ku yentxa mintirho ya wona.”

¹⁸ Hi hanya ka misava leyi vanhu va vanyingi va kalaka va nga swi rhandzi ku pfuna vanhu van’wana, kambe hina vanhu va Yehovha hi hambanile ni vanhu volavo, hikusa hi tinyimisele ku tekelela xikombiso xa Yesu hi tlhela hi pfuna vanhu van’wana. I ntiyiso swaku a hi nge swi koti ku tekelela xikombiso xa Yesu hi ku helela, kambe hi nga swi kota ku “landzelela minkondzo ya yena” hi kusuhi. (1 Ped. 2:21) Loko hi yentxa hinkwaswu leswi hi nga swi kotaka swaku hi tekelela xikombiso xa Yesu xa ku pfuna van’wana hi ta tsaka naswona hi ta dzunisa Yehovha.