Nikimanyisa Ki ‘Kutiina So na Nyoko’?

TEKAHO

Nikimanyisa Ki ‘Kutiina So na Nyoko’?

Eky’okugarukamu kuruga omu Baibuli

Ekiragiro “so na nyoko obatinege” nikisangwa omu Baibuli emirundi nyingi. (Okuruga 20:12; Ekyebyebiragiro 5:16; Matayo 15:4; Abefeso 6:2, 3) Nikitwarramu ebintu bbina ebikuru.

1. Basiime. Oyoleka ngu notiina so na nyoko obw’obasiima habw’ebintu byona ebibakukoliire. N’osobora kwoleka ngu nobasiima obwoyoleka ngu oburagirizi obubarukukuha nobutwara nk’obw’omuhendo. (Enfumo 7:1, 2; 23:26) Baibuli n’ekwekambisa kurora abazaire bawe ‘nk’ekitinisa’ kyawe, ekirukumanyisa kubesiimisa.—Enfumo 17:6.

2. Ikiriza ngu bakwineho obusobozi. Kukira muno obw’oba okyali muto, oyoleka ngu notiina so na nyoko obwoteekamu ekitiinisa obusobozi Ruhanga obw’abahaire. Abakolosai 3:20 egamba ngu abaana abato: “Muhurrege ababazaire omu byona, baitu nikyo kirukusemera omu Mukama waitu.” Na Yesu obwakaba akyali muto, akoorobera abazaire be.—Luka 2:51.

3. Batwaze omu mulingo ogw’ekitiinisa. (Ebyabalevi 19:3; Abaheburaniya 12:9) Kinu kikira kutwarramu ebigambo eby’obaza n’omulingo obibazaamu. Amananu gali, obwire obumu, abazaire abamu betwaza omu miringo ey’eretera abaana baabo kutanguhirwa kubateekamu ekitiinisa. Eki n’obukiraaba nukwo kiri, abaana nibasobora kuteekamu abazaire baabo ekitiinisa kuraba omu kwerinda kukozesa ebigambo n’ebikorwa ebitarukwoleka ekitiinisa. (Enfumo 30:17) Baibuli eyoleka ngu kujuma so rundi nyoko kiri kibi eky’amaani muno.—Matayo 15:4.

4. Bafeeho omu ebyetaago byabo. Abazaire baawe obubakura, nibasobora kwetaaga obukonyezi bwawe. Nosobora kwoleka ngu nobateekamu ekitiinisa kuraba omu kukora kyona ekirukusoboka kurora batunga ebyetaago byabo. (1 Timoseo 5:4, 8) Ekyokurorraho, omu kaire kake Yesu atakafiire, akakora enteekaniza kukigumya ngu nyina yafiibwaho omu byetaago bye.—Yohana 19:25-27.

Ebisuba ebirukukwata ha kutiina so na nyoko

Ekisuba: Kwoleka ngu notiina so na nyoko, osemeriire kubaleka kulema obuswere bwanyu.

Amananu: Baibuli eyoleka ngu enkoragana hagati y’abaswerangaine nikyo ekintu ekisemeriire kuba kikuru muno kukira enkoragana ezindi zoona n’abanyabuzaale baawe. Omu Okubanza 2:24 nihagamba ngu: “Omusaija nikyo alirekera ise na nyina, aterane na mukaziwe.” (Matayo 19:4, 5) Amananu gali ngu, abaswerangaine nibasobora kugasirwa omu buhabuzi obw’abazaire baabo rundi baramu baabo. (Enfumo 23:22) Baitu, abaswerangaine nibasobora kuteeraho abanyabuzaale baabo ah’okugarukira omu buswere bwabo.—Matayo 19:6.

Ekisuba: So na nyoko bakwineho obusobozi oburukukirrayo kimu.

Amananu: N’obukiraaba ngu Ruhanga akaha abazaire obusobozi omu ka, obusobozi obw’abantu boona bwine obugarukiro—obusobozi bwabo tibusobora kukira obwa Ruhanga. Ekyokurorraho, kooti enkuru obuyaragiire abegeswa ba Yesu kujeemera Ruhanga, bakabagarukamu bati: “Kituhikiriire okuhurra Ruhanga okukira abantu.” (Engeso Ezabakwenda 5:27-29) Omu mulingo nugwo gumu, abaana boorobera abazaire baabo “omu Mukama,” ekirukumanyisa kworobera bintu byona ebitarukuhakaniza ebiragiro bya Ruhanga.—Abefeso 6:1.

Ekisuba: Kutiina so na nyoko kyetaagisa kuhondera enyikiriza zaabo ez’ediini.

Amananu: Baibuli etwekambisa kwekebiija ebiturukwegesebwa kurora obugaraaba gali mananu. (Engeso Ezabakwenda 17:11; 1 Yohana 4:1) Omuntu ow’akikora nasobora kucwamu kuhondera ediini ey’erukwahukana n’ey’abazaire be. Baibuli ebazaaho abaheereza ba Ruhanga baingi abesigwa abatarahondiire enyikiriza z’abazaire baabo, otwaliiremu Iburahimu, Rusi, hamu n’omukwenda Paulo.—Yosuha 24:2, 14, 15; Rusi 1:15, 16; Abagaratiya 1:14-16, 22-24.

Ekisuba: Kwoleeka ngu notiina so na nyoko, osemeriire kwejumbira omu migenzo ey’okuramya abaswenkuru abaafiire.

Amananu: Baibuli egamba: “Oramyege Yahwe Ruhanga wawe, nuwe oherezege wenka.” (Luka 4:8) Omuntu ow’aramya abaisenkuru abaafiire, aba atarukusiimwa Ruhanga. Kandi Baibuli eyegesa ngu “abafire tibamanyire ekigambo nekimu.” Baba batamanyire ngu muliyo nimubaramya; kandi tibasobora kukonyera abomeezi rundi kubahikyaho akabi.—Omugambizi 9:5, 10; Isaya 8:19.