Tekerezaaho enkoragana ey’amaani ey’eba hagati y’abarongo abarukusisana. Baba n’enkoragana ey’amaani. Nancy Segal omurongo, kandi arukwebembera ekitongole kya Twin Studies Center nagamba ngu: Abarongo abamu nibasobora kuhulirizangana kandi baketegerezangana kurungi enyuhurra zaabo. Omukazi omu omurongo akasoborra enkoragana ey’aine na mugenzi we ati: “Nitumanyangana kurungi muno.”

Kiki ekibasobozesa abarongo abarukusisana kuba n’enkoragana y’embaganiza nk’enu? Okuseruliiriza nikwoleka ngu ekiikaro nambere bakuliire n’omulingo bakuziibwemu bibasobozesa kwetegerezagana baitu ekikira kuletera abarongo banu abarukusisana kwetegerezangana niyo emiringo erukusisana ei bazarwa nayo.

TEKEREZAAHO KINU: Omuhangi waitu natumanyira kimu kurungi kukira omuntu ondi wena. Enu niyo ensonga habwaki Omukama Daudi yagambire ati: “Okansereka omu nda ya mau. Omubiri gwange gutakuserekwe, obunakozerwe omu nsita. . . . Amaiso gawe gakarora omubiri gwange gutakahikiriire, kandi omu kitabu kyawe ebicweka byange byona numwo byahandikirwe.” (Zabuli 139:13, 15, 16) Ruhanga nuwe wenka ow’amanyire kandi ow’ayetegereza emiringo twazairwe nayo kandi n’enyikara ezatuletiire kuba n’emiringo ei twine. Omulingo ogw’embaganiza Ruhanga arukutumanyamu n’omulingo arukumanya emiringo twazairwe nayo nigwoleka ngu mali atumanyiire kimu kurungi.

Omukama Daudi akasaba nagamba ngu: “Ai Mukama, okandora muno oka’manya, omanyire obunyikarra, kandi obunyimuka, okenga okutekereza kwange kukyali hara. Baitu busaho kigambo omurulimi rwange, rundi dora, ai Mukama, iwe okimanyiire kimu.” (Zabuli 139:1, 2, 4) Kwongera hali eki, Yahwe amanyire omutima gwaitu, kandi ‘n’amanya n’okucumitiriza kwona okwebitekerezo.’ (1 Ekyebyomubusinge 28:9; 1 Samuiri 16:6, 7) Ebyahandiikirwe binu nibitwegesa ki hali Ruhanga?

N’obukiraaba ngu obwire obumu obutusaba tulemwa kusoborra Ruhanga byona ebiri ha mutima gwaitu hamu n’enyehurra yaitu, Omuhangi waitu atwetegereza. Ekintu ekindi, ayetegereza ebintu ebirungi ebitwakugondeze kukora n’obukiraaba ngu obuceke bwaitu butulemesa kubikora. Habw’okuba Ruhanga akatuhanga twine okugonza omu mitima yaitu, ayetegekere​—n’ekihika kingi—​kurora n’okwetegereza ebitekerezo byaitu hamu n’ebigendererwa  byaitu ebirungi eby’engonzi.​—1 Yohana 4:7-10.

Ebyahandiikirwe nibitugumya ngu

• “Amaiso ga Mukama gaikaire ha bahikiriire. Namatuge gali ha kusaba kwabu.”​—1 PETERO 3:12.

• Ruhanga naturaganiza ngu: “Ndakwegesaga, ndakuragi’raga omu muhanda ogworarabamuga: Ndakuhaburaga neriso lyange liikaire haliiwe.”​—ZABULI 32:8.

Kukimanya ngu Ruhanga nayetegereza enyikara n’enyuhurra zaitu, nikisobora kutukonyera kugumiisiriza ebizibu byaitu? Tekerezaaho eky’ahikire hali Anna, ow’akuruga omu ihanga lya Nigeria. Nagamba ngu: “Habw’ebizibu ebiingi ebi nkaba nyine, nkahurra obwomeezi buntamire. Nkaba ndi mufakati kandi nkaba ndi mwirwarro nindolerra muhara wange ow’akaba aine oburwaire obw’okwijura amaizi omu bwongo. Nanyowe bakasangamu oburwaire bw’ekookoro ey’amabeere kandi bansemeza. Akasumi ako kakangumira muno, habwokuba itwena tukaba tuli omwirwarro turwaire.”

Kiki eky’akonyiire Anna kugumisiriza? “Nkecumiitirizaaho ebyahandiikirwe nka Abafiripi 4:6, 7, ekirukugamba ngu “nobusinge bwa Ruhanga oburukukira okumanywa kwona bulirinda emitima yanyu nebitekerezo byanyu.” Obwire bwona obunatekerezaahoga ekyahandiikirwe kinu, nayehurraga ndi haihi na Yahwe habwokuba nkaba nimanya ngu nanyetegereza kurungi n’okunkira. Kandi n’ab’oruganda ab’omu kitebe Ekikristaayo bakangarramu muno amaani.

“N’obukiraaba ngu nkyali murwaire, enyikara yange n’eya muhara wange ey’eyongiire kusemera. Habwokuba Yahwe ali ha rubaju rwaitu, kitukonyiire kuleka kutekereza kubi obutuhikwaho ebizibu. Yakobo 5:11 nirutugumya ngu: ‘Nitubeta abomugisa abagumisiriza: mukahurra ha kuguma kwa Yobu, kandi mukarora empero ya Mukama, Mukama okwali owembabazi nyingi nokuganyira.’” Yahwe aketegereza kurungi enyikara Yobu akaba arumu, nahabweki naitwe nitukigumiza kimu ngu n’ayetegereza ebizibu ebiturukurabamu.