Kugumiisirizangana—Baibuli n’Esobora Eta Kukukonyera?
“Kugumiisirizangana nugwo omulingo ogusobora kusobozesa obusinge kubaho hagati y’abantu.”—Kusigikirra ha UNESCO Declaration of Principles on Tolerance, 1995.
Ha rubaju orundi, kakuba tutaba bantu abarukugumiisirizangana, nikisobora kurugamu enobi n’okutatekamungana ekitiinisa. Enyehurra nk’ezi zikira kurugamu ebigambo ebirukukurakuraniza enobi, okusoroorangana n’okurwana.
Baitu abantu baine entekereza ezirukwahukana obukirukuhika ha kugumiisirizangana. Abamu batekereza ngu abantu abagumiisiriza abandi, basemeriire kugonza buli kimu kyona abandi ekibakora. Abandi baikiranganiza n’entekereza ya Baibuli ey’erukugamba ngu abantu abarukugumiisiriza abandi basemeriire kutekamu ekitiinisa obugabe bwa buli omu kwecweramu engeso hamu n’enyikiriza ez’arahondera, n’obukiraaba ngu ubo tibarukuzisagika.
Kasumi kanu, Baibuli n’esobora kukonyera abantu kuba abarukugumiisirizangana?
Okugumiisirizangana okurukusigikirra ha Baibuli
Baibuli ekurakuraniza okugumiisirizangana. N’egamba eti: “Okuculerrangana kwanyu kumanywe abantu bona.” (Abafiripi 4:5) Baibuli etwekambisa kutwaza abandi omu mulingo ogurukwoleka okwetegereza, ogw’ekitiinisa, kandi ogw’obwinganiza. Abo abateeka omu nkora omusingi gunu, nibasobora kutaikiranganiza rundi kwega engeso ez’omuntu ondi, baitu bamuleka ayetwaze nk’oku arukugonza.
Baitu, Baibuli n’eyoleka ngu Ruhanga ateriireho abantu endengo ezirukukwata ha ngeso. N’egamba eti: “[Ruhanga] akwolekere, iwe omusaija eki ekiri kirungi.” (Mika 6:8) N’eyoleka oburagirizi Ruhanga obw’ahaire abantu kubakonyera kuba n’obwomeezi oburukukirayo oburungi.—Isaya 48:17, 18.
Ruhanga atatuhe obusobozi obw’okucwera abandi omusango. Baibuli emubazaaho eti: “Ayataireho ebiragiro nacwa emisango ali omu . . . iwe arukucwera omusango mutahi wawe niwoha?” (Yakobo 4:12) Ruhanga ahaire buli omu haliitwe obugabe obw’okwekorra encwamu, baitu encwamu ezi zitukwataho.—Ekyebiragiro 30:19.
Baibuli ekyegamba ha kutekamu abandi ekitiinisa
Baibuli n’egamba eti: “Mutemu ekitinisa abantu bona.” (1 Petero 2:17) Nahabweki abo abacwamu kuhondera endengo za Baibuli, batwaza abantu boona omu mulingo ogw’ekitiinisa, kababe baine enyikiriza ezirukwahukana rundi nibetwaza omu miringo ey’erukwahukana. (Luka 6:31) Kinu tikirukumanyisa ngu abo abahondera Baibuli nibaija kwikiranganiza n’enyikiriza rundi entekereza z’abandi rundi ngu nibaija kusagika buli ncwamu yoona abandi eibakora. Baitu, omu kiikaro ky’okwetwaza omu mulingo ogw’obukaali rundi ogutali gw’ekitiinisa, nibaija kulengaho kukora kyona ekibarukusobora kwegera ha mulingo Yesu yatwaizeemu abandi.
Ekyokurorraho, kiro kimu, Yesu akatangatangana omukazi ow’akaba aine ediini Yesu ey’akaba atarukwikiranganiza nayo. Ekindi, omukazi onu akaba naikara n’omusaija ow’akaba atali iba,—ekintu Yesu eky’akaba atarukwikiranganiza nakyo. Baitu nabwo akabaza n’omukazi ogu omu mulingo ogw’ekitiinisa.—Yohana 4:9, 17-24.
Nka Yesu, Abakristaayo baikara betekaniize kusoborra enyikiriza zaabo hali abo ababa nibagonza kuhuliiriza, baitu bakikora “nokutina.” (1 Petero 3:15) Baibuli etererra Abakristaayo kutahambiriza entekereza zaabo hali abandi. Egamba ngu omuhondezi wa Kristo ‘tikimuhikiriire okurwana, baitu okuba omuculezi hali bona,’ otwaliiremu n’abo abaine enyikiriza ezirukwahukana.—2 Timoseo 2:24.
Baibuli eky’egamba hali enobi
Baibuli egamba eti: “Muhonderege obusinge hamu na bona.” (Abaheburaniya 12:14) Omuntu ow’ahondera obusinge ayanga enobi. N’obukiraaba ngu takora ekintu kyona ekitarukuhikaana n’endengo ze, akora kyona ekirukusoboka kwikara n’abandi omu businge. (Matayo 5:9) Ekindi, Baibuli etererra Abakristaayo kugonza abanyanzigwa baabo kuraba omu kwetwaza omu mulingo ogw’embabazi hali abo ababatwaza kubi.—Matayo 5:44.
Amananu gali, Baibuli egamba ngu Ruhanga ‘anoba,’ rundi ‘azira,’ ebikorwa ebimaramu abantu ekitiinisa rundi ebibahikyaho akabi. (Enfumo 6:16-19) Baitu hanu, Baibuli ekozesa ekigambo ‘kunoba’ kusoborra enyehurra ey’amaani muno ey’okutagonza ebikorwa ebibi. Baibuli n’eyoleka ngu Ruhanga ayetekaniize kuganyira n’okukonyera abantu abarukugonza kuhindura emiringo yabo n’okworobera endengo ze.—Isaya 55:7.
Enkarra za Baibuli ezirukwoleka akakwate akali hagati y’okugumiisirizangana n’okutekamungana ekitiinisa
Tito 3:2: “Okwebundazaga niboleka okuculera kwona hali abantu bona.”
Omuntu ow’arukwetegereza agarukamu abantu abaine entekereza ezirukwahukana omu mulingo ogw’obuculeezi, kandi ayebembeza ekitiinisa hagati y’abantu.
Matayo 7:12: “Byona ebimwenda abantu okubagira inywe, mubagirege muti bo.”
Itwena kitusemeza abandi obubatutwaza omu mulingo ogw’ekitiinisa kandi bakooleka ngu nibatwara entekereza hamu n’enyehurra zaitu nk’ekintu ekikuru. Kumanya ebirukukiraho ha mulingo tusobora kuteeka omu nkora omusingi gunu Yesu oguyayegeseze, rora ekicweka “Kutwaza Abandi nk’Oku Turukugonza Batutwaze Nikimanyisa Ki?”
Yosuha 24:15: “Mwegomboze hati bunu oumurakorraga.”
Obututamu ekitiinisa obugabe bw’abantu obw’okwekorra encwamu, tukurakuraniza obusinge.
Engeso Ezabakwenda 10:34: “Ruhanga tasorora omu bantu.”
Ruhanga tasoroora abantu n’asigikirra ha nyikara, obuhangwa, ihanga, erangi y’omubiri, rundi orulimi. Abo abagonza kuhondera ekyokurorraho kya Ruhanga, batekamu abantu boona ekitiinisa.
Habakuki 1:12, 13: ‘[Ruhanga] tarolerra obutigi.’
Okugumiisiriza kwa Ruhanga kwine obugarukiro. Taliikiriza obubi bw’abantu kugumizaamu ebiro n’ebiro. Kumanya ebirukukiraho, rora vidiyo Habwaki Ruhanga Alekereho Okubonabona?
Abarumi 12:19: “Muhigize ekiniga kya [Ruhanga]: baitu kikahandikwa ngu Okuhora enzigu kwange; nyowe ndigarurra, nukwo agamba Mukama.” a
Yahwe Ruhanga taha muntu weena obusobozi obw’okuhoora enzigu. Naija kukora kyona ekirukusoboka kurora ngu habaho obwinganiza omu kasumi akahikire. Kumanya ebirukukiraho, soma ekicweka “Obutali Bwinganiza Bulihwaho?”
a Yahwe niryo ibara lya Ruhanga. (Zabuli 83:18) Rora ekicweka “Yahwe Nuwe Oha?”
Nosobora Kugonza na Binu;
EBIRUKUTUKWATAHO
Saba Kubungirwa
Tunga eky’okugarukamu ky’ekikaguzo kyawe, rundi omanye ebirukukiraho ebirukukwata h’Abakaiso ba Yahwe.
