Йәһвә Шаһитләре бар Изге Язмаларның «Аллаһы тарафыннан рухландырылган һәм... файдалы» булуына ышана (2 Тимутигә 3:16). Бу Язмаларга Тәүрат, Зәбур, пәйгамбәрләр китаплары һәм Инҗил керә. Гадәттә, Йәһвә Шаһитләре аларның бер өлешен — Еврей Язмалары, икенчесен Мәсихче Грек Язмалары дип атый.

 Изге Язмаларда: «Элек язылганнарның барысы да... безгә үгет-нәсыйхәт бирер өчен язылган»,— дип әйтелә (Римлыларга 15:4). Шулай итеп, бөтен Изге Язмаларда файдалы мәгълүмат бар: мәсәлән, мөһим тарихи фактлар һәм гамәли киңәшләр.

•   Мөһим тарихи фактлар. Тәүрат китабында Аллаһының бөтен нәрсәне ничек барлыкка китергәне һәм кешелекнең ничек гөнаһ юлына басканы турында әйтелә. Андый мәгълүмат булмаса, мондый сорауларга канәгатьләндерерлек җаваплар таба алмас идек: без ничек барлыкка килгәнбез? Кешеләр ни өчен үлә? (Яратылыш 2:7, 17). Өстәвенә, Еврей Язмаларында, кешеләр безнекенә охшаш хисләр һәм авырлыклар кичергәндә, Йәһвә Аллаһының алар белән ничек мөгамәлә иткәне турында әйтелә (Ягъкуб 5:17).

•   Гамәли киңәшләр. Еврей Язмаларының Гыйбрәтле сүзләр һәм Вәгазьче китапларында тормыш өчен һәрвакыт файдалы булган акыллы киңәшләр бар. Алар гаилә тормышында бәхетле булырга (Гыйбрәтле сүзләр 15:17), эшкә акыллы караш сакларга булыша (Гыйбрәтле сүзләр 10:4; Вәгазьче 4:6) һәм яшьләргә бәхетле тормыш юлын күрсәтә (Вәгазьче 11:9—12:1).

 Өстәвенә, Муса пәйгамбәр язган Тәүрат китабы да файда китерә. Мәсихчеләр бүген Тәүрат, ягъни Муса кануны буенча яшәмәсәләр дә, андагы кыйммәтле принципларны куллану безгә бәхетле тормыш алып барырга булыша (Левиләр 19:18; Канун 6:5—7).