Йәһвә Шаһитләре аста китерелгән сәбәпләр нигезендә сугышта катнашмый:

1.   Без Аллаһыга тыңлаучан. Изге Язмаларда әйтелгәнчә, Аллаһы хезмәтчеләре «үз кылычларын яңадан чүкеп төрәннәр... ясаячаклар» һәм «сугышырга башка өйрәнмәячәкләр» (Ишагыйя 2:4).

2.   Без Гайсә пәйгамбәргә тыңлаучан. Гайсә пәйгамбәр рәсүл Петергә болай дип әйткән булган: «Кылычыңны үз урынына кайтар, чөнки кылыч алучы һәркем кылычтан һәлак булыр» (Маттай 26:52). Шулай итеп Гайсә пәйгамбәр үз шәкертләренең хәрби коралларны кулланмаячакларын күрсәткән.

    Гайсә пәйгамбәр үз шәкертләре турында алар «дөньядан түгел» дип әйткән, шуңа күрә алар сәяси эшләрдә нейтралитет саклый (Яхъя 17:16). Алар сугышларга һәм хәрби хезмәт башкарган кешеләргә каршы чыкмый.

3.   Без башкаларны яратабыз. Гайсә пәйгамбәр үз шәкертләренә «бер-берегезне яратыгыз» дигән (Яхъя 13:34, 35). Шулай итеп, алар халыкара кардәшлек булырга тиеш, һәм аларның берсе дә үз кардәшенә каршы сугышырга тиеш түгел (1 Яхъя 3:10—12).

4.   Без беренче мәсихчеләрнең үрнәгенә иярәбез. Бер хезмәттә әйтелгәнчә, «Гайсәнең беренче шәкертләре сугышта катнашмаган һәм хәрби хезмәткә бармаган», чөнки алар андый эшләрнең «Гайсәнең ярату турында өйрәтүләренә һәм дошманнарны яратырга әмеренә» каршы килгәнен аңлаган («Encyclopedia of Religion and War»). Шулай ук немец теологы Петер Майнхольд Гайсә пәйгамбәрнең шәкертләре турында болай дигән: «Кеше мәсихче дә һәм шул ук вакыт солдат та була алмый дип саналган».

 Йәһвә Шаһитләре җәмгыятькә файда китерә һәм яшәгән илләрендә һичкемнең иминлегенә куркыныч тудырмый. Без хөкүмәтләрне хөрмәт итәбез, чөнки Изге Язмаларда мондый әмерләр язылган:

•   «Өстен торучы хакимлеккә һәр җан буйсынсын» (Римлыларга 13:1).

•   «Кайсарныкын кайсарга, ә Аллаһыныкын Аллаһыга бирегез» (Маттай 22:21).

 Шулай итеп, без законнарны үтибез, салымнар түлибез һәм җәмгыять файдасына хөкүмәт белән хезмәттәшлек итәбез.