Nk’Oku Yahandiikirwe Luka 22:1-71
-
Banyakatagara bahanuura kwita Yesu (1-6)
-
Kuteekaniza Okuhingurwaho okw’okumalirra (7-13)
-
Kutandikaho Ekiihuro kya Mukama Waitu Ekya Rwebagyo (14-20)
-
Arukugenda kungobeza ali na nyowe ha meeza (21-23)
-
Kuteera empaka ha nooha arukukirayo obukuru (24-27)
-
Ekiragaano kya Yesu eky’Obukama (28-30)
-
Yesu aranga ngu Petero naija kumwehakana (31-34)
-
Kwikara twetekaniize; empirima ibiri (35-38)
-
Yesu asaba ha Rusozi orw’Emizaituni (39-46)
-
Yesu akwatwa (47-53)
-
Petero ayehakana Yesu (54-62)
-
Yesu bamusekeereza (63-65)
-
Acwerwa omusango omu maiso g’Orukurato Orukuru (66-71)
22 Obugenyi obw’Emigaati Etatumbisiibwe obwetwa Okuhingurwaho, bukaba buli haihi kuhika.
2 Kandi banyakatagara abakuru n’abahandiiki bakaba nibaserra omulingo omurungi nk’oku baraamwita, habwokuba bakaba nibatiina abantu.
3 Nubwo Sitaani yataaha omuli Yuda arukwetwa Isikalyota, na uwe ow’akaba ali omu ha ikumi na babiri,
4 yagenda yabaza n’abanyakatagara abakuru n’abakuru b’abalinzi ba yekaru, omulingo aramubahikyaho.
5 Eki kyabasemeza muno, baamuraganiza kumuha sente ez’efeeza.
6 Yaikiriza kandi yatandika kuserra akagisa nk’oku aramugobeza hataroho ekitebe ky’abantu.
7 Ekiro eky’Emigaati Etatumbisiibwe kyahika, ekiro ekihongwa eky’Okuhingurwaho obu kyabaga kisemeriire kuheebwayo;
8 Yesu yatuma Petero na Yohana, yabagambira ati: “Mugende muteekanize obugenyi obw’Okuhingurwaho tubulye.”
9 Baamukaguza bati: “Ninkaha nambere orukugonza tugende tubuteekanize?”
10 Yagarukamu ati: “Dora obu murataaha omu rubuga, nimwija kusanga omusaija ahimbire ensoha y’amaizi. Mumuhondere, mutaahe omu nju ey’arataahamu.
11 Kandi mugambire mukama w’enju muti: ‘Omwegesa atutumire tukugambire tuti: “Ekisiika ky’abagenyi kiri nkaha nambere ndaliira Okuhingurwaho n’abegeswa bange?”’
12 Omusaija ogu naija kubooleka ekisiika ekikooto ekya haiguru ekirumu byona ebi turukwetaaga kukozesa. Nuho muteekanize”
13 Nubwo baagenda, baasanga byona ebi yabagambiire nukwo biri, kandi baateekaniza Okuhingurwaho.
14 Obwire obu bwahikire, yaikarra ha meeza n’abakwenda be.
15 Yabagambira ati: “Nyikaire ningonza muno kuliira hamu na inywe Okuhingurwaho kunu ntakabonabonesiibwe;
16 habwokuba nimbagambira nti, tindyongera kulya Okuhingurwaho, kuhikya ebintu byona bihikiiriziibwe omu Bukama bwa Ruhanga.”
17 Yakwata ekikopo, yasiima, yagamba ati: “Mukwate mukirabyemu, buli omu akihe mugenzi we,
18 habwokuba nimbagambira nti kuruga hati, tindyongera kunywa amaarwa kuruga omu mizabbibbu kuhikya Obukama bwa Ruhanga bwizire.”
19 Kandi yakwata omugaati, yasiima, yagucwamu, yagubaha naagamba ati: “Gunu nigukikirra omubiri gwange, oguraheebwayo habwanyu. Nukwo mukolege muti okunyijukaga.”
20 Omu mulingo nugwo gumu, obu baamazire kulya ekya rwebagyo, yagamba ati: “Ekikopo kinu nikikiikirra ekiragaano ekihyaka ekikozerwe habw’esagama yange eraseeswa ha bwanyu.
21 “Baitu dora! omukono gw’ogu arukugenda kungobeza guli hamu na nyowe ha meeza.
22 Ky’amananu ngu Omwana w’omuntu naagenda nk’oku kyamutekaniriziibwe. Baitu n’obu kiraaba nukwo kiri kiti, alikibona omuntu ogu aramugobeza!”
23 Baatandika kwekaguza bonka na bonka nooha omuli bo arukwija kumugobeza.
24 Hanyuma baatandika kuteezangana muno empaka ngu, nooha omuli bo arukuteekerezebwa kuba naakirayo obukuru.
25 Baitu Yesu yabagambira ati: “Abakama b’ensi balema abantu n’ikama, kandi n’abo abaineho abantu obusobozi beetwa abakonyezi.
26 Baitu inywe mutaliba muti. Baitu arukukirayo obukuru omuli inywe abe nk’arukukirayo obuto, n’ogu arukwebembera abandi abe nk’omuheereza wabo.
27 Nooha arukukirayo obukuru, ogu anyakwikaliire ha meeza rundi ogu arukuheereza? Tali nuwe ogu anyakwikaliire ha meeza? Baitu nyowe ndi hagati omuli inywe nk’omuheereza.
28 “Niinywe mungumiireeho omu kulengwa kwange;
29 kandi ninkora ekiragaano na inywe nk’oku Isenyowe yakozere na nyowe ekiragaano eky’obukama,
30 nukwo muliire kandi munywere ha meeza yange omu Bukama bwange, kandi mwikarre ha bitebe mucwere omusango enganda 12 eza Isaleri.
31 Simooni, Simooni, dora! Sitaani asabire inywena kubasegesa nk’engano.
32 Baitu nkusabiire nukwo okwikiriza kwawe kutahwaho, kandi iwe obu oligaruka ogumye bagenzi baawe.”
33 Nubwo Petero yagambira Yesu ati: “Mukama wange, nyetekaniize kugenda na iwe omu nkomo n’okufa hamu na iwe.”
34 Baitu Yesu yamugambira ati: “Petero, ninkugambira nti, kiro kinu enkoko etakakookere, noija kunyehakana emirundi esatu ngu tommanyire.”
35 Yayongera yabagambira ati: “Obu nabatumire mutaine ensaho ezahurwamu sente, n’ensaho ez’ebyokulya hamu n’enkaito, mukaburwa ekintu kyona?” Baamugarukamu ngu, “Nangwa.”
36 Hanyuma yabagambira ati: “Baitu hati, ogu anyakwine ensaho eyahurwamu sente agende nayo, n’ogu anyakwine ensaho y’okutwarramu ebyokulya agitwale, kandi n’ogu ataine mpirima atunde ekijwaro kye ekya haruguru agigule.
37 Habwokuba nimbagambira nti, ekyahandiikirwe ekirukugamba ngu ‘Akabarwa n’enkozi z’ebibi’ kisemeriire kuhikiirizibwa omuli nyowe. Kandi ebi ebyampandiikirweho, biriyo nibihikirra.”
38 Nubwo baamugambira bati: “Mukama waitu, dora! hanu twine empirima ibiri.” Yabagambira ati: “Nizimara.”
39 Obu yarugireyo, yagenda ha Rusozi orw’Emizaituni nk’oku ekaba eri ngeso ye kandi abegeswa na bo baamuhondera.
40 Obu baahikireyo, yabagambira ati: “Mwikale nimusaba nukwo mutagwa omu kwohebwa.”
41 Yabarugaho, yagenda haraho kake yateeza amaju yatandika kusaba,
42 naagamba ati: “Taata, Obu oraaba noogonza, nyihaho ekikopo kinu. Baitu kitakorwa nk’oku ndukugonza, baitu iwe nk’oku orukugonza.”
43 Nubwo, malaika yamubonekera kuruga omu iguru, yamugarramu amaani.
44 Baitu habwokuba akaba ali omu busaasi obw’amaani muno, yayeyongera kusaba, kandi entuuyo yamurugamu yafooka nk’obutoonyezi bw’esagama obukooto oburukutoonya hansi.
45 Obu yamazire kusaba, yagenda hali abegeswa be yasanga bagwijagiire, bajwahire habw’obujune.
46 Yabakaguza ati: “Habwaki mugwijagiire? Mwimuke kandi mwikale nimusaba, nukwo mutagwa omu kwohebwa.”
47 Obu akaba naakyabaza, dora! ekitebe ky’abantu baija bebembiirwe omusaija arukwetwa Yuda, omu ha ikumi na babiri, kandi yagenda hali Yesu kumunywegera.
48 Baitu Yesu yamukaguza ati: “Yuda, nogobeza Omwana w’omuntu n’okunywegera?”
49 Abo abakaba bali na uwe obu baarozere ekikaba nikigenda kubaho, baamukaguza bati: “Mukama waitu, tubateme n’empirima?”
50 Omu hali bo yatema omwiru wa nyakatagara omukuru, yamucwaho okutu okw’obulyo.
51 Baitu Yesu yabagambira ati: “Mugarukire aho.” Nubwo yakwata ha kutu kw’omwiru ogu, yamukiza.
52 Hanyuma, Yesu yakaguza banyakatagara abakuru, abakuru b’abalinzi ba yekaru hamu n’abakuru b’abantu abakaba baizire kumukwata ati: “Mwizire kunkwata mwine empirima n’emiigo nk’abarukukwata omusuma?
53 Buli kiro obu naikaraga na inywe omu yekaru, mutankwate. Baitu enu niyo esaaha yanyu n’amaani g’omwirima kulema.”
54 Hanyuma baamukwata baamutwara, kandi baamuleeta omu nju ya nyakatagara omukuru; baitu Petero akaba naabahondera haraho.
55 Obu baahembere omurro hagati y’ezigati kandi baikarra hamu, Petero na uwe yaikarra na bo.
56 Baitu omuzaana obu yamurozere aikaliire haihi n’omurro, yamwetegereza kurungi, yagamba ati: “Omusaija onu na uwe abaire ali na Yesu.”
57 Baitu Petero yakyehakana naagamba ati: “Mukazi iwe, timmumanyire.”
58 Hanyuma y’obwire buke, omuntu ondi yamurora, yagamba ati: “Na iwe oli omu hali bo.” Baitu Petero yagamba ati: “Musaija iwe, tindi omu hali bo.”
59 Kandi obu haarabireho nk’esaaha emu, omusaija ondi yalemeraho muno naagamba ati: “Mananu kwo omusaija onu na uwe abaire ali na Yesu, habwokuba Munyagaliraaya.”
60 Baitu Petero yagamba ati: “Musaija iwe, ebi orukubaza timbimanyire.” Obu akaba naakyabaza, enkoko yakooka.
61 Nubwo Mukama waitu yahinduka yarora Petero omu maiso, kandi Petero yaijuka Mukama waitu ebi akaba amugambiire ati: “Enkoko etakakookere kiro kinu, noija kunyehakana emirundi esatu.”
62 Yaturuka aheeru kandi yarra muno.
63 Abasaija abakaba bakwasire Yesu, baatandika kumusekeereza nibamuteera;
64 kandi hanyuma y’okumusweka h’amaiso, baikara nibamukaguza bati: “Tugambire, nooha akutiire?”
65 Baamubazaaho n’ebintu ebindi bingi ebibi kandi ebirukujuma Ruhanga.
66 Obwire obu bwakiire, abakuru b’abantu, banyakatagara abakuru, n’abahandiiki baayesorooza hamu, baamutwara omu kyombeko eky’Orukurato Orukuru, baamugambira bati:
67 “Obu oraaba oli Kristo, tugambire.” Baitu uwe yabagambira ati: “N’obu ndabagambira, timurukwija kukiikiriza naakake.
68 Kandi kakuba mbakaguza, timurukwija kungarukamu.
69 Baitu kuruga hati, Omwana w’omuntu aliikarra ha mukono gw’obulyo ogw’amaani ogwa Ruhanga.”
70 Nubwo boona baagamba ngu, “Hati nomanyisa ngu oli Mwana wa Ruhanga?” Yabagarukamu ati: “Niinywe inywenka mwakyegambira ngu ndi Mwana wa Ruhanga.”
71 Baagamba bati: “Hati nitukyayetaaga obwakaiso obundi? Habwokuba twakyehulirra itwenka kuruga omu kanwa ke.”
