Habwokuba Yesu akaba ahikiriire atahikweho muno obujune hamu n’okweralikirra nk’abantu abandi. Baitu yafaahoga muno abantu. Yaikaraga ayetekaniize kukora kyona ekyarukusobora kubakonyera. Mananu kwo, embabazi nizo zamuleteraga kukonyera abandi. Wecumiitirizeeho ebyokurorraho ebiri omu Suura 32, 37, 57, 99.

Abantu boona, abato n’abakuru bakehurra ngu nibasobora kuhikirra Yesu, habwokuba tiyabaleteraga kutekereza ngu aine bingi muno eby’okukora rundi ngu w’amaani muno. Abantu baagonzaaga kwikara na Yesu, habwokuba bakiroraga ngu n’abafaaho. Kwetegereza kinu, rora Esuura 25, 27, 95.

Butoosa Yesu yasabaga Ise kuruga ha mutima, obuyabaga ali wenka, kandi n’obuyabaga ali n’abaheereza ba Yahwe abandi. Yasabaga emirundi nyingi, hatali obuyabaga n’agenda kulya honka. Yasabaga hali Ise kumusiima, kumukugiza, kandi n’okuserra oburagirizi bwe obuyabaga atakakozere encwamu ez’amaani. Tekerezaaho ebyokurorraho ebirukusangwa omu Suura 24, 34, 91, 122, 123.

Obwire obumu, obuyabaga nagonza kuhumuraho, yacwamuga kwebembeza ebyetaago eby’abantu abandi. Akaba ataine entekereza ey’okwebembeza ebyetaago bye wenka. N’omu mulingo gunu akatuteraho ekyokurorraho ekitusemeriire kuhondera. Wesomese omulingo ekyokurorraho kinu kyolekerwe omu Suura 19, 41, 52.

Yesu atagarukire ha kwegesaaho omugaso gw’okuganyira, baitu akakyoleka omu bikorwa obuyaganyiire abegeswa be hamu n’abandi. Wecumiitirizeeho ebyokurorraho ebiri omu Suura 26, 40, 64, 85, 131.

Kyali kirangirwe ngu Abayudaaya abarukukira obwingi baakwangire kwikiriza Masiya kandi n’abanyanzigwa be baakumwisire. Nahabweki Yesu tiyakwekambire kukonyera abantu. Baitu, n’obwekambi akakurakuraniza okuramya okw’amananu. Akateeraho abahondezi be boona ekyokurorraho eky’okwoleka obwekambi n’obubaraaba nibahakanizibwa. Rora Esuura 16, 72, 103.

Omu miringo nyingi muno, Yesu akaba nakira abantu abatahikiriire, nk’omu kumanya hamu n’amagezi. Hataroho kugurukyagurukya habwokuba akaba ahikiriire akaba aine amaani hamu n’okwetegereza kukira abantu abandi boona. Baitu n’obwebundaazi akaheereza abandi. Noija kutunga amasomo ha nsonga enu omu Suura 10, 62, 66, 94, 116.

Yesu yaikaraga n’ayoleka abakwenda be hamu n’abantu abandi okugumiisiriza obubaalemwaga kuhondera ekyokurorraho kye rundi kuteeka omu nkora ebyabagambiire. Omu mulingo ogw’okugumiisiriza akagarukamu amasomo agabarukwetaaga nukwo basobole kwirra haihi na Yahwe. ­Wecumiitirizeeho ebyokurorraho ebirukwoleka okugumiisiriza kwa Yesu omu Suura 74, 98, 118, 135.