Obulemu obwa Haramagedoni nubwo bulemu obw’okumalirra hagati ya Ruhanga na gavumenti z’abantu. Gavumenti zinu n’abantu abarukuzisagika bahakaniza Ruhanga obu nibanga kworobera obulemi bwe. (Zabuli 2:2) Obulemu bwa Haramagedoni nibwija kumarraho kimu obulemi bw’abantu.​—Danieri 2:​44.

 Ekigambo “Haramagedoni” nikisangwa omu Baibuli omurundi gumu gwonka, omu Okusuku’rwa 16:16. Omu mulingo ogw’obunabbi, Okusukurwa kwoleka ngu “omu kiikaro ekyetwa omu Ruheburaniya ngu Hara-Magedoni,” “abakama abensi zona” balisorozebwa “hamu hali obulemu obwekiro ekikuru ekya Ruhanga Owobusobozi bwona.”​—Okusuku’rwa 16:14.

 Nooha arukwija kurwana omu bulemu obwa Haramagedoni? Yesu Kristo naija kwebembera amahe ag’omwiguru kusobora kusingura abanyanzigwa ba Ruhanga. (Okusuku’rwa 19:11-​16, 19-​21) Abanyanzigwa banu nihatwarramu naabo abahakaniza obusobozi bwa Ruhanga hamu naabo abamunoba.​—Ezekyeri 39:7.

 Obulemu bwa Haramagedoni nibwija kuba mu kicweka kimu eky’ensi? Nangwa. Obulemu bwa Haramagedoni nibwija kuba mu nsi yoona hatali omu kicweka kimu eky’omu nsi.​—Yeremiya 25:32-​34; Ezekyeri 39:17-​20.

 Haramagedoni, obwire obumu ekyolekwa nka “Har–​Magedon” (Oruheburaniya Har Meghiddohnʹ), nikimanyisa “Orusozi rwa Megido.” Megido rwali rubuga omu bicweka bya Isaleri eya kara. Ebyafaayo nibibazaaho obulemu obwarwaniirwe omu kiikaro eki, otwaliiremu n’obumu obwahandiikirwe omu Baibuli. (Ekyabacwi 5:​19, 20; 2 Ekyabakama 9:​27; 23:29) Baitu, Haramagedoni tikirukumanyisa ekiikaro ekiri haihi na Megido eya kara. Busayo rusozi orukooto omu kiikaro eki, kandi ekindi ekihanga kya Yezereri tikisobora kuhikwamu abo boona abarwanisa Ruhanga. Oihireho, Haramagedoni niyo nyikara nambere amahanga geteraniza kurwanisa obulemi bwa Ruhanga.

 Enyikara eriba eta omu kasumi k’obulemu bwa Haramagedoni? Nobukiraaba ngu titumanyire omulingo Ruhanga arakozesa amaani ge, baitu tumanyire ngu naija kukozesa eby’okurwanisa nk’ebiyakozeseze omu busumi bwa kara​—orubaale, emisisa, enjura ey’amaani, omurro n’ekibiriti, omurabyo, hamu n’oburwaire. (Yobu 38:22, 23; Ezekyeri 38:19, 22; Habakuki 3:​10, 11; Zakaliya 14:12) Habw’okuburanganizibwa, bamu ha banyanzigwa ba Ruhanga nibaija kwitangana kandi hanyuma nibaija kukyetegereza ngu Ruhanga nuwe arukubarwanisa.​—Ezekyeri 38:21, 23; Zakaliya 14:13.

 Ensi niija kuhwerekerra omu bulemu bwa Haramagedoni? Nangwa ensi yaitu terukwija kuhwerekerra, habwokuba ensi niyo eka y’abantu ebiro n’ebiro. (Zabuli 37:29; 96:10; Omugambizi 1:4) Omu kiikaro ky’okuhwerekereza abantu boona, Haramagedoni niija kujuna abantu habwokuba “ekitebe kingi” eky’abantu ba Ruhanga nibaija kukiraho.​—Okusuku’rwa 7:​9, 14; Zabuli 37:34.

 Obwire obumu, Baibuli ekozesa ekigambo “ensi” kumanyisa abantu ababi abarukuhakaniza Ruhanga. (1 Yohana 2:15-​17) Omu mulingo gunu, Haramagedoni niija kuleetaho okuhwaho kw’ensi.​—Matayo 24:3.

 Haramagedoni eribaho di? Yesu obw’akaba n’abazaaho “omuhito omwigi” oguratuhikya ha bulemu obwa Haramagedoni akagamba ati: “Baitu ebya ha kiro kiri nakasumi ako busaho amanyire, nobubakuba bamaraika abomu iguru, nobwakuba Omwana rundi Isenyowe wenka.” (Matayo 24:21, 36) Baitu nabwo, Baibuli eyoleka ngu Haramagedoni niija kubaho omu kasumi ak’okubaho kwa Yesu okutarukurorwa, akaatandikire omu 1914.​—Matayo 24:37-​39.